Matiu 17 - Ạḍinya Iigbia

ẠJizos anmia

¹ Odiiny aḍughul-otu reten, kụ ạJizos ạtuugh Pita rꞌaJems rꞌạJon umor phọ ọdi bịn ạmagh kụ aḍiemiom bịdi ọghi ọsiiny eegum dị ẹkel ạnyu.

² Kụ ọdi anmia pạ aghisigh phọ ạbidi, kụ arisigh ọdi ạmu ịdipho erumuḍio, kụ ibura phọ ọdi ekitonu ẹḅaal forororo ịdipho ạḍiḅaal.

³ Kụ bịdi ọmiin Mozis rꞌIlaija dị rọkaaphan rꞌọdi.

⁴ Kụ aPita ạḅeni Jịzos mọ, “Ọmoogh-we, ịduon yira odi bọ sịen, mọ nạ kameera ni ọbo ẹnighe ni dị yoor kọlogh ịraar arogbogo, oniin ọlo ạna, oniin ọlo aMozis, kụ oniin ọlo Ilaija.”

⁵ Ọdi odi rạkaaph ghan kụ ọotu dị rạmu asoorom bịdi aghoph, kụ ẹḍogh ẹḍua pạ ọotu phọ, kụ ẹḅem mọ, “Ọphon kụ ogina Ọony ạmi dị mị ạphomoghian, ọpo ạkar bọ ụḅeeraan ịmi iboom. Ịnaghanan nyọdi.”

⁶ Kụ mem dị ạbumatuan phọ ọnaghan bọ ẹḍogh phọ, bịdi uḅololo ni, kụ iḍighi ni ruugu esi ạbidi.

⁷ Kụ ạJizos aru ạḅogh bịdi kụ ạḅeni mọ, “Iḅerenu, kékiilaan.”

⁸ Kụ bịdi opoophe ghisigh ạbidi bịn ọnon oye ụ́miin mun, emuton Jịzos.

⁹ Ịdipho bịdi ọḍua bọ ạnyu eegum mọ rosoor, kụ ạJizos ạto ạḅeni bịdi mọ, “Kẹ́kaaph ịpe nyina ẹmiin bọ ẹḅeni oye, tụtu Ọony phọ Oye aḅetenu esi aḍuugh phọ.”

¹⁰ Kụ ạbumatuan phọ opuru nyọdi mọ, “Iḍighi ika kụ ạbutughemia iilogh phọ ọḅem bọ mọ Ilaija kụ kạpur atu phọ?”

¹¹ Kụ ạJizos mọ, “Igey ni, Ilaija kụ kạpur atu ạasa oomo ạraraar.

¹² Kụ mị rịḅeni ghan inyina mọ Ilaija maru ni, kụ bịdi nyọdi elegh ụ́logh, kụ uḍighi ni nyọdi ịlo ẹḅeeraan bịdi. Ịdipho kẹn kụ ẹdi kọmiine Mọony phọ Oye.”

¹³ Pọ kụ amem dị ạbumatuan phọ ọnaghan mọ ọdi ạghaaph ịlo ạJon oburogh mụum mọ kụ ạḅeni bọ bụno.

ẠJizos aakonom mọony dị ọkaraph uwaloor ạrol ẹmhu

¹⁴ Bịdi otu bọ ọteeny ḍita awe phọ, kụ oniin oye aru akpuḍian ghisigh ạJizos kụ ạḅeni mọ,

¹⁵ “Oye phọ, nmạ mọony phọ ạmi ighirigiir. Ọdi rasiphi isughuna iboom. Rạ́gba ghan mem omeel osuma ologhi ạnian rꞌologhi ạmuum.

¹⁶ Mị ụsighe nyọdi aruomonaan bụmatuan phọ ạna, kụ bịdi útue uukonom.”

¹⁷ Kụ ạJizos ạḅem mọ, “Sey, ọphon phọ, ọghen ọdo ọkaraph oghiil dị omeeraam ụ́moogh! Mịna rꞌanyina kọḅile ọtolan ika? Mị kạḅile ạkparam ika esi anyina? Ịsighe mọony phọ iruom.”

¹⁸ Kụ ạJizos ạḅaam ọkaraph uwaloor phọ, kụ ọkaraph uwaloor phọ amite loor ọony phọ ạḍua. Mem mem mọ ạmuphe bịn ọony phọ aḍum.

¹⁹ Kụ ạbumatuan phọ oru ọteeny Jịzos esi ọman, kụ opuru mọ, “Iḍighi ika kụ yoor útue bọ uporogh ọkaraph uwaloor phọ?”

²⁰ Kụ ạJizos ạḅeni bịdi mọ, “Loor ẹmoogh omeeraam mọ anyina. Mị ạkar rịḅeni ghan inyina mọ eḍighi ịyaar dị nyina ẹmoogh omeeraam dị aghom ịdipho ekpo ạmustad kụ ẹḅeni ẹeḅaraph phọ ẹphen mọ, ‘Tuphuronu ạghi ẹnon esi,’ bịn kẹtuugh ni ịdipho eḍighi. Ịyaar dị kịkparanaan inyina ílho. [

²¹ Ịnon ịikpo dị kọsighe kụ oporoghom ọdo uwaloor phọ ọphon ílho, emuton ịiḅereghi rꞌọkaagh ẹḍogh.]”

ẠJizos ạḅile ạkaaph akol ḍuugh phọ ọdi

²² Ạbumatuan phọ roru Galili ookpomoghan, kụ ạJizos ạḅeni bịdi mọ, “Kọḅogh ni Mọony phọ Oye ọngo ịikpo awe,

²³ kụ bịdi okiigh nyọdi, kụ roghiigh nyọdi ḍughul otu dị kemuneniom ịraar kụ ọdi aḅetenu esi aḍuugh phọ.” Kụ ikpo ọnhu phọ ịphen ẹngo bụmatuan phọ oboom ọto.

Ịlo iisogh Otu Ịiḅereghi phọ

²⁴ Mem dị ạJizos rꞌạbumatuan phọ ọdi osi Kạpaniom, bụphe rọbonyi ghan bọ iisogh ịsiphe Otu Ịiḅereghi phọ ụteeny ni Pita kụ opuru mọ, “Ọtughemia phọ anyina rasogh aani ghan ni iisogh Otu Ịiḅereghi phọ ḍụghum?”

²⁵ Ọdi ạphagharanaan mọ ii. Kụ aPita roḍigh ologhi otu, bịn ạJizos ạphurom nyọdi apuru mọ, “Saimon, edi aani ika ologhi ạna? Bụanhian kụ rosogh ghan bọ iisogh kọngo bụdaam ẹmha ịsien aḅirini phọ — ạbuo ẹmha phọ ḍụghum, kụ aruuruen?”

²⁶ APita mọ, “Aruuruen.” ẠJizos mọ, “Ọo, pọ ạbuo ẹmha phọ kụ rósogh ghan.

²⁷ Mị ụ́wa lọ yira koḍighi ịlo kepin iloghi awe phọ ạbuen. Esi ịduon phọ, kịa ẹpe ọphiiny phọ atebeeny ḍịḅaph, kụ ẹḅel ena lọ ekpoph ḍịḅaph phọ ạna, pogh pạ ologhi ọnhu phọ ọdi, nạ kạmiin ni ikpoki dị kẹmanam ịlo ạmi rꞌịlo ạna. Kụ ạsighe ạghi asoghom.”