Matiu 2 - Ạḍinya Iigbia

Awe olegheri-ịyaar otu oḅeton ạJizos

¹ Ụmar Jịzos ẹpe Bẹtilihem eelhe aJudia, mem mọ ọpo ạHerod kụ ạda bọ. Íbia bịn awe olegheri-ịyaar ọḍua ẹpe erumuḍio phọ remite ghan bọ kụ oru Jeruselem,

² kụ opuru mọ, “Odi ẹghen ọpo ọmar bọ ọda ạbuo aJu phọ? Yoor mọmiin ẹenaan phọ ọdi ẹpe erumuḍio phọ remite ghan bọ, kụ otu bọ ooseeny ọdi.”

³ ẠHerod ọdaam ẹmha phọ rọnaghan ịphen phọ bịn ẹeḅaghami ologhi ọdi, rꞌiloghi oomo ạbuo aJeruselem.

⁴ Kụ ọdi aakpomoghi oomo ạbuo ạrumhu ariil ạrikia phọ rꞌạbutughemia iilogh phọ kụ apuru bịdi mọ, “Ẹghen kụ ẹdi kọmar bọ Kraist phọ?”

⁵ Kụ bịdi ọḅeni nyọdi mọ, “Ẹpe Bẹtilihem eelhe phọ aJudia. Oyil phọ Ẹnaan ạge ịduon mọ,

⁶ “‘Nạ ạBetilihem, ẹpe eelhe phọ aJudia, nạ kẹ́bam esi ikpolom ạramha phọ aJudia. Esi ạna kụ ẹdi oḍiemiom kạḍua amite, dị kạda we phọ ạmi Ịzirel.’”

⁷ Kụ ạHerod ạmagh we olegheri-ịyaar phọ esi ịbooghian apuru kụ bịdi ọḅeni nyọdi ọdo phọ amem mọ ẹenaan phọ emite bọ.

⁸ Kụ ọdi ạḅeni bịdi mọ, “Ịki Bẹtilihem ẹmaar ẹwa ẹmiin esi phọ ọmar bọ mọony phọ, mẹmiin, kụ eru ịḅeni ịmi, ọbo mị ạghi aani aaseeny nyọdi.”

⁹ Kụ awe olegheri-ịyaar phọ rọnaghan bọ ịpe ọdaam ẹmha phọ ạghaaph bọ, kụ ọḍua. Ẹenaan phọ bịdi ọmiin bọ ẹpe erumuḍio phọ remite ghan bọ iḍiemiom ni bịdi, tụtu eru ẹmeera ạnyu otu phọ ọbumoony phọ ạrol bọ.

¹⁰ Mem dị bịdi ọmiin bọ mọ ẹenaan phọ mẹmeera, bịdi ụmoogh ni iboom iboh.

¹¹ Kụ bịdi oḍigh otu kụ ọmiin ọbumoony phọ rꞌaMeri onhiin phọ ọdi kụ okpuḍughian ooseeny nyọdi; kụ okpenyon rukuru ạbidi kụ ọngo nyọdi gol, rꞌạfrankinsens, rꞌamaa.

¹² Ẹnaan ịphur ri bịdi rụru esi ạmalha mọ kúḅula mun kꞌạHerod kụ bịdi okiton ẹnon eten ogheel ẹmha ạbidi.

Oghiil okpetenaan ogheel Ijipt phọ

¹³ Awe olegheri-ịyaar phọ rogheel, kụ ọokpaany Ọmoogh-we phọ aru ạteeny Jọsef ụmalha kụ ạḅeni mọ, “Ḅetenu ạsighe ọbumoony phọ rꞌonhiin phọ asumanam agheel Ijipt, kụ ạrol ẹpe tụtu mị ạmagh nyịna. ẠHerod kạwa ni mọony phọ ịlo oghiigh.”

¹⁴ Kụ ạJosef aḅetenu ḍughul ạsighe ọbumoony phọ rꞌonhiin phọ agheelom Ijipt,

¹⁵ kụ ạrol ẹpe tụtu ạHerod amugh. Ịphen phọ imite omuneniom ikpo ọnhu phọ Ẹnaan oyil phọ ọdi ạḅem bọ mọ, “Mị kạmagh ni Mọony phọ ạmi mọ ạḍua eelhe Ijipt agheel.”

Ọzeeghi ịbam ạnmuny phọ

¹⁶ Mem dị ạHerod alegheri bọ mọ awe olegheri-ịyaar phọ mobi nyịno, rꞌọghagh ologhi kụ arom we mọ ọghi Bẹtilihem rꞌoomo ạramha phọ ekoom bọ ọzeeghi lephiri ạnmuny egbi bụlo mọman ịyal ạsia kụ esoorom. Ọdi ạsighe mem mọ ọpo awe olegheri-ịyaar phọ ọḅeni bọ nyọdi mọ ọmiin ẹenaan phọ kụ alegheriom bọ.

¹⁷ Ịphen imuneniom ni ịpe aJerimaya oyil phọ Ẹnaan ạghaaph bọ mọ,

¹⁸ “Ẹpe Rama, ụnaghan ni ẹḍogh dị rẹlooghi rꞌiḅeleghu rꞌọto. ARechel kụ ramoghi ghan nmụny ọdi dị momuneen, kụ ómeera mọ ọodereghi nyịno.”

Ọḍua Ijipt origheel phọ

¹⁹ ẠHerod romugh bọ kụ ọokpaany Ọmoogh-we phọ ạḅile ạteeny Jọsef ụmalha ẹpe Ijipt,

²⁰ kụ ạḅeni mọ, “Ḅetenu ạsighe ọbumoony phọ rꞌonhiin phọ aḅulonom eelhe Ịzirel, ịdi eḍighi bọ bụphe ọwa bọ oghiigh ọony phọ momuughu.”

²¹ Kụ ạJosef aḅetenu, ạsighe ọbumoony phọ rꞌonhiin phọ aḅulonom eelhe Ịzirel.

²² Mem dị ọdi ạnaghan bọ mọ Ạrkelaos mạsighe dọl ạHerod ọde phọ ọdi rạda Judia, ọdi aghiilaan ni ogheel ẹpe phọ. Kụ roroma nyọdi ụmalha, kụ ọdi agheel ẹpe Galili

²³ arugh ẹmha dị oghol mọ ạNazeret. Ịphen phọ imite omuneniom ịpe ariil phọ Ẹnaan ọghaaph bọ ịlo aMesaya phọ mọ, “Kokol mọ ọdi ọlo ạNazeret.”