Matiu 14 - Ạḍinya Iigbia

Ịdi oghiigh Jọn oburogh mụum mọ

¹ Mem mọ ọpo ạHerod ọdaam mọ ạnaghan bọ ọdu phọ ạJizos,

² kụ ạḅeni nmụny-otu phọ ọdi mọ, “Oye phọ ọphon ạJon oburogh mụum mọ ni. Ọdi maḅetenu sịphe aḍuugh phọ. Pọ kụ ịdi ịikpo phọ ịphen reḍighi bọ oḍighi phọ ọphon loor ọdi.”

^3-4 Ọdi ạghaaph ịduon esi okaphian oomiigh ịpe ọdi aḍighi bọ. Mem dị meten ọdi ạar Hẹrodias, ạnir aFilip umor ọdi, aphin. ẠJon ạḅeni ghan Hẹrod mọ ị́kpe ịduon ọdi ạsighe bọ ạnir phọ aphin. Esi ọḅaalami ologhi ạHerodias, kụ ạHerod asiph Jọn ạphaḍi ạlogh ikoli.

⁵ Ọdi óghiigh Jọn loor oghiilaan awe phọ, ịdi eḍighi bọ bịdi mọsighenom mọ ọdi oyil Ẹnaan ni.

⁶ Kụ ẹteeny ḍio dị aruuruen oru kꞌạHerod ịlo ọmoogh iboh ọotughianam aḍio phọ ọpo ọmar bọ Hẹrod, kụ ọnyani phọ ạHerodias aru ạgher ịḅa ghisigh ạbidi, kụ ẹḅeeraan Hẹrod.

⁷ Ạtuan ịdipho kụ aghunya ọkuom ọdi ịyaar lọ ọdi ạzua.

⁸ Kụ ọnyani phọ ạdaph oroma onhiin phọ ọdi kụ ạḅem mọ, “Lọgh ẹmhu ạJon oburogh mụum ologhi ẹteleleeny kụ ụngo ịmi.”

⁹ Ọdaam ẹmha phọ ạmoogh ni ọto kụ loor esi iikunya phọ dị maghunyian bọ pạ arisigh aruuruen phọ, kụ ạto ni ạḅeni mọ ọkuom nyọdi.

¹⁰ Kụ ọdi arom oye mọ ạghi asoph ẹmhu ạJon ẹpe otu ikoli phọ.

¹¹ Kụ oye phọ asoph ẹmhu phọ ạlogh ẹteleleeny aruom ọnyani phọ, kụ ọnyani phọ ạsighe ạghiomonaan onhiin phọ ọdi.

¹² Kụ ạbumatuan phọ ạJon ọghi ọsighe ḍizu phọ ọdi ọghi oḍi, kụ ọghi ọghaaph ọḅeni Jịzos.

ẠJizos ạperemi eḍien oogh ọonir awe

¹³ Mem dị ạJizos ạnaghan bọ ịpe emite bọ, kụ ogina ọdi aḍigh oghuugh ạḍua ạghi ekpisi dị enamian. Kụ aḍita awe phọ ọnaghan, kụ ọḍua ẹpe ạramha phọ okiton owol ade ọtuonom nyọdi.

¹⁴ Ọdi rasul bịn ạmiin ḍiboom aḍita awe kụ ạmoogh igbiririph esi ạbidi kụ aakonom bụdi úmoonogh aḍume yogh.

¹⁵ Kụ aḍughul reghul, kụ ạbumatuan phọ ọdi ọghi ọḅeni nyọdi mọ, “Ẹphen kẹ́mha, kụ aḍughul meghul. Ḅẹni we phọ mọ ọghi ẹpe ạsiraaghana phọ ọwa eḍien ogho.”

¹⁶ Kụ ạJizos ạḅeni bịdi mọ, “Ị́kpianaan dị bịdi kọki. Nyina kụ ịngo bịdi ịyaar ole.”

¹⁷ Kụ bịdi mọ, “Ịyaar iyoor ílho sịen, emuton oogh iiḅoghoḍi ạbred rꞌịyal ina.”

¹⁸ Kụ ọdi mọ, “Ịsighe iruom sịen.”

¹⁹ Kụ ọdi ạḅeni we phọ mọ ọrologhu ude sịphe ạroogho phọ, kụ ạsighe oogh phọ iiḅoghoḍi ạbred phọ rꞌịyal phọ ina phọ, kụ aphogh ạnyu ạke, kụ ạngo ḍịseph Ẹnaan, kụ ạparion, kụ ạsighe ạngo bụmatuan phọ ọdi. Kụ ạbumatuan phọ ọdi ọsighe ọngo we phọ.

²⁰ Kụ oomo phọ ạbidi olhe ẹpherogh. Kụ ạbumatuan phọ ọson ipoḍi phọ ịpe esugha bọ kụ emuza ḍioph rꞌịyal ạrigiel.

²¹ Kụ bụphe olhe bọ ụghiom ni oogh ọonir alephiri, nmạriir rꞌạnmuny ụ́logh.

ẠJizos atelhe ạnyu ạmuum

²² Kụ ạJizos ạkpaariom bụmatuan phọ mọ oḍigh oghuugh phọ oḍiemi ghan ḍịeri phọ ạḍighaagh phọ, mọ ọno kạḅeni we phọ mọ ogheleghu.

²³ Kụ rọḅeni bọ ḍita awe phọ mọ ogheleghu, kụ ọdi ạghi ạsiiny ẹeḅaraph ọoḅereghi Ẹnaan. Meghul li, kụ ọdi bịn kụ ạrol sịphe,

²⁴ kụ oghuugh phọ asi ẹpe ogbo ọphiiny, kụ ooloogh rạaḅaghami, ịdi eḍighi bọ oghim ạda bịdi.

²⁵ Kụ rẹteeny eḅon ạḍiroor, kụ ọdi arelhe ạnyu ạmuum mọ rạki ọteeny ạbidi,

²⁶ kụ ạbumatuan phọ ọmiin nyọdi. Kụ asiloor ạbidi eḍighi nyạam nyạam, kụ ọḅem mọ, “Ọlo úlho,” kụ ọlooghi loor aruugu dị asiph bịdi.

²⁷ Kụ mem mem mọ kụ ạJizos ạḅeni bịdi mọ, “Iḅio anyina kíkaph. Mị ni. Kékiilaan.”

²⁸ Kụ aPita ạḅem mọ, “Ọmoogh-we, mụghumo ọkar ạna ni, pọ ụḅeni ịmi mọ telhe ạnyu ạmuum mọ utu ẹpe nạ odi bọ.”

²⁹ Kụ ọdi mọ, “Tue.” Kụ aPita ạḍua sịphe oghuugh phọ asoor, kụ amiigh orelhe ạnyu ạmuum mọ ọghi ẹpe ạJizos odi bọ.

³⁰ Kụ mem dị ọdi ạmiin bọ mọ oghim rakim, aruugu asiph ni nyọdi. Ọdi rạwa oḅi, kụ ạlho ạḅem mọ, “Ọmoogh-we, ụphel ịmi.”

³¹ Mem mem mọ bịn ạJizos asele ḍịghaagh ạpham nyọdi, kụ ạḅeni mọ, “Sey, nạ oye dị omeeraam ụ́manam, iḍighi ika kụ nạ raakia bọ ịikpo phọ ạmi?”

³² Kụ ịyal phọ ạbidi oḍigh pạ ologhi oghuugh phọ, kụ oghim mọ ạpho.

³³ Kụ bụphe ọrol bọ pạ oghuugh phọ ooseeny nyọdi kụ ọḅem mọ, “Igey phọ ni, nạ kụ Ọony phọ Ẹnaan.”

ẠJizos aakonom bụdi úmoonogh ẹpe Gẹnesaret

³⁴ Kụ bịdi ụḅeeny ni ọphiiny phọ osul Gẹnesaret.

³⁵ Kụ awe ekpisi phọ ẹpe ụlogh ni nyọdi elegh, kụ ooromogh sidom okitonom oomo phọ eelhe phọ mọ ọsighe oomo awe dị úmoonogh oruomonaan Jịzos.

³⁶ Kụ ọoḅereghian ghan nyọdi mọ bịdi ọḅogh ghạlamo rꞌạḍimaam ạsuoma phọ ọdi, kụ oomo ạbudi ọoḅoghogh bọ uḍumogh ni.