Matiu 21 - Ạḍinya Iigbia

Ọsaram Jịzos osiemi Jeruselem

¹ Mem dị moru otuman Jeruselem ẹpe Betfagi, bịdi uru ni osi Eegum Ọlivs, kụ ạJizos arom ịyal ạbumatuan,

² mọ, “Ịki ẹmha phọ ẹpe nyina rẹmiin bọ. Nyina esi, nyina kẹmiin ni ẹnam adool dị ọkpooghi rꞌọony ọdi odi. Ịkatan ẹsighe iruomonaan ịmi.

³ Kụ oye lọ ipuru inyina ịyaar, ịḅeni mọ, ‘Ọmoogh-we phọ ạmoogh ni ịyaar oḍighinom ọdi, kụ kạnuun ni aḅulemi.’”

⁴ Oomo phọ ịphen imite omuneniom ịpe oyil phọ Ẹnaan ạghaaph bọ kụ ạḅem mọ,

⁵ “Ịḅeni we phọ ạZayon mọ, ‘Ọdaam ẹmha phọ anyina maḍigh ẹnam adool, onyugheel ẹnam adool, asooromi ni loor kụ ratu kꞌanyina.’”

⁶ Kụ ạbumatuan phọ ọghi ọtuugh ịpe ạJizos ạto bọ ạḅeni bịdi oḍighi.

⁷ Kụ bịdi ọsighe ạsu phọ rꞌọony phọ oru, kụ ọkporonaan rụsuoma ạbidi ozuughiom ọman ịnam mọ, kụ ạJizos aḍigh.

⁸ Kụ aḍigbogh aḍita awe phọ ụkporonaan kẹn ni rụsuoma ạbidi ọdeeghi oḅodo phọ, kụ buniin ọgba rịphiph ireeny, kụ ọdeeghi oḅodo phọ.

⁹ Kụ bụphe oḍia bọ rꞌạbuphe ọrol bọ ọman phọ ụlooghi ghan mọ, “Iboom mọony phọ aDevid. Ẹnaan ẹseph ni nyọon phọ ratumom bọ ḍien Ọmoogh-we phọ! Iboh ẹrolonaan ni Ẹnaan ẹpe kꞌạke!”

¹⁰ Kụ mem dị ạJizos asi bọ ẹpe Jeruselem, oomo phọ ẹmha phọ iphiigha ni, kụ opuru ghan mọ, “Ọphon phọ ạnhian?”

¹¹ Kụ aḍita awe phọ ọḅem ghan mọ, “Ọphon phọ ạJizos, oyil phọ ạNazeret ẹpe Galili.”

ẠJizos ạki aḍigh Otu Ịiḅereghi phọ

¹² Kụ ạJizos ạghi aḍigh Otu Ịiḅereghi phọ, kụ aphorogh oomo ạbuphe romuul bọ ḍighi pạ otu phọ, kụ agborion ịdaabili ạbuphe ronmeeghi bọ ikpoki phọ, rꞌạsigada awe phọ robologhi bọ rụkurughozo phọ.

¹³ Kụ ạḅeni bịdi mọ, “Ọge ni pạ Ạḍinya Iigbia phọ otu ạmi kokol mọ Otu Ịiḅereghi, kụ nyina mẹḅile ekiton eḍighi otu ạruḅa.”

¹⁴ Kụ awe ikpom ariḍien rꞌạrukugha uru ni ọteeny nyọdi sịphe Otu Ịiḅereghi phọ, kụ ọdi aakonom bịdi.

¹⁵ Iphin ni iloghi ạbuo ạrumhu ariil ạrikia phọ rꞌạbutughemia iilogh phọ, mem dị bịdi ọmiin bọ rạraar ịiḍaany phọ dị aḍighi yogh bọ, ọḅile bọ ọnaghan ịlooghi phọ ịbam ạnmuny phọ roboom bọ Jịzos pạ Otu Ịiḅereghi phọ mọ, “Iboh ẹrolonaan mọony phọ aDevid!”

¹⁶ Kụ bịdi opuru nyọdi mọ, “Nạ ạnaghan ni ịphen bịdi rọḅem bọ?” Kụ ạJizos ameera mọ, “Ii. Nyina kạ̋al ghan mọ Ẹnaan ẹḅem mọ ọno kaḍighi dị ịbam ạnmuny rꞌạbulo rọmaam kọkuami ni oboom nyịno?”

¹⁷ Kụ ọdi ạwile bịdi kụ ạḍua aḅula ẹpe Betani, kụ ạmina ẹḅaal.

ẠJizos asu ọnhu oreeny dị oghol mọ ạfig

¹⁸ Kụ rẹḅaal ạJizos ạḅile rạki ẹpe ẹmha phọ, kụ ọkoony asiph nyọdi.

¹⁹ Kụ ạmiin oreeny dị oghol mọ ạfig pạ ọgbal eten phọ, kụ ạghi ophogh, kụ ọ́miin ịyaar omuton rịnya phọ bịn, kụ ọdi ạḅeni mọ, “Kámuum mun iimuma, kꞌiḍuul kꞌiḍuul kꞌagee-pọ!” Kụ mem mem mọ bịn oreeny phọ anyororo.

²⁰ Kụ mem dị ạbumatuan phọ ọdi ọmiin bọ, iḍighi ni iikia esi ạbidi kụ bịdi opuru mọ, “Iḍighi ika kụ oreeny phọ ọphon phọ anyororo bọ egina ịduon phọ?”

²¹ Kụ ạJizos mọ, “Mị ạkar rịḅeni ghan inyina mọ eḍighi ịyaar dị nyina emeeraam kụ ịyal iloghi nyina ị́moogh, pọ nyina ketue ni eḍighi oreeny phọ ịduon mị aḍighi bọ. Ḅịle kẹn, nyina ẹḅeni ẹeḅaraph phọ ẹphen mọ tuphuronu ameel asuma ọphiiny, pọ Ẹnaan keḍighi ni ịngo inyina.

²² Nyina ẹmoogh ni omeeraam, pọ ịyaar lọ nyina ẹlom esi ịiḅereghi nyina kẹmoogh ni.”

Aḍipuru olegheriom ịikpo phọ ịpe ạJizos ạsighe bọ kụ raḍighinom

²³ Kụ ạJizos ạḅile aḍigh Otu Ịiḅereghi phọ rạtughemi ghan we, kụ ạbuo ạrumhu ariil ạrikia phọ rꞌikumoor awe phọ uru ni ọteeny nyọdi, kụ opuru mọ, “Nạ ụsighe ịghen ịikpo kụ raḍighinom ghan bọ ịphen phọ? Ạnhian kụ ạngo bọ nyịna ịikpo oḍighinom ịphen phọ?”

²⁴ Kụ ạJizos ạḅeni bịdi mọ, “Mị kipuru aani inyina ḍiniin aḍipuru ạgbagh, kụ nyina ẹphagharanaan, pọ mị kịḅeni ni inyina ịikpo phọ mị ạsighe bọ kụ raḍighinom ghan bọ.

²⁵ Ịikpo phọ ạJon awurom ghan bọ we mụum mọ ịḍua ẹghen kụ eru — esi Ẹnaan ḍụghum, kụ esi oye?” Kụ aḍipuru phọ ạḍien ẹsighe ọogbaghanaan ịlo kọpagharanaan ẹlogh ogbo phọ ạbidi mọ, “Yira ọḅem mọ ịḍua esi Ẹnaan, pọ ọdi kạḅem mọ, ‘Iḍighi bọ ika kụ nyina nyọdi ímeeraam bọ?’

²⁶ Kụ yira ọḅem mọ, ‘Ịḍua esi awe,’ pọ rokiilaan we phọ, ịdi eḍighi bọ oomo awe mọsighenom mọ ạJon phọ oyil Ẹnaan ni.”

²⁷ Kụ bịdi ọphagharanaan Jịzos mọ, “Yoor úlegheri.” Kụ ọdi ạḅeni bịdi mọ, “Mị kẹn inyina rị́ḅeni ịikpo phọ mị ạsighe bọ kụ raḍighinom ghan bọ ịphen phọ.”

Aḍidogh ịlo ịyal ạnmuny

²⁸ “Nyina regbi ghan ika? Oniin oye ạrol li dị ạmoogh ịyal ạnmuny, kụ ọdi ạghi ạḅeni ọḅel phọ mọ, ‘Mọony ạmi, kịa rodon pạ ozo ireeny amiim mọ ạmi aḍighi oḍighi.’

²⁹ Kụ ọdi mọ, ‘Mị rạ́wa ọghi.’ Kụ íbia iboom kụ anme ịitughian ọdi ạghi.

³⁰ Kụ ọde phọ ạghi ạtuugh igina phọ ạḅeni aani nyọori phọ ọony phọ ọdi. Kụ ọphon mọ, ‘Oye phọ, mị kạki ni’, kụ ọ́ghi.

³¹ Sịphe ịyal phọ ạbidi ọghen kụ aḍighi ịpe ọde phọ ọdi rạwa bọ?” Bịdi ọḅeni nyọdi mọ, “Ọḅel phọ.” ẠJizos ạḅeni bịdi mọ, “Mị ạkar rịḅeni ghan inyina mọ ạbubonyiom iisogh phọ rꞌabulhiom ẹmha phọ kụ kịphur inyina oḍigh ọmar phọ kꞌẸnaan.

³² ẠJon aru oḍeenaan anyina egey eḍighinom ịyaar, kụ nyina ímeeraam nyọdi. Ạbubonyiom iisogh phọ rꞌabulhiom ẹmha phọ kụ umeeraam nyọdi. Nyina ẹmiin bọ ni ịphen phọ, uḍighi ika kụ nyina íkiton bọ esi ịkaraph phọ anyina ímeeraam nyọdi?”

Aḍidogh ịlo awe dị ọḅogh ozo ireeny amiim ọlogh ḍịghaagh

³³ “Ịnaghan ḍịnon aḍidogh. Oniin uwotu ạrol li, dị aḅeph ozo ịizupha ireeny amiim kụ aghoony akitonom, kụ aguph esi omiim ghan iimuma phọ, kụ ạlogh ogbogo dị kọtol ghan okori ozo phọ kụ ạḅogh ozo phọ ạlogh ḍịghaagh abuḅephom iizo mọ oḍighinaan ghan nyịno, kụ ạḍua agheel ẹnon ẹmha.

³⁴ Kụ rẹteeny mem ibugha phọ kụ arom rẹbene mọ ọghi ọteeny bụphe roḍighi ghan bọ ozo phọ ophin bin mụo ọno.

³⁵ Kụ awe oḍighi phọ osiph rẹbene phọ ọdi, okuphogh nyoniin, oghiigh nyoniin, oroḅol ikpo nyoniin.

³⁶ Ọdi ạḅile kẹn arom rẹbene apelom bụḅel phọ, kụ awe oḍighi phọ ọḅile kẹn ọtuugh igina phọ oḍighi.

³⁷ Kụ ekureriom mọ, ọdi arom mọony ọdi mọ ạghi aani mọ, ‘Bịdi kokueni ni mọony phọ ạmi.’

³⁸ Kụ mem dị bụphe roḍighi bọ ozo phọ ọmiin bọ mọony phọ, uupuruan mọ, ‘Ọphon kụ kale bọ erua phọ ọdi. Itu oghiigh, kụ oziton ozo phọ ọdi ạar.’

³⁹ Kụ bịdi osiph nyọdi ọḍuanam pạ ozo phọ, kụ oghiigh.

⁴⁰ “Mem dị uwozo phọ katu bọ, ọdi kaḍighi bọ ika we oḍighi phọ ạbuphe?”

⁴¹ Bịdi ụḅeni nyọdi mọ, “Ọdi kaagulemi ni bụkaraph awe oḍighi phọ ạbuphe, kụ ạḅogh ozo phọ ạlogh ḍịghaagh ạbunon, dị ẹteeny mem ibugha phọ kọngo ghan bin iimuma phọ mụo ọdi.”

⁴² ẠJizos ạḅeni bịdi mọ, “Nyina kạ̋al aani ghan ịphen phọ ọge bọ pạ Ạḍinya Iigbia phọ mọ, “‘Ẹko phọ ạbuloghom ruutu phọ oghel bọ kụ mẹḅile eḍighi ẹko ogbo. Ọmoogh-we phọ kụ aḍighi ịduon kụ eḍighi ni iikia riḍien ayira’?

⁴³ “Ịduon kụ iḍighi kụ mị rịḅeni ghan inyina mọ kạar inyina ọmar phọ kꞌẸnaan kụ ọngo we dị komuum igey iimuma. [

⁴⁴ Tọrobo oye lọ ameelom ḍighiigh phọ ẹphen kabunughian ni ạmadan, kụ eḍighi ịyaar dị ḍighiigh phọ kụ emeelom oye, kẹgbe ni nyọdi etene ịisaar.]”

⁴⁵ Kụ mem dị ạbuo ạrumhu ariil ạrikia phọ rꞌaFarisi phọ ọnaghan bọ sidogh phọ ọdi, bịdi uloghoma ni mọ ịphen phọ ọdi ạḅem ghan ạkpulughiom bụno.

⁴⁶ Bịdi oogonoghian Jịzos osiph kụ ọwile, loor oghiilaan aḍita awe phọ, ịdi eḍighi bọ bịdi mọsighenom mọ ọdi oyil Ẹnaan ni.