Maika 1 - Ạḍinya Iigbia

¹ Mem dị aJotam, Ehaz rꞌạHezekaya oḍighi bụdaam aJuda, Ọmoogh-we phọ arom ni dom mọ aḍien Maika ọpo ẹmha aMoreset. Ọmoogh-we phọ agananami ni oomo ạraraar phọ ịphen dị egbolomaam Sameria rꞌaJeruselem aḍeenaan Maika.

Omoghinaan aSameria rꞌaJeruselem

² Ịnaghan ịphen, nyina oomo areelhe; ịnaghan ịphen, oomo ạbulo odi sịen aḅirini phọ! Ogbogh Ọmoogh-we phọ kạkaaph ni ịkaraph anyina, Ịnaghan. Ọdi ạtol otu ịiḅereghi ọdi ẹpe kꞌạke kụ rạkaaph.

³ Ọmoogh-we phọ ạḍua esi iigbia ọdi kụ ratu; ọdi kasoor atu kụ atelhe ạnyu ạraaḅaraph phọ.

⁴ Kụ ạraaḅaraph phọ kẹgbo ni ịdipho oba dị ophoghomiom nịan; bịdi keekuan esumughu riḍiiny ịdipho ạmuum dị ạḍua eegbolom kụ raakuan.

⁵ Oomo ịphen kemiteghu ni loor esi dị awe phọ Ịzirel moḍighi ịkaraph ọḅile ọḅaar ẹmhu esi Ẹnaan. Ạnhian kụ ẹdi kọkpalham ọḅaar ẹmhu phọ Ịzirel? Sameria, ẹkpana ẹmha rꞌaloor! Apum odianaan ạnhian esi ooseeny ghan ịkaaghineen ạrumugh phọ edi bọ sịphe Juda? Jeruselem rꞌaloor!

⁶ Esi ịduon phọ, Ọmoogh-we phọ ạḅem mọ, “Mị katene Sameria eḅum asighiigh sịphe ạḍiyaghaghaany ade phọ, esi dị kọzuph ghan iizin ireeny amiim. Mị kaaku ịpherepe iikpe ẹmha phọ ologhi eḍiiny, kụ aguphogh amitiom ephighiom mọ.

⁷ Oomo ịma ịkaaghineen ạrumugh ẹmha phọ kootughuḍi kpiriph kpiriph, tọrobo ịyaar lọ ọngo nmạriir ẹkaraph erelhe ịsiphe otu iigbia phọ ạbidi ạnian kụ kepiemi, kụ oomo igbudu dị ọḅologh keten egu atopha. ASameria ạmoogh oomo ạraraar phọ ịphen osuom arusu ẹnuum ade kụ nyịidipho ạbumulogh-ḍien ạbidi kotool ọkiomaan ẹnon ekpisi.”

⁸ Pọ kụ amem dị aMaika ạḅem mọ, “Loor ịduon phọ, mị kamoghi, ạtol dọl ọto. Oḍeenaan okururu ạmi, mị katelhiom oopho ạrada rꞌẹdaḅa. Mị kagbophoghu ịdipho aghoogh eḍum kụ ạlooghi ịdipho efagara-ẹnun.

⁹ Kótue ookonom oḍighima ạraraar aSameria, kụ rẹki ịdi aJuda kạmiinom iniin phọ ịne. Ophiemi masi rụnhu-aḍibuo aJeruselem rꞌaloor, esi phọ awe phọ ạmi odi bọ.”

Ạmulogh-ḍien rakpekian Jeruselem

¹⁰ Kẹ́ḅeni mụlogh-ḍien ayoor ẹpe Gạt ịlo emeel ayoor; kémeera bịdi ọmiin dị nyina remoghi. Awe ạBet Liafra, iikilighian loor ophugh ịlo oḍeenaan ẹ́moogh mun oḍuom ologhi phọ anyina.

¹¹ Nyina awe aSafir, ịki ekpisi ịbooghian dọl ẹdaḅa rꞌumugholoor. Bụphe odi bọ sịphe Zaanan kómite ẹmha phọ ạbidi loor oghiilaan. Mem dị nyina ẹnaghan dị awe ạBet Ezel romoghi, nyina kelegheri mọ esi ịbooghian ílho sịphe.

¹² Awe aMarot odi kụ rokori ghan ọloghonaan ạḍighaagh, loor esi dị Ọmoogh-we phọ maḍur ịiḅaghami ạkpulom Jeruselem.

¹³ Nyina phọ ạbuphe odi ghan bọ Lakis, iḍur ạrusu phọ ẹkpaariom rughuugh-ude phọ. Nyina ịtuughaany ịkaraph Ịzirel kụ eḍighi ịdi aJeruselem ọpioman.

¹⁴ Kụ nyịidipho, weye aJuda, ịḅeni ẹmha aMoreset Gạt mọ ịmaar ẹrol. Ạbudaam mọ Ịzirel kọ́moogh ọloghonaan ạḍighaagh esi ẹmha Akzib.

¹⁵ Weye aMaresa, Ọmoogh-we phọ kịḅogh ni inyina ạngo mụlogh-ḍien dị kobe ọsighe ẹmha anyina. Arephelegbe-abuḍiemiom mọ Ịzirel kọki kụ ọbooghian ọgbal epogh aḍighiigh Ạdulam.

¹⁶ Weye aJuda, ịsama sịlaal anyina kụ eḍeenaan okururu loor ạnmuny phọ nyina ẹphomoghian bọ. Ạrumhu anyina ekpokolo ịdipho ịlo ạredelhe, loor esi dị kọsighe nmụny anyina rạghaagh anyina ọkimom ẹnon ekpisi ọrolomi ạdol iiruen.