Matiu 22 - Ạḍinya Iigbia

Aḍidogh amalhe kꞌạrogo

¹ Kụ ạJizos ạḅile ạsighe sidogh kụ ạghaaphom ạḅeni we phọ mọ,

² “Kọsighe ọmar phọ kꞌẸnaan ọmaaniom ọghaaph oniin ọdaam dị rapinanaan mọony ọdi ạnir, kụ ạsa eḍien ạrogo.

³ Kụ arom butelhedom mọ ọdi mọ ọghi ọomaghagh bụphe mọḅeni yogh bọ oru kꞌạrogo phọ; kụ bịdi úmeera utu.

⁴ Kụ ọdi ạḅile kẹn arom bụnon abutelhedom mọ, ‘Ịki ẹḅeni bụphe mọḅeni yogh bọ mọ mị maakolobian ni malhe phọ. Mị mạze ugheel ạsinam rꞌaroophoony ịnam mọ ạmi ạkanyan. Oomo phọ ạraraar phọ meekpomoghan ni rekori malhe phọ. Itu kꞌạrogo phọ.’

⁵ Kụ bịdi ụ́sighe ụmaghami ịyaar, bịn ọwalala ọḍuaghu. Oniin aten ạghi ozo ọdi, oniin ạghi omuul aḍighi ọdi.

⁶ Kụ bụphe osugha bọ osiphi butelhedom oye phọ bịn okuphogh ọze.

⁷ Kụ mem dị ọdaam mọ ạnaghan bọ ịphen phọ, ịghagh ni ologhi ọdi, kụ arom we ẹgham ọdi mọ ọghi ọze rọokom-enu phọ ạbuphe, ọsu ẹmha phọ ạbidi nịan ophiemi.

⁸ Kụ ọdi ạḅeni butelhedom mọ ọdi mọ, ‘Mookpomoghi ni rạraar ạrogo phọ, kụ bụphe mọḅeni yogh bọ ụ́kpianaan oru kꞌạrogo phọ.

⁹ Ịki ghụn ẹpe aroḅodo phọ ẹemaghagh bụlo nyina ẹmiin, ẹḅeni mọ oru kꞌạrogo phọ.’

¹⁰ Kụ abutelhedom mọ ạbuphe ọghi roḅodo phọ ọomaghagh bụlo bịdi ọmiin, bụkaraph rꞌabugey, ookpomoghi. Kụ awe omuza kꞌạrogo phọ.

¹¹ “Kụ ọdaam mọ ạghi aḍigh sịphe phọ ophogh aruuruen phọ, kụ ạmiin oniin oye dị odi aani pạ phọ, dị ạsuoma apinien phọ ụ́kpologhian aani.

¹² Kụ ọdi ạmagh nyọdi mọ, ‘Mọony phọ, nạ uru ika sịen kụ ạsuoma apinien phọ nạ ọ́kpologhian aani?’ Kụ ọdi mạar ọ́ḅem.

¹³ Kụ ọdaam mọ ạḅeni butelhedom mọ ọdi mọ, ‘Ịpaḍi nyọdi rạghaagh rꞌaruwol, esumeeny nyọdi ẹpe ọkikiph ufiri phọ; ịpa kụ esi dị kạtol amoghi yogh ạkirigha.’

¹⁴ “Ụmagh ni ḍita, kụ ẹphurukpu kụ ạbudi ọsaḅar.”

Aḍipuru ịlo osogh ghan iisogh

¹⁵ Kụ aFarisi phọ ọghi oḍighan egir, pịdi bịdi ọnaghan ḍụghum ọnhu ọdi ọtuan osiphom.

¹⁶ Kụ bịdi orom bụmatuan ạbidi rꞌạbuo ạHerod, mọ ọghi ọteeny Jịzos opuru mọ, “Ọtughemia, yoor olegheri ni mọ nạ oye aruukuan ni. Nạ rápogh ghan oye kạmagh mọ ịyaar ri. Esi ạna oye oye ópu. Nạ ạkar ri rạtughemi ghan reten phọ Ẹnaan.

¹⁷ Loor ịduon phọ, ụḅeni iyoor. Nạ ragbi ghan ika? Iilogh phọ ayira emeeraam ni mọ yira osogh ghan iisogh phọ aSiza, ọdaam mọ aRom? Ẹkpe ni ḍụghum kụ ị́kpe?”

¹⁸ Kụ ạJizos alegheri ni ịkaraph igbiighi phọ ạbidi, kụ apuru mọ, “Nyina rịdegh ghan ịmi eeghe? Nyina awe ịyal asinem.

¹⁹ Iḍeenaan ịmi ọdo ikpoki phọ nyina resoghom ghan bọ iisogh phọ.” Kụ bịdi ọsighe okpoki phọ oruomonaan nyọdi.

²⁰ Kụ ọdi mọ, “Ẹphen phọ ẹkigh ẹmhu ạnhian? Ọge sịen phọ ịlo ạnhian?”

²¹ Kụ bịdi mọ, “ASiza.” Kụ ọdi ạḅeni bịdi mọ, “Isogh ịlo aSiza ẹngo Siza, esogh ịlo Ẹnaan ẹngo Ẹnaan.”

²² Bịdi rọnaghan bọ ịphen phọ kụ omaghagha yogh kụ ọwile nyọdi ọḍuaghu.

Aḍipuru ịlo oḅetenu esi aḍuugh

²³ Egina phọ aḍio phọ, buniin aSadusi phọ uru ni ọteeny Jịzos. Kụ ạri awe phọ ạbuen úmeeraam mọ oye kạḅile ni aḅetenu esi aḍuugh.

²⁴ Kụ bịdi opuru mọ, “Ọtughemia, aMozis ạtughemi mọ oye aphin ạnir kụ ạwile amugh kụ nmụny ọ́mar, pọ umor ọdi ale ạnir phọ erua amiteghomonaan nmụny.

²⁵ Eniin amem oḍual abumor ụrolan ni rꞌayira, kụ okumoor phọ aphin ạnir kụ amugh kụ nmụny ọ́mar, kụ umor phọ ọdi ale ạnir phọ ọdi erua.

²⁶ Ịdipho kẹn kụ ịdi emitenaan nyọpo amuneniom bọ ịyal rꞌịraar tụtu ẹteeny nyọpo amuneniom bọ oḍual phọ.

²⁷ Ruukuna phọ ạnir phọ amugh aani ni.

²⁸ Ụḅeni iyoor, mem oḅerenu esi aḍuugh phọ, ạnir phọ kaḍighi ọlo ạnhian sịphe oḍual phọ? Oomo phọ ạbidi mophin ghan bọ ni nyọdi.”

²⁹ Kụ ạJizos ạphagharanaan bịdi mọ, “Nyina ẹkar ri ẹpioman, ịdi eḍighi bọ nyina ị́naghanan Ạḍinya Iigbia phọ, ílegheri kẹn ịikpo phọ Ẹnaan.

³⁰ Mem oḅerenu esi aḍuugh phọ, apinien kạ́tol, kụ awe kọkighogh rụukpaany phọ Ẹnaan.

³¹ Kụ ịlo oḅerenu esi aḍuugh phọ, nyina kạ̋al ghan mọ Ẹnaan ịḅeni inyina mọ,

³² ‘Mị kụ Ẹnaan phọ Ebraham rꞌẠizik rꞌạJekob.’ Ịkiom ologhi mọ Ẹnaan ẹḅem ni ẹkpaariom mọ ọno kụ Ẹnaan phọ ạbidi, ghạlamo ịdipho bịdi momuughu bọ ni, pọ bịdi odi ni.”

³³ Kụ mem dị aḍita awe phọ ọnaghan bọ ịphen phọ, ịtughemi phọ ọdi iḍigh ni ḍiigu esi ạbidi.

Ọkaraghi ogbogh ologh phọ

³⁴ Mem dị aFarisi phọ ọnaghan bọ mọ ạJizos makpomori ọnhu aSadusi phọ, bịdi uukpomoghan ni egina esi.

³⁵ Kụ oniin ọnyo ạbidi, ọgbaam iilogh, ạwaaghi ni reten ọnaghan ạḍughum ọnhu ọdi, kụ apuru mọ,

³⁶ “Ọtughemia, ọghen kụ ọkaraghi ogbogh sịphe iilogh phọ?”

³⁷ Kụ ạJizos mọ, “‘Pọmoghian Ọmoogh-we Ẹnaan phọ ạna, rꞌoomo ologhi ạna, rꞌoomo uwaloor ạna, rꞌoomo ịitughian ạna.’

³⁸ Ọphon kụ ọḅel rꞌọkaraghi ogbogh phọ.

³⁹ Kụ ọpo amuneniom bọ ịyal phọ ịdipho ọḅel phọ ni mọ, ‘Pọmoghian ọnon oye ịdipho aloor phọ ạna.’

⁴⁰ Oomo phọ iilogh phọ aMozis rꞌịtughemi ariil phọ edi sịen ịyal phọ iilogh phọ ịphen bịn.”

Aḍipuru ịlo aMesaya phọ

⁴¹ Mem dị aFarisi phọ ookpomoghan egina esi, ạJizos apuru ni bịdi mọ,

⁴² “Nyina regbi ghan ika ịlo aMesaya phọ? Ọdi ọony ạnhian?” Kụ bịdi mọ, “Ọdi, ọony aDevid.”

⁴³ Kụ ọdi apuru bịdi mọ, “Uḍighi ika kụ Uwaloor Iigbia phọ aḍighi bọ dị aDevid rꞌaloor ọdi aghol bọ nyọdi mọ Ọmoogh-we? ADevid kụ ạḅem bọ mọ,

⁴⁴ “‘Ẹnaan phọ ẹḅeni Ọmoogh-we ạmi mọ: Tọl ḍịghaagh elhiom ạmi, tụtu ẹteeny mem dị mị kaḍighi bụmulogh-ḍien phọ ạna ịkasi ọkpasaghiom aruwol.’

⁴⁵ “ADevid aghol li Mesaya phọ mọ Ọmoogh-we, ika kụ ẹdi ọdi aru bọ mọony ọdi?”

⁴⁶ Kụ rꞌoniin oye órue ọphagharanaan Jịzos ekpo ọnhu, kụ emiigh kꞌaḍio phọ ạḍiphe kụ ẹghiom risigh, oye óḅom ghan mun ẹmhu ọḅile opuru nyọdi ḍipuru.