Malakai 2 - Ạḍinya Iigbia

¹ Ọmoogh-we Oomo Ịikpo phọ rạḅeni ghan bụpinyon rịkia phọ mọ, “Ịphen phọ ọto dị ịngo inyina:

² Nyina ẹmoogh ni oghueni ạmi esi ạraraar phọ ịpe nyina reḍighi bọ. Eḍighi ịyaar dị nyina ị́naghanan ịphen mị rạḅem bọ, pọ mị kironyon ni inyina. Mị katonyon ni rạraar phọ ịpe nyina rẹmoogh ghan bọ ọsighe ọrolom mọ. Kụ ịduon phọ kẹn bịn, mị maronyon ni rạraar phọ, loor esi dị ịtooghi phọ ạmi nyina ị́sighe ị́manami ịyaar.

³ Mị kạliom ni nmụny phọ anyina kụ mị ạsighe rịir ịnam mọ nyina ẹphighironom bọ ẹkia phọ agbul risigh anyina — kụ ịsighe inyina osumeeny ooni ạriir ịnam.

⁴ Kụ nyina egbi olegheri mọ mị kụ ụngo bọ ịtooghi phọ ịphen pịdi ịyo phọ ạmi rꞌariil ạrikia phọ, ẹemara ẹemara phọ aLivai, ẹtol bịn dị úugbonyon.

⁵ “Sịphe ịyo phọ ạmi, mị uguanaan bịdi ghuḍum rꞌịma ạdol, kụ ịphen phọ ni kụ ẹdi mị ạngo bọ bịdi, pịdi bịdi ụlogh ịmi eegu. Riiḍio phọ ịpe phọ bịdi ụkaraghi ni ụlogh ịmi eegu ọḅile uuseeny ghan ịmi.

⁶ Bịdi ụtughemi ghan ni igey ạraraar, kị́lo ị́nighe. Bịdi ụmoogh ni mụḅoph rꞌạmi; bịdi rꞌaloor uḍighi ghan ni ịlo ẹnighe kụ ọḅile ọloghonaan ḍịghaagh bụnon awe ịlo kọbile oḍighi ịkaraph.

⁷ Eḍighi ni oḍighi ariil ạrikia phọ ọtughemi ghan awe ogey olegheri-ịyaar Ẹnaan. Awe ọkpe ghan ọghi ọteeny ạbidi kụ olegheri ogbi phọ ạmi, loor esi dị bịdi kụ abutelhedom Ọmoogh-we Oomo Ịikpo phọ.

⁸ “Kụ ọlo nyịidipho nyina ariil ạrikia phọ mẹḍua esi egey eten phọ. Ịtughemi phọ anyina meḍiemiom ịbadi awe ẹki oḍighi ịpe ị́nighe bọ. Nyina íiko ịyo phọ mị aghiran bọ rꞌanyina.

⁹ Kụ iḍighi kụ mị kaḍighi aani ni ịdi awe phọ Ịzirel kịḅitonaan inyina loor esi dị nyina ị́naghanan mun ogbi phọ ạmi, ḅịle kẹn mem lọ nyina rẹtughemi weye phọ ạmi, nyina répogh ghan weye phọ eniin ephoghom.”

Awe phọ ụ́pamanam omeeraam Ẹnaan phọ

¹⁰ Oomo phọ ayira ụ́moogh oniin ọde ḍụghum? Eniin Ẹnaan kụ ịlhem bọ oomo phọ ayira ḍụghum? Kụ eeghe kụ iḍighi kụ yira oniin rabi ghan bọ nyoniin, ḅịle kẹn eeghe kụ iḍighi kụ yira ọḅitonaan bọ ịyo phọ Ẹnaan eghiran bọ bụrude ạburude phọ ayira?

¹¹ Awe phọ aJuda úuko ịpe bịdi oguanaan bọ Ẹnaan kụ ọḅile oḍighi ịikia ẹpe Jeruselem ḅịle rꞌoomo eelhe phọ. Bịdi mọopu Otu phọ Ọmoogh-we phọ ạphomoghian bọ. Alephiri ạnmuny mophinogh nmạriir dị rọoḅereghi ghan iiruen ạrumugh.

¹² Ọmoogh-we phọ aroph ogbeph oomo ạbuphe roḍighi bọ ịphen phọ sịen ọmar phọ Ịzirel, ḅịle kẹn kúmeera mun bịdi ooḍikuan ọngo inmo phọ eelhe phọ ayira rọngo ghan bọ Ọmoogh-we Oomo Ịikpo phọ.

¹³ Ẹphen ẹnon ịyaar dị nyina reḍighi ghan. Nyina mẹsighe izin anyina bịn emuzeḍiom ọgbanaghi Ọmoogh-we phọ; nyina remoghi ghan keḅeleghu loor esi dị ọdi rạ́sighe mun inmo lọ nyina ẹngo nyọdi.

¹⁴ Nyina epuru ịpe eḍighi bọ kụ ọdi ụ́sighe mun bọ. Ịyaar phọ eḍighi bọ ịduon, ọdi alegheri ni mọ nyina íiko oguanaan phọ ọpo nạ ạngo bọ ạnir phọ ọpo nạ aphin bọ mem mọ ọpo ugheel phọ ạna. Ạnir phọ aḍighi ghan ni ọḅarama ạna, bịn kụ nạ óoko oguan phọ ạna esi ọdi, ghạlamo ịduon nạ aguanaan bọ ni risigh Ẹnaan mọ nạ kạmaar ri ạpam ạnir phọ, mọ nạ kábi nyọdi.

¹⁵ Ẹnaan kụ ẹḅar bọ loor phọ rꞌuwaloor phọ ạna ẹḅophoghiom rꞌọpo ạnir phọ ḍụghum? Ọdi ạtuan eeghe kụ aḍighi bọ ịduon phọ? Ọdi ạtuan ịdi nyina kẹmar nmụny dị ọkaraghi oḍighi weye Ẹnaan. Kụ iḍighi kụ ịmiin mọ oye kụ́tol dị úuko ịpe ọdi aguanaan bọ ạnir phọ ọdi.

¹⁶ “Mị akel li oseere ạnir,” Ọmoogh-we Ẹnaan phọ Ịzirel ạḅem. “Mị akel li mem dị ọnyo anyina aḍighi ịphen phọ ạnir ọdi. Ịmiin mọ oye kúugbonyon ịpe ọdi aguanaan bọ mọ ọno kábi ạnir phọ ọdi.”

Aḍio ịiruen phọ rẹteeny

¹⁷ Mẹpher Ọmoogh-we phọ ọnaghan ọghaaph anyina. Kụ ọlo nyina repuru ghan mọ, “Ika kụ ẹdi ọghaaph ayoor mạpher bọ nyọdi?” Esi ọḅem ghan mọ, “Ọmoogh-we Oomo Ịikpo phọ ragbiom ghan mọ oomo abuḍighinom ịkaraph ọnighe ni; bịdi kụ ọkaraghi ghụn ọḅeeraan nyọdi.” Mụghumo esi opuru ghan mọ, “Ẹnaan phọ ọḅem bọ mọ rasoph ghan iiḅi ịiruen phọ odi ghan ẹghen?”