Matiu 28 - Ạḍinya Iigbia

Oḅetenu esi aḍuugh phọ

¹ Aḍio ophooghian phọ reten rẹḅaal ḍịroor ạḍiḅel aḍio awiki phọ, kụ aMeri ọpo ạMagdala phọ rꞌọphori phọ aMeri phọ, oru ophogh oḍi phọ.

² Ade phọ iphiigha ni ẹekia ephiighaam kụ ekperenom bịn ọokpaany Ọmoogh-we phọ ạḍua ạnyu asoor ude, aakilemi ḍighiigh phọ opukiom bọ ọnhu oḍi phọ ạsighe, kụ ạrol ude ạnyu aḍighiigh phọ.

³ Aḍimite phọ ọdi ịrol mụdi ọomaany. Ạsuoma ọdi ạḅaal forororo.

⁴ Kụ abukoriom mọ oḍi phọ uphiigha ni okpereghaan kụ ọghigh we dị momuughu.

⁵ Kụ ọokpaany phọ Ẹnaan ạḅeni nmạriir phọ mọ, “Kékiilaan. Mị alegheri ni mọ nyina rẹwa ghan Jịzos ọpo ọkan bọ oghiigh.

⁶ Ọdi ólho sịen. Ọdi maḅetenu sịphe aḍuugh phọ, ịdipho ọdi ạḅem bọ. Itu ẹmiin esi phọ ọmuneen bọ nyọdi.

⁷ Ịnuun ẹghi ẹḅeni bụmatuan phọ ọdi mọ, ‘Ọdi maḅetenu esi aḍuugh phọ. Ọdi raḍiemi ghan ẹpe Galili kụ okori anyina. Ẹpe kụ ẹdi nyina kẹmiin nyọdi.’ Ịphen kụ ịdi mị ạmoogh ọḅeni anyina.”

⁸ Kụ bịdi ọnuun ọḍua sịphe oḍi phọ rꞌoghiilaan rꞌọḅaal ologhi, oghiil ọghi ọḅeni ạbumatuan phọ ọdi.

⁹ ẠJizos ạteeny nmạriir phọ ekperenom kụ ạḅeni mọ, “Nyina edi,” kụ bịdi ọghi ọpham ruwol ọdi kụ ooseeny nyọdi.

¹⁰ Kụ ạJizos ạḅeni bịdi mọ, “Kékiilaan. Ịki ẹḅeni bumor phọ ạmi bịdi ọghi ẹpe Galili. Ẹpe kụ ẹdi bịdi kụmiin ịmi.”

Ạḍughum ọnhu abukoriom oḍi phọ

¹¹ Mem dị ạnmariir phọ rọḍuaghu, buniin abukoriom oḍi phọ ọghi ẹpe ẹmha phọ kụ ọghaaph oomo ịpe emite bọ ọḅeni bụo ạrumhu ariil ạrikia phọ.

¹² Kụ bịdi rꞌikumoor awe phọ ookpomoghan oopuruan kụ ọghi ọngo iboom ikpoki we ẹgham mọ,

¹³ kụ ọḅeni mọ, “Ịkaaph ghan mọ ạbumatuan phọ ọdi kụ uru omi nyọdi ọsighe ḍughul mem dị nyina rẹnaani yogh.

¹⁴ Kụ ọdaam mọ ạnaghan, pọ yoor kotue ni ọkaaph oḅonyon ologhi ọdi. Ịyaar inyina kị́iḅaghami!”

¹⁵ Kụ bịdi ọsighe ikpoki phọ, kụ ọtuugh ịpe ọḅeni bọ bịdi oḍighi. Kụ kꞌagee-pọ, ịphen kụ ịdi ạbuo aJu phọ rọkaaph ghan koleenye.

ẠJizos amite egaan aḍeenaan loor bụmatuan phọ ọdi

¹⁶ Kụ ḍioph rꞌoniin ạbumatuan phọ ụḍua ni ọghi Galili ookpomoghan sịphe ẹeḅaraph phọ ạJizos aghol bọ ạḅeni bịdi.

¹⁷ Kụ mem dị bịdi ọmiin bọ nyọdi, buniin uuseeny ni nyọdi kụ buniin ụ́kar umeeraam.

¹⁸ Kụ ạJizos aru ạghaaphan rꞌạbidi kụ ạḅem mọ, “Ẹnaan mịngo ni ịmi oomo phọ ịikpo phọ ẹpe kꞌạke rꞌịsien ade phọ.

¹⁹ Esi ịphen phọ, ịki oomo areelhe aḅirini phọ ẹkpaariom awe phọ oḍighi bụmatuan ạmi, ewurogh bịdi mụum esi aḍien Ọde phọ, rꞌỌony phọ, rꞌUwaloor Iigbia phọ,

²⁰ ẹtughemi bịdi ooko oomo ạraraar phọ mị ạto bọ ịḅeni inyina. Kụ ilegheri mọ mị odianaan ni rꞌanyina, ḍio etum ḍio tụtu ẹteeny eekuna aḅirini phọ.”