Matiu 15 - Ạḍinya Iigbia

Ịtughemi awe aḍiodiidi

¹ Mem mọ ọpo phọ buniin aFarisi rꞌạbutughemia iilogh phọ ụḍua ni ẹpe Jeruselem oru opuru Jịzos mọ,

² “Uḍighi ika kụ ạbumatuan phọ ạna rọpueghi bọ eḍighinom ịyaar agediidi phọ? Bịdi ụ́kuami uutola rạghaagh kụ ogbi olhe eḍien.”

³ Kụ ọdi mọ, “Nyina ẹḅile reeko ghan eḍighinom ịyaar phọ anyina, uḍighi ika kụ kẹkaaghiom iilogh phọ Ẹnaan?

⁴ Ẹnaan ẹḅem mọ, ‘Ọde rꞌonhiin lọgh eegu,’ mọ kẹn, ‘Oye lọ alhomaan ọde mꞌonhiin, oghiigh ghan ni.’

⁵ Kụ nyina ẹḅile rẹtughemi ghan mọ oye lọ ạmoogh ịyaar lọ kẹngo sụo ọde mꞌonhiin kụ ạḅem mọ nyẹen moogho oseenaan Ẹnaan,

⁶ pọ ọdi kụ́logh mun eegu ọde mꞌonhiin. Ịduon phọ, pọ nyina reḍighi ghan ịdi ikpo ọnhu phọ Ẹnaan ị́man mun ịyaar loor eḍighinom ịyaar phọ anyina.

⁷ Azaya ọ́pioman ịmiin phọ ọdi ạmiin bọ ịlo anyina kụ ạge bọ mọ nyina awe ịyal asinem, kụ ạḅem mọ,

⁸ “‘Ẹnaan ẹḅem mọ awe phọ ạbuen ọsighe ịidoronhu ạbidi bịn kụ rughueniom ghan ịmi, kụ iloghi ạbidi ịkelan ni ịmi iboom.

⁹ Ị́kpianaan dị bịdi ruuseeny ghan ịmi kụ kọtughemi ghan iilogh phọ awe mụdi ịpe Ẹnaan.’”

Ạraraar dị rẹpue ghan oye

¹⁰ Kụ ạJizos ạmagh ḍita awe phọ, kụ ạḅeni mọ, “Ịnaghan ẹḅile elegheri!

¹¹ Ịyaar ílho ghan dị eḍigh sịphe aloor phọ oye kụ kẹpue oye phọ, kụ ịpe ẹḍua bọ ọnhu oye phọ kụ emite kụ rẹpue ghan bọ oye phọ.”

¹² Kụ ạbumatuan phọ ọdi oru opuru nyọdi mọ, “Nạ alegheri ni mọ ịphen nạ ạḅem bọ ẹkagh ni iloghi aFarisi phọ?”

¹³ Kụ ọdi adogh ḍidogh kụ ạḅem mọ, “Tọrobo oreeny lọ Ọde phọ ạmi odi bọ kꞌạke phọ kụ ụ́zuph, kotuphuron ni.

¹⁴ Ịbilenaan we phọ ạbuphe. Bịdi awe ikpom ariḍien dị ọḅem mọ ạbuno koḍiemiom bụnon. Kụ oye ikpom ariḍien aḍiemiom ọnon oye ikpom ariḍien, ịyal phọ ạbidi komeleghu ni osuma ooni.”

¹⁵ Pọ kụ amem dị aPita ạḅeni mọ, “Gbạ ẹmhu aḍidogh phọ ụḅeni aani iyoor!”

¹⁶ Kụ ạJizos ạḅeni bịdi mọ, “Nyina phọ kẹn edi aani ni elegheri ịyaar ịdipho ạbueri phọ!

¹⁷ Nyina ị́naghan mọ ịyaar lọ eḍigh ọnhu reten ghan keḍigh ọkuruḅaka, kụ ọni otoph?

¹⁸ Kụ ikpo ọnhu phọ ịpe ẹḍua bọ sịphe ologhi oye phọ kụ emite kụ rẹpue ghan bọ oye phọ.

¹⁹ Ịsiphe ologhi oye phọ kụ ẹdi ịkaraph ịitughian ẹḍua ghan bọ remite. Ọko enu, olhe ẹmha, olhe ẹmha ạregelenya, imi, ịkaraph ạsiagba, ọopu —

²⁰ ạraraar phọ ịphen kụ rẹpue ghan bọ oye. Olhiom ạraghaagh dị úutola rẹ́pue ghan oye.”

Ịlo omeeraam dị oniin ạnir ạmoogh

²¹ ẠJizos ạḍua ni sịphe phọ, ạghi rạmha dị etuman Taya rꞌaSaidon,

²² kụ ạnir ọlo aKenan, dị arugh eelhe phọ ẹpe phọ aru ạteeny nyọdi kụ ạlho mọ, “Oye phọ, nạ ọony phọ aDevid, seseeny. Ụnma ịmi ighirigiir. Eru ekola ọnyani ạmi kụ rẹmiine ni iboom.”

²³ Kụ ạJizos nyọdi ịyaar ọ́phagharanaan. Kụ ạbumatuan phọ ọdi oru kụ ọoḅereghian nyọdi mọ ḅẹni ạnir phọ mọ ạḍua, mọ ọdi kụ́dapham iyira ịlooghi ọdi.

²⁴ Kụ ọdi ạḅeni mọ, “Ụtuan we Ịzirel dị ọghigh iyool-ịga dị ephe eten kụ mị uru bọ ọphel.”

²⁵ Pọ kụ amem dị ạnir phọ aru akpuḍian ghisigh ọdi kụ ạḅem mọ, “Oye phọ, ụlhoghonaan ịmi ḍịghaagh!”

²⁶ Kụ ọdi mọ, “Ị́kpianaan ọsighe ghan eḍien ịbam ạnmuny, ọngo asuogh.”

²⁷ Kụ ạnir phọ ạḅem mọ, “Oye phọ, igey ni, ọkaraghi asuogh phọ rẹson ghan ịpherepe eḍien phọ ẹgharaghu bọ pạ eeḍian ịdaabili ạburude-otu phọ ạbidi kụ kele.”

²⁸ Pọ kụ amem dị ạJizos ạḅeni mọ, “Nịr phọ, omeeraam mọ ạna ạbugh ni. Ịpe nạ rạwa bọ kemitenaan ni nyịna.” Mem mem mọ bịn ọnyani phọ ọdi aḍum.

ẠJizos aakonom ịbadi awe dị úmoonogh aḍume yogh

²⁹ Kụ ạJizos ạḍua ni sịphe phọ ạghi oogbom Ọphiiny aGalili, kụ ạghi ạsiiny ẹeḅaraph ạrol ude.

³⁰ Aḍita awe ụsighe ni we dị rokpeku, eten ụ́miin, oḍiku yogh rạagha, rokpom ọka, rꞌịbadi ạbunon dị asiloor ị́nighe, orumom oseere ruwol ạJizos, kụ ọdi aakonom bịdi.

³¹ Iḍighi ni iboom iikia esi aḍita awe phọ, mem dị bịdi ọmiin bọ mọ arokpom ọka mọḅile rọḅa, bụo ạraagha phọ momoonogh, bụphe rokpeku bọ mooleeny rotelhe, awe ikpom ariḍien phọ rọmiin eten, kụ bịdi oboom Ẹnaan phọ Ịzirel.

ẠJizos ạperemi eḍien inya ọonir awe

³² ẠJizos ạmagh ni bụmatuan phọ ọdi aakpomoghi kụ ạḅeni mọ, “Igbiririph awe phọ risiphanaan ni ịmi, ịdi eḍighi bọ bịdi mụrolan ịmi ịraar aḍughul-otu, kụ ụ́moogh mun ịyaar ole. Mị kạ́ḅeni bịdi mọ ogheleghu, ọbo bịdi komuzaan ghan bọ ḍuugh ẹpe eten.”

³³ Kụ ạbumatuan phọ ọdi opuru nyọdi mọ, “Iḍighen sịen ẹdala phọ kụ ẹdi yoor kọmiin eḍien dị kẹgbaanyan ḍita awe dị oleeny ịduon?”

³⁴ Kụ ạJizos apuru bịdi mọ, “Nyina ẹmoogh bọ ika iiḅoghoḍi ạbred?” Kụ bịdi mọ, “Oḍual, rꞌịphurukpu ạnmuny ina.”

³⁵ Kụ ọdi ạḅeni we phọ mọ ọrologhu ude.

³⁶ Kụ ạsighe oḍual iiḅoghoḍi ạbred phọ rꞌina phọ, kụ rọngo ḍịseph Ẹnaan, kụ ạparion, kụ ạngo bụmatuan phọ ọdi, kụ ạbumatuan phọ ọngo ḍita awe phọ.

³⁷ Kụ oomo ạbidi ule ni ẹpherogh. Kụ ạbumatuan phọ ọson ipoḍi phọ esugha bọ kụ emuza oḍual arugunum.

³⁸ Kụ bụphe olhe bọ ọman bọ inya ọonir awe, nmạriir rꞌạnmuny ụ́logh.

³⁹ Kụ ọdi ạḅeni ḍita awe phọ mọ ogheleghu, kụ aḍigh oghuugh kụ asul eelhe ạMagadan.