Matiu 19 - Ạḍinya Iigbia

ẠJizos ạkaaph ịlo ọgbaranaan olhom rꞌạnir

¹ ẠJizos rọmadan bọ ọghaaph phọ ọphon, kụ ạḍua Galili ạghi aḍigh eelhe aJudia, ẹpe ẹḅeenyom Ọphiiny ạJodan.

² Aḍita awe ụtuan ni nyọdi kụ ọdi aakonom bụphe úmoonogh bọ.

³ Kụ buniin aFarisi phọ uru ni ọteeny nyọdi ịlo ọnaghan ọnhu ọdi kụ opuru mọ, “Ẹkpianaan ni lọ oye kạtuan tọrobo tọrobo ịyaar bịn aseere ạnir ọdi ḍụghum?”

⁴ Kụ ạJizos mọ, “Nyina kạ̋al ghan mọ kꞌẹḅel egbiom mọ, Ẹnaan ẹlhem we, ẹya rꞌelephiri,

⁵ kụ ẹḅem mọ loor ịduon phọ kụ ẹdi oye kạtuan ạgbatanaan ọde rꞌonhiin ọdi, kụ ạḅophan rꞌạnir ọdi, kụ ịyal phọ ạbidi koḍighi iniin iphulupul?

⁶ Esi ịduon phọ bịdi kóḍighi mun ịyal, koḍighi nyoniin. Bụlo Ẹnaan mẹḅophoghi, oye kụ́gbarion ghan.”

⁷ Kụ aFarisi phọ opuru nyọdi mọ, “Iḍighi bọ ika kụ aMozis ạlogh bọ ni ologh mọ oye lọ aseere ạnir ọdi ạngoom ghan ḍịnya ọgbaranaan?”

⁸ ẠJizos ạḅeni mọ, “AMozis ạtuan ịikpara iloghi phọ anyina kụ ameeraam bọ mọ isereghi ghan nmạriir phọ anyina. Ẹḅel egbiom mọ ị́tol ghan ịduon.

⁹ Kụ mị rịḅeni ghan inyina mọ oye lọ aseere ạnir ọdi, dị ụ́tuan olhe ẹmha, kụ aphin ọnon, pọ ọdi malhe ẹmha.”

¹⁰ Ạbumatuan phọ ọdi ụḅeni ni nyọdi mọ, “Ịphen kụ eru reten apinien, pọ ị́kpianaan ophin ghan ạnir.”

¹¹ ẠJizos ạḅeni bịdi mọ, “Ịphen mị mạḅem bọ, kị́lo oomo aweye, emuton bụphe Ọde phọ ạmi ạngo bọ mọ ọnaghan phọ.

¹² Buniin iphoneen awe odi ni dị ọmaram ni ịdipho, kụ buniin odi ni dị awe kụ uḍighi, kụ buniin odi ni dị ụ́wa ophin ạnir, loor esi ọmar phọ kꞌẸnaan. Oye lọ katue ni ạnaghan ịphen phọ ạnaghan ni!”

ẠJizos ạngo ọghor ịbam ạnmuny

¹³ Kụ ụsighe ni ịbam ạnmuny oruomonaan Jịzos, ịlo ọdi kạḅam rạghaagh ọdi rụmhu ạbidi kụ ạaḅereghi; kụ ạbumatuan phọ ọḅaam we phọ ạbuen phọ.

¹⁴ Kụ ạJizos ạḅem mọ, “Imeera ịbam ạnmuny phọ oru ụteeny ịmi. Kémirighan bịdi. Ọmar phọ kꞌẸnaan ọlo ọdo phọ ạbuen phọ.”

¹⁵ Kụ ọdi ạḅam rạghaagh phọ ọdi rụmhu phọ ạbidi, kụ ạḍua sịphe.

Ịlo oniin onyugheel ọolha

¹⁶ Kụ oniin onyugheel ọony aru ni ạteeny Jịzos apuru mọ, “Ogey ọtughemia, mịna kaḍighi bọ eeghe egey ịyaar kụ ạmoogh aani ghuḍum kꞌagee-pọ?”

¹⁷ Kụ ọdi ạḅeni nyọdi mọ, “Uḍighi ika kụ nạ ughol bọ ịmi mọ ogey oye phọ? Ogey oye ólho emuton Ẹnaan bịn. Sịen dị nạ rạwa bọ ọmoogh aghuḍum, pọ kooko iilogh phọ!”

¹⁸ Kụ oye phọ apuru nyọdi mọ, “Ịghen?” Kụ ạJizos mọ, “Enu kạ́ko, ẹmha kále, imi kámi, ịkaraph ạsiagba kạ́gbaanaan oye,

¹⁹ ọde rꞌonhiin lọgh eegu kụ ạphomoghian ọnon oye ịdipho aloor phọ ạna.”

²⁰ Kụ onyugheel ọony phọ ạḅeni nyọdi mọ, “Kꞌẹghoroghor ạmi, mị raako ghan ni oomo phọ iilogh phọ ịphen. Eeghe ẹnon ịyaar kụ isughanaan ịmi oḍighi?”

²¹ Kụ ạJizos ạḅeni nyọdi mọ, “Nạ rạwa oseleman, pọ keel aalhaghi oomo phọ ịpe nạ ạmoogh bọ ạsighe ikpoki phọ ạngo rukulom, kụ nạ kạmoogh ni ẹelha ẹpe kꞌạke, kụ aru ụdaph ịmi.”

²² Kụ onyugheel ọony phọ rọnaghan ịphen phọ bịn akiriri, ịdi eḍighi bọ ọdi ạmoogh ni eboom ẹelha, kụ ạpham ọto kụ agheelom.

²³ Kụ ạJizos ạḅeni bụmatuan phọ ọdi mọ, “Mị ạkar rịḅeni ghan inyina mọ ẹkparanaan ịikia ọolha oḍigh ọmar phọ kꞌẸnaan.

²⁴ Mị ạḅile kẹn rịḅeni ghan inyina mọ edugh ghụn ni dị ạkamel kạbol epogh ạlaga epu dị ọolha kaḍigh ọmar phọ kꞌẸnaan.”

²⁵ Mem dị ạbumatuan phọ ọdi ọnaghan bọ ịphen phọ, ịphughanam ni kụ eḍigh ḍiigu esi ạbidi, kụ opuru mọ, “Ạnhian kụ ẹdi kọpel bọ otene?”

²⁶ Kụ ạJizos aphogh ni bịdi kụ ạḅem mọ, “Ịphen phọ ídughanaan oye, kụ oomo ạraraar edughanaan ni Ẹnaan.”

²⁷ Pọ kụ amem dị aPita ạḅeni nyọdi mọ, “Yoor phọ ạbuen mọwile bọ oomo ạraraar phọ kụ rọdaph bọ nyịna kọmoogh eeghe?”

²⁸ Kụ ạJizos ạḅeni bịdi mọ, “Mị ạkar rịḅeni ghan inyina mọ mem omoom ọmar phọ ọpo Ọony phọ Oye kạtolom bọ ạgada ọdaam ẹmha eghuan phọ ọdi, nyina phọ ạbuen rịdaph bọ ịmi kẹtolom aani ḍioph rꞌịyal ạsigada ọdaam ẹmha, kụ eegbo ịiruen ẹngo ḍioph rꞌịyal arughughun phọ Ịzirel.

²⁹ Kụ tọrobo ọlo mạwile ruutu rꞌabumor, rꞌabumarani, rꞌọde, rꞌonhiin, rꞌạnmuny, rꞌarere loor esi aḍien phọ ạmi, konmoom ni nyọdi okuron opuemiom ịdipho phọ kụ ọḅaram ghuḍum kꞌagee-pọ.

³⁰ Kụ ịbadi ạbudi oḍia ghisigh koḅula ni ọman, kụ bụphe odi bọ ọman phọ koḍia ni ghisigh.”