Lịvitikos 9 - Ạḍinya Iigbia

Eeron ạpinyon rịkia

¹ Kụ rẹman ọphaanya aḍughul-otu ịko phọ, kụ aMozis ạmagh Eeron rꞌạnmuny phọ ọdi rꞌikumoor awe phọ Ịzirel mọ itu.

² Kụ ọdi ạḅeni Eeron mọ, “Kịa ạsighe mọony olephiri ạnam dị kọpighironom ẹkia ịkaraph, rꞌodughuna dị kọpighironom ẹkia oguom ạnian, lọ kọ̋opuan loor, aru aseere egbodo Ọmoogh-we phọ.

³ Kụ ạḅeni we phọ Ịzirel mọ ọghi ọsighe ekpe ẹlo ẹkia ịkaraph; rꞌọony ạnam rꞌọony oyool-ọga, ịyal phọ ạbidi eḍighi ịlo mẹman ḍiniin ạlha, lọ kẹ̋epuan loor, ẹlo ịyaar aghuḍum oguom ạnian.

⁴ Ọḅile ọsighe ḍilephiri ạnam rꞌodughuna dị kọpighironom ẹkia ẹboroph. Ẹkia nyẹen kọḅaram ẹlo ịbiakpa dị okirionom mụnum kụ ọpighironaan egbodo Ọmoogh-we phọ ịdi eḍighi bọ Ọmoogh-we phọ kamite aganana aḍeenaan bịdi loor ọdi rodon.”

⁵ Kụ bịdi ọsighe ịinua phọ ịpe aMozis ạgo bọ ạḅeni bịdi, ọpham orumom sịphe ọnhu-aḍibuo Ogbogo phọ, kụ oomo phọ ạbidi oḍuraan ọobeeph ọmeregha egbodo Ọmoogh-we phọ.

⁶ Kụ aMozis ạḅeni bịdi mọ, “Ẹphen phọ kụ ịyaar phọ Ọmoogh-we phọ ạto bọ ịḅeni inyina mọ iḍighi, kụ eegu Ọmoogh-we phọ kemite eganana esi anyina.”

⁷ Kụ ọdi ạḅeni Eeron mọ, “Kịa ẹpe enmeny phọ ạphighiron ẹkia oguom ạnian oselemian aloor phọ ạna rꞌawe phọ ạna, awopha loor ạna, awoph we phọ ạna; ạphighiron ẹkia oselemian aloor phọ, ịdipho Ọmoogh-we phọ ạto bọ.”

⁸ Kụ Eeron aḍuraan ạabeeph atuman enmeny phọ kụ aghiigh nạm mọ ạḍiphe ọdi raseleminaan bọ loor phọ ọdi.

⁹ Kụ ạnmuny phọ Eeron ọsighe ịḅaal phọ oruom nyọdi; kụ ọdi ạsighe ghụnugh ọdi atiom ghan ịḅaal phọ adoghoḍi ruukuna enmeny phọ, kụ ạsighe ịpe esugha bọ aaku eeḍian enmeny phọ.

¹⁰ Kụ ọdi ạsighe ẹnuum mọ, ịkpinyoom mọ rꞌamuupuph phọ azuom bọ nị phọ, aguom nịan sịphe ạnyu enmeny phọ, ạdaph ịpe Ọmoogh-we phọ ạto bọ ạḅeni Mozis.

¹¹ Iphulupul phọ rꞌozu phọ, ọdi ạsighe ạḍuanam sịphe arugbogo phọ, kụ aguom nịan.

¹² Kụ Eeron aghiigh odughuna ẹkia oguom ạnian phọ, kụ ạnmuny phọ ọdi ọsighe ịḅaal phọ ọghiom nyọdi kụ ọdi ạsaraghi akitonom oomo ịigaany enmeny phọ.

¹³ Kụ bịdi ọsighe ẹmhu phọ rꞌitigh iphulupul phọ ọḅogh ọngo nyọdi, kụ ọdi aguom nịan sịphe enmeny phọ.

¹⁴ Kụ ọdi ạsighe mụum aatolom ịpe ọkuruḅaka phọ rꞌaruwol phọ, kụ aguom nịan sịphe ạnyu ịpheri phọ.

¹⁵ Ịphen phọ reten kụ Eeron ạsighe ịinua ịlo ịkaraph ịpe awe phọ amitiom. Ọdi ạsighe ekpe phọ kọpighiron bọ ẹkia ịkaraph phọ awe phọ oḍighi bọ, kụ aghiigh, kụ ạsighe ạphighiron ẹkia ẹlo ịkaraph phọ ạbidi, ịdipho ọdi aselemian bọ loor phọ ọdi.

¹⁶ Kụ ọdi ạsighe ẹnam ẹlo ẹkia oguom ạnian phọ, ạtuugh ịdipho rọpighiron ghan bọ ạphighiron.

¹⁷ Kụ ọdi ạphighiron ẹkia ịbiakpa phọ, kụ akpoph ẹezua ạḍighaagh ịgbieneen ịbiakpa phọ aguom nịan sịphe ạnyu enmeny phọ, ạḅaram ẹkia oguom ạnian phọ nyẹpe ạḍiroor phọ.

¹⁸ Kụ ọdi aghiigh ḍilephiri ạnam mọ rꞌodughuna phọ, ịpe kọpighironom bọ ẹkia ẹboroph phọ ẹlo awe phọ Ịzirel, kụ ạnmuny phọ ọdi ọsighe ịḅaal phọ ọghiom nyọdi, kụ ọdi ạsaraghi oomo ịsiphe enmeny phọ akitonom.

¹⁹ Kụ Eeron ạsighe ẹnuum ạnam mọ rꞌodughuna phọ rꞌẹekpolodum mọ rꞌoomo ịpe ọkuruḅaka rꞌịkpinyoom mọ rꞌamuupuph phọ azuom bọ nị phọ ạbidi,

²⁰ ạsighe ạḅam ạnyu ạramamaam mọ, aguom nịan sịphe ạnyu enmeny phọ.

²¹ Kụ ọdi ạsighe rạmamaam mọ ạgbanyan bịdi ạphighiron ẹkia phọ ẹphen egbodo Ọmoogh-we phọ. Ạramaam mọ rꞌarugbo phọ ịlo Eeron rꞌạnmuny phọ ọdi, ọdaph ịpe aMozis ạto bọ ạḅeni bịdi.

²² Mem dị Eeron mạmadan bọ oomo ạrikia phọ, ọdi aphoophe rạghaagh ọdi asomoriom we phọ kụ ạngo bịdi ọghor, kụ ạḍua sịphe ọdi ạrol bọ kụ ạphinyon bọ rịkia ịkaraph oguom ạnian rꞌẹboroph phọ asoor ude.

²³ AMozis rꞌEeron ụghi ni oḍigh sịphe Ogbogo Ạdol Ọmoogh-we phọ, kụ omite ọngo ḍịseph we phọ; kụ eegu Ọmoogh-we phọ emite eganana esi oomo awe phọ.

²⁴ Egina amem bịn Ọmoogh-we phọ arom nịan dị esoor elhe ẹkia oguom ạnian phọ, rꞌẹnuum mọ ẹrol bọ sịphe ạnyu enmeny phọ; kụ oomo phọ aweye phọ ụmiin ni kụ ọlooghi kụ omeleghu ezuemi.