Maika 4 - Ạḍinya Iigbia

Ịdi Ọmoogh-we phọ kạda oomo aḅirini phọ rꞌẹepho

¹ Riiḍio dị ketu ẹeḅaraph phọ ẹpe Otu Ịiḅereghi phọ ạmeera bọ kụ keḍighi esi dị ephoph epu oomo ịpheri phọ, dị eghoph oomo aroogbolom mọ. Ịbadibadi areelhe kotu ookpomoghan sịphe,

² kụ awe ạbidi kọḅem mọ, “Itu ọghi eegbolom Ọmoogh-we phọ oḍigh ogbogh Otu Ịiḅereghi Ẹnaan phọ Ịzirel. Ịdi eḍighi bọ ọdi kụtughemi iyira ịlo yira koḍighi ghan; yira kotelhe eten phọ ọdi mạsaḅar bọ. Ịyaar phọ eḍighi bọ ịtughemi Ọmoogh-we phọ ẹḍua ghan Jeruselem kụ retu; ịsiphe Zạyon kụ ẹdi ọdi kụ rạḅaanaan weye ọdi.”

³ Ọdi kaagbo ịiruen ạngo reelhe phọ igbo igbogh ịikpo dị edi etumanan rꞌẹekela. Bịdi kọgurogh isiko ạbidi otene iguphom, ịsoph ạbidi otene sịleke ọsam. Areelhe kọ́ki mun ẹgham, kóokolobian mun ịlo elephiri.

⁴ Tọrobo oye kạtol rꞌẹepho ogbo ireeny avain rꞌạfig ọdi, kụ rꞌoye káḍighi nyọdi ịlo aḍiigu. Ogbogh Ọmoogh-we phọ kụ aguanaan ịphen.

⁵ Tọrobo eelhe ooseeny ghan kụ ọnaghanan ẹkaaneen emugh phọ ạbidi, kụ yoor kooseeny ghan ọḅile ọnaghanan Ọmoogh-we Ẹnaan phọ ayoor kꞌagee-pọ kꞌagee-pọ.

Ịzirel kọḍua iiruen ạramha kụ otigheel

⁶ “Amem mọ retu,” Ọmoogh-we phọ ạḅem, “mem dị mị kaakpomoghi weye phọ eniin esi, bụphe mị mạlhiom bọ, bụphe mọmiinom bọ ẹpe iiruen ạramha.

⁷ Bịdi moḍiku rụukunya kụ ọkelan ẹmha, kụ ọlo mị kamitiom ni emoom emiighom rꞌạbuphe osugha bọ kụ bịdi koḍighi egbogh eelhe. Mị kạda bịdi sịphe Eegum ạZayon kꞌamem mọ ọpo kụ kꞌagee-pọ.”

⁸ Kụ nạ ẹmha Jeruselem, esi phọ Ẹnaan rekori ghan bọ weye phọ ọdi ịdipho okoriom iyool-ịga, kẹḅile ni eten ẹkpana ẹmha ọmar phọ ọpo aḍighi bọ ọlo ạna.

⁹ Eeghe kụ nạ amoghi ghan bọ ramitiom iboom? Eeghe kụ nạ rạmiinom bọ mụdi ạnir dị oghunughun rakun? Ịdi nyina ị́moogh bọ ọdaam ḍụghum, kụ ạbuo oromoghiom anyina momuughu?

¹⁰ Iḅeleghu ẹkuph, weye aJeruselem, mụdi ạnir lọ rạmar mọony, loor esi dị nyịidipho nyina kẹbile ẹmha phọ kụ ẹki ẹyaghaghaany esi kụ ẹtol. Kisiphi ni inyina ọghimom ẹpe Bạbilon, kụ ẹpe phọ Ọmoogh-we phọ kịphel inyina rạghaagh ạbumulogh-ḍien phọ.

¹¹ Ịbadi areelhe mookpomoghan ozuom anyina. Bịdi ọḅem mọ, “Itu oogulemi Jeruselem. Yira rọwa ọmiin mọ ẹmha phọ ẹphen eegulaan.”

¹² Kụ areelhe phọ ịphen phọ úlegheri ịdi edi sịphe ologhi Ọmoogh-we phọ. Bịdi úlegheri mọ mookpomoghi bịdi ọliom eniin phọ eḍighinom mọ rọsighe ghan bọ ịbiakpa koru omitiom ọponyon.

¹³ Ọmoogh-we phọ ạḅem mọ, “Weye aJeruselem, ịki ẹlhiom bụmulogh-ḍien anyina! Mị kịngo inyina ịnyaam mụdi aḍilephiri ạnam dị ạmoogh rạphaal okuron rꞌạrada dị eḍighi enaba. Nyina kẹezeghiom ịbadi areelhe, kụ ẹelha phọ bịdi ozironaan bọ kụ ọmoogh, nyina kiruomaan ịmi Ọmoogh-we oomo aḅirini phọ.”