Matiu 4 - Ạḍinya Iigbia

Ịdi ọdegh Jịzos ophogh

¹ Kụ Uwaloor Iigbia phọ ạpham Jịzos ạghimom ẹpe ẹdala phọ, ịlo Eru phọ kẹdegh nyọdi epogh,

² kụ ọdi ạkaagh ẹḍogh inyadi aḍughul-otu, kụ mọony amem kụ ọkoony asiph nyọdi.

³ Kụ Eru phọ eru ẹdegh nyọdi kụ ẹḅem mọ, “Nạ kụ Ọony phọ Ẹnaan ni, pọ ḅẹni sighiigh phọ ịphen mọ bịdi eteneghu iiḅoghoḍi ạbred!”

⁴ Kụ ạJizos ạphagharanaan nyọdi mọ, “Ọge ni pạ ạḍinya iigbia phọ mọ, ‘Oye kạ́tolom rꞌeḍien bịn, emuton oomo ikpo ọnhu phọ ịpe ẹḍua bọ ọnhu Ẹnaan kụ emite.’”

⁵ Kụ Eru phọ ẹsighe Jịzos esiemi ẹpe ẹmha iigbia phọ ẹsiinye eekuna ạnyu Otu Ịiḅereghi phọ,

⁶ kụ ẹḅeni nyọdi mọ, “Mọ ạna kụ Ọony phọ Ẹnaan ni, pọ pel akuruph. Ọge ni pạ ạḍinya iigbia phọ mọ, “‘Ẹnaan kẹḅeni ni rụukpaany phọ ọdi mọ okoph nyịna, ọbo nạ kạnmighima ghan bọ owol loor aḍighiigh.’”

⁷ ẠJizos ạphagharanaan mọ, “Ọge kẹn ni pạ ạḍinya iigbia phọ mọ, ‘Kạ́degh Ọmoogh-we Ẹnaan phọ ạna apogh!’”

⁸ Kụ Eru phọ ẹḅile ẹsighe nyọdi ẹsiinye ạnyu eboom eegum, kụ eḍeenaan nyọdi oomo areelhe aḅirini phọ, rꞌigbogh phọ ạbidi,

⁹ kụ ẹḅeni nyọdi mọ, “Mị kạngo ni nyịna oomo ạraraar phọ ịphen, lọ nạ ameera akpuḍian uuseeny ịmi.”

¹⁰ Kụ ạJizos mọ, “Setan, ḍụa sịen ghisigh ạmi. Ọge ni pạ ạḍinya iigbia phọ mọ, ‘Nạ kakpuḍian ghan ạngo eghuan Ọmoogh-we Ẹnaan phọ ạna, kụ aaseeny ghan nyọdi bịn!’”

¹¹ Kụ Eru phọ ẹwile nyọdi ẹḍua kụ ạruukpaany phọ Ẹnaan eru ẹrolan nyọdi.

ẠJizos amiigh oḍighi phọ ọdi ẹpe Galili

¹² Kụ ạJizos rọnaghan mọ mosiph Jọn ọlogh ikoli, kụ ạḍua ạghi ẹpe Galili.

¹³ Ọdi ọ́ghi mun Nạzeret, ạḅile agheel Kạpaniom ẹpe ọgbal ọphiiny phọ, eelhe phọ ạZebiulon rꞌạNaftalai, kụ aḍighi ẹmha ọdi.

¹⁴ Ịphen phọ imite omuneniom ịpe Azaya oyil phọ Ẹnaan ạghaaph bọ mọ,

¹⁵ “Ẹpe eelhe ạZebiulon rꞌạNaftalai, ẹpe etuman bọ otu-ḅualhe phọ, ẹḅeenyom Ọphiiny ạJodan, ẹpe eelhe phọ aGalili aruuruen phọ orugh bọ,

¹⁶ awe phọ ạbuphe ọrol ghan bọ esi ufiri kọmiin ḍịnmananmana ạḍiḅaal! Kụ bụphe aḍuugh memoogh bọ ạḍiḅaal mesoorom!”

¹⁷ Emiigh kꞌamem mọ ọpo kụ ẹdi ạJizos agbi bọ ọghaaph ghan kụ ạḅem mọ, “Ikiton esi ịkaraph anyina. Ọmar phọ kꞌẸnaan masi sịen ẹda ạḍighaagh.”

ẠJizos ạmagh inya ạbukoniom ạkoni

¹⁸ ẠJizos ratelhe oogbom Ọphiiny aGalili, kụ ạmiin ịyal abumor, Saimon ọpo oghol bọ mọ aPita, rꞌẠndru, dị rozu ghan ọzuguru, ịdi eḍighi bọ bịdi ạbukoniom ạkoni.

¹⁹ Kụ ọdi ạḅeni bịdi mọ, “Itu ịdaph ịmi. Mị kiḍighi inyina bụo ạkoni awe.”

²⁰ Egina amem bịn bịdi ọwile ịzuguru phọ ạbidi ọdaph nyọdi.

²¹ Ọdi atelhe rạki, kụ ạḅile ạmiin ịyal ạbunon abumor, Jems rꞌạJon, dị odi ologhi oghuugh rꞌaZebidi ọde phọ ạbidi rọokoḍi ghan ịzuguru phọ ạbidi. Kụ ọdi ạmagh bịdi.

²² Egina amem kụ bịdi ọwile ọde phọ ạbidi pạ ologhi oghuugh phọ ọdaph nyọdi.

ẠJizos ạkaaph ạtughemi we, ạḅile aakonom bụdi úmoonogh aḍume yogh

²³ ẠJizos arelhe yogh ni oomo phọ aGalili, ạtughemi ghan pạ arubughotu phọ ạbidi, kụ ạghaaph ghan ooḅi ọghaaph ọmar phọ kꞌẸnaan, kụ aakonom ghan we oomo awe dị ariiphina rꞌạreezegh kịrokiro eḍighi yogh.

²⁴ Kụ ọdu phọ ọdi aleeny ni eleeny oomo eelhe phọ ạSiria, kụ awe ọsighe yogh oomo ạbuphe úmoonogh bọ rꞌạbuphe ịkaraph aruwaloor phọ ẹrol ghan bọ ẹmhu phọ, rꞌạbuphe osiphi ghan bọ isughuna phọ, rꞌạbuphe ạraghaagh rꞌaruwol emuughu bọ, rꞌạbuphe ariiphina kịrokiro eḍighi yogh bọ oruomonaan nyọdi, kụ ọdi aakonom bịdi.

²⁵ Kụ aḍita awe ụḍua ni Galili rꞌạDekapolis, rꞌaJeruselem, rꞌaJudia, rꞌẹḅeenyom ạJodan ọdaph nyọdi.