Lịvitikos 25 - Ạḍinya Iigbia

Esi oḍual ạsia

¹ AMozis ạrol ạnyu Eegum aSainai kụ Ọmoogh-we phọ ạghaaph ạḅeni nyọdi

² mọ ạḅeni we phọ Ịzirel mọ, “Mem dị nyina mesi ẹpe ade phọ mị rịngo bọ inyina, ikori ghan kụ eeko lhạ dị ade phọ kẹkpo.

³ Odiiny ạsia kụ ịdi nyina keḅephogh ghan iizo phọ anyina; odiiny ạsia kụ ẹdi nyina kẹsamagh ghan iizo ịghol phọ anyina, kụ eekpomoghi ghan iimuma phọ.

⁴ Ḍịphe emuneniom bọ oḍual ạsia phọ, aḍighi ḍikpom ạlha dị ade phọ kepooghian oghueniom Ọmoogh-we phọ. Kéḅephogh iizo sịphe ade phọ. Ḅịle kẹn, kẹsamagh iizo ịghol phọ anyina.

⁵ Eḍien lọ ẹbile kụ esiighi sịphe iizo phọ anyina, kẹ́ki ebugha. Ibusi lọ ẹgharaghu sịphe iizo ịghol phọ anyina ụ́sam bọ, kẹ́ki eekoroghi. Ạlha phọ ạḍiphe phọ, aḍikpom ạlha dị ade phọ rọkpoomi de phọ.

⁶ Ade lọ ọkpoomi kụ resoor ghan eḍien, ẹlo anyina rꞌẹlo alephiri rꞌạnmariir ạrebene phọ anyina rꞌẹlo awe lọ nyina ephir oḍighinaan anyina oḍighi rꞌẹlo aruuruen dị rꞌanyina erughan,

⁷ rꞌẹlo ịnam mọ anyina rꞌịnam eḍum mọ: oomo eḍien phọ ẹpe esoor bọ, pọ eḍien ạbidi.

Ạlha oḅula ọmoogh

⁸ “Igbi ghan oḍual amem oḍual ạsia, tụtu inyadi rꞌesugha ạsia.

⁹ Ḍioph aḍughul-otu oḍual ụnwanyu ạlha phọ, ḍio iiwopha phọ, itom oye aphula ọkuodu egbeelom ẹyaal sịphe oomo ade phọ anyina.

¹⁰ Ạlha phọ ạḍiphe emuneniom ooghdi ạsia phọ, ạlha iigbia. Ikori egbeel oomo ade phọ ạḅeni oomo awe phọ mọ ạlha phọ ạḍien phọ, ạlha ẹereegh anyina, ạlha dị tọrobo oye kaḅula ạmoogh, kụ tọrobo ọlo maal ịdipho ẹbene katigheel eghun ạbidi.

¹¹ Ooghdi ạsia phọ eḍighi ghan ẹyaal iboh rꞌọḅaal ologhi ọmoogha aloor. Lhạ phọ ạḍiphe, íbeph ghan ozo; ḅịle kẹn íbugha ghan ẹlo iitena; ḅịle kẹn, íikoroghi ghan ibusi ịghol phọ anyina ụ́samagh bọ.

¹² Ẹyaal iboh ọmoogha aloor phọ ẹphen phọ eḍighi ghan ẹyaal iigbia esi anyina. Nyina kele ịpe iizo phọ emitiom bọ rꞌaloor ạbidi bịn.

¹³ “Lhạ iboh oḅula ọmoogh phọ ạḍien, tọrobo ịyaar ọnon oye lọ nyina egho iḅulemi ghan ẹngo.

¹⁴ Mụghumo nạ ụaale ikpoki matuman ạna, mụghumo nạ ugho ḍịghaagh amatuman ạna ịyaar dị nạ ụ́kpe, kạ́tuan ịdipho bịn aḍighi ịdi ị́nighe.

¹⁵ Ọdaph ọnhu ạsia dị ạlha iboh ọmoogha aloor phọ meten, pọ nạ atue ni ako ịyaar esi amatuman ạna; ọdaph ọnhu ạsia dị esugha, pọ ọdi atue ni aalha nyịna.

¹⁶ Eru mạar dị ạsia phọ mẹbugh, pọ nạ atue ni ạbughe ḍighi phọ; kụ eru mạar dị ạsia phọ kẹ́bugh, pọ nạ atue ni asooromi ḍighi phọ: ịdi eḍighi bọ ịyaar phọ robool bọ ọnhu eḍien dị ade phọ kemitiom.

¹⁷ Oniin ọnyo anyina nyoniin kúḍighi ghan ịlo ị́nighe. Kiilaan ghan Ẹnaan phọ ạna, ịdi eḍighi bọ mị kụ Ọmoogh-we Ẹnaan phọ anyina.

Ịdi kemite lhạ phọ emuneniom bọ oḍual

¹⁸ “Iiko ghan ịtooghi phọ ạmi rꞌịiruen phọ ạmi kụ ẹdaph ghan, ọbo nyina erugh sịphe ade phọ rꞌẹepho.

¹⁹ Ade phọ kesoor ghan ni eḍien dị nyina kele ghan ịpher inyina, kụ etugh ẹpe phọ rꞌẹepho.

²⁰ “Kụ eru mạar dị nyina kepuru ghan mọ, ‘Ḍịphe emuneniom bọ oḍual ạsia phọ kụ yoor ozo kőḅeph ghan bọ, yoor kole ghan eeghia?’ pọ ịnaghan.

²¹ Mị kạseph ni iizo odiiny ạsia phọ anyina kụ esoor eḍien dị nyina kele ịraar ạsia.

²² Ḍịphe emuneniom bọ ọphaanya ạsia phọ kụ ạlha dị nyina keḅephogh iizo. Nyina kele ghan egbaany eḍien phọ tụtu ẹman esugha ạsia, tụtu emoom eḍien phọ anyina ẹnighe olhe. Ile ghan egbaany phọ.

Ạlha dị oḅulemi aruphua

²³ “Ade phọ, ạḍio ạmi. Íbool ghan de phọ kꞌagee-pọ, ịdi eḍighi bọ nyina aruuruen dị erughan rꞌạmi.

²⁴ “Uwo ade kạmoogh ni elhiom ọtagharan oomo ade phọ ọdi aal bọ.

²⁵ Eru mạar dị umor ạna aru uwekulom kụ ạsighe iniin aruphua ọdi aalhaghi, pọ ọnyo asiya ọdi lọ rꞌọdi ọkpulan ạghi ạtanyan ruphua phọ ọdi ịpe ọdi aalhaghi bọ.

²⁶ Eru mạar dị oye phọ ụ́moogh siya dị kọtagharan, kụ ẹḅile ẹnighenom nyọdi kụ ạmoogh ikpoki, pọ ạghi ạtagharan ruphua phọ ọdi.

²⁷ Ọdi agbi aphogh ọnhu ạsia phọ ịpe mẹman bọ kꞌamem mọ dị aalhaghi bọ ruphua phọ ọdi, ạlogh ọḅar ạkpe ạngo oye phọ ọpo ọdi aalha bọ ruphua phọ ọdi, kụ ạtagharanam ruphua phọ.

²⁸ Kụ eru mạar dị ụ́moogh ikpoki dị ẹmanam ọtagharanam, pọ ạraraar phọ ọdi aal bọ ẹrol ḍịghaagh oye phọ ọpo agho bọ, kụ ẹrol ẹteeny lhạ iboh rꞌọḅaal ologhi phọ. Ḍio ẹyaal ọmoogha aloor phọ, pọ ọdi ạsighe ruphua phọ ọdi agho bọ ạghiom ọkaraghi ọḅel ọpo ạmoogh bọ.

²⁹ “Otu lọ ọlogh ologhi ẹmha dị oghoony, eru mạar dị oye aal, ọdi ạmoogh ni elhiom ọtagharan ḍịḅel ạlha phọ emunughan bọ emiigh ḍio phọ aal bọ.

³⁰ Kụ eru mạar dị ọdi ụ́tagharan sịphe ạlha phọ, pọ otu phọ maten aḍighi ọlo oye phọ ọpo agho bọ kꞌagee-pọ, oghiil atum oghiil. Ghạlamo ịteeny ni lhạ iboh rꞌọḅaal ologhi, pọ kúḅulemi ụ́ngo.

³¹ Otu lọ ọlogh ẹmha lọ úkoony úkitonom, uwotu phọ ạmoogh ni elhiom ọtagharan. Kogbi ọdo aruutu phọ ịphen ọloghom rere. Otue ni ọtagharan tọrobo amem. Ẹrol ẹteeny lhạ iboh rꞌọḅaal ologhi, pọ ḅulemi otu phọ ạngo uwo otu phọ.

³² Otu lọ ọlogh ẹmha lọ ọma oseenaan bụo kꞌaLivai, eru mạar dị ọnyo ạbidi aal, pọ ọdi ạmoogh ni elhiom ọtagharan tọrobo amem.

³³ Eru mạar dị oye agho ḍịghaagh ọlo kꞌaLivai otu, pọ bịdi ọmoogh ni elhiom ọghi lhạ iboh rꞌọḅaal ologhi phọ ọsighe otu phọ, ịdi eḍighi bọ aruutu phọ ịpe edi bọ sịphe ạramha phọ eghun phọ aLivai eḍighi ọkaraghi aruphua ạbidi igbo awe phọ Ịzirel.

³⁴ Rere ạroogho phọ ekitonom bọ rạmha ọto kꞌaLivai kóbool, ịdi eḍighi bọ ịpe eḍighi ruphua ạbidi kꞌagee-pọ.

Ịimugh dị otene rukulom

³⁵ “Eru mạar dị umor ạna ameel ekulom dị kátue ạpama loor ọdi, pọ nạ sịghe nyọdi arughom, ịdipho ooruen.

³⁶ Ụ́boor ghan nyọdi ọḅar; ḅịle kẹn, ụ́bughe ghan. Kiilaan Ọmoogh-we phọ, ạwile umor phọ ạna arugh kꞌạna.

³⁷ Ụ́logh ghan ọḅar ikpoki lọ nạ ạale nyọdi; ḅịle kẹn, eḍien lọ nạ ạngo ghan nyọdi, kạ́wa sụo.

³⁸ Mị kụ Ọmoogh-we Ẹnaan phọ ạna, ọpo ạsighe bọ nyịna ẹpe Ijipt ạḍuanam ọngo ạna de phọ aKenan, ḅịle rꞌoḍighi Ẹnaan ạna.

Ịlo osereghi ạrebene dọl ẹereegh

³⁹ “Eru mạar dị umor ạna dị arugh atuman nyịna ameel ekulom kụ ạḅararian loor ạna, kạ́kpaariom ọdi akumu nyịna dịadi ẹbene.

⁴⁰ Ọdi ạrol kꞌạna ịdipho oye lọ ophir ọghianaan ạna rukumuan, kụ arugh kꞌạna. Ọdi ạrol kꞌạna tụtu ẹteeny lhạ ẹyaal okpetenaan ọmoogha aloor phọ.

⁴¹ Kụ ọdi agbi ọgbatanaan ạna, agheel ẹpe eghun kꞌọde phọ ọdi, ọdi rꞌạnmuny phọ ọdi.

⁴² Awe phọ Ịzirel ạnmuny-otu ạmi, bụphe mị ạsighe bọ ẹpe eelhe phọ Ijipt amitiom ạḍuanam. Kébool bịdi ịdipho ạrebene.

⁴³ Kápoghom ghan nyọdi ẹgbagara ekpeḍien. Kiilaan ghan Ẹnaan phọ ạna.

⁴⁴ Nạ rako ẹbene, pọ ko ghan ạnir rꞌolephiri ẹpe ạramha phọ ituman bọ inyina.

⁴⁵ Nyina etue ni eko ẹbene esi aruuruen phọ rꞌanyina erughan bọ, rꞌesi arughunughun phọ ạbuphe rꞌanyina edianaan bọ. Ọdo phọ ạnmuny phọ ạbuphe ọmar bọ sịphe, otue ni oḍighi ruphua anyina.

⁴⁶ Ịsighenom bịdi mọ bịdi erua ạnmuny anyina mem lọ nyina memugh. Bịdi otue ni olhe erua anyina ọsighe oḍighi ịlo ạbidi. Bịdi ạrebene anyina kꞌagee-pọ. Kụ ọlo, ọlo kꞌỊzirel képoghom ghan ẹgbagara ekpeḍien.

⁴⁷ “Eru mạar dị ooruen mꞌoye dị arugh kꞌạna aḍighi ọdaam, kụ umor ạna dị arugh atuman nyọdi ameel ekulom kụ ạsighe loor ọdi aalha ooruen phọ mꞌọpo arugh bọ atuman nyọdi, mꞌọlo eghun ooruen phọ,

⁴⁸ pọ otue ni ọtagharan nyọdi. Oniin umor ọdi

⁴⁹ mꞌumor ọde ọdi, mꞌọony umor ọde ọdi, mꞌọnyo asiya ịsiphe eghun phọ ạbidi atue ni ạtagharan nyọdi; kụ eru mạar dị ọdi katue ni, pọ ọdi atue ni ạtagharanaan loor ọdi.

⁵⁰ Pọ ọdi rꞌoye phọ ọpo agho bọ nyọdi ogbi ọnhu ạsia phọ ịpe ọdi aalha bọ loor phọ ọdi tụtu ẹteeny bọ lhạ ẹyaal iboh ọmoogha aloor phọ. Kọdaph ọnhu ạsia phọ kụ olegheri ọnhu ikpoki phọ ịpe ọdi kạtagharanaan bọ loor phọ ọdi, kụ ogbi ọnhu ạsia phọ ịpe ọdi ạrol bọ kꞌoye phọ, dịadi oye lọ ophir oḍighinaan oḍighi ịpe phọ keḍighom loor ọdi.

⁵¹ Eru mạar dị ịnon ạsia mẹḅaram pạ, pọ ọdi kạḅile ni ạlogh ịnon ikpoki kụ ạtagharanam loor phọ ọdi, ọdaphan esi ọnhu ikpoki phọ ịpe ogho bọ nyọdi.

⁵² Kụ eru mạar dị ạsia ọteeny ạlha okpetenaan ọmoogha aloor phọ ị́bugh mun, pọ ọdi rꞌoye phọ ọpo agho bọ nyọdi ogbighian ọnhu ạsia phọ ịpe esugha bọ, dị mukumu bọ oye phọ, kụ ạtuugh ịdipho aḅulemian oye phọ ịlo ọtagharanam aloor phọ ọdi.

⁵³ Ịdipho oye lọ ophir ọghianaan ạna rukumuan, ịlo ạlha rꞌạlha, ịpe ọdi mụtolan bọ nyọdi; ọde-otu phọ kúpoghom nyọdi ẹkaraph ekpeḍien.

⁵⁴ Kụ eru mạar dị nyọdi ụ́tagharan kụ ẹteeny lhạ ẹyaal iboh ọmoogha loor phọ, pọ mạmoogha loor ọdi.

⁵⁵ Esi ạmi, awe phọ Ịzirel, ạnmuny-otu ạmi bụphe mị ạsighe bọ ẹpe eelhe phọ Ijipt amitiom. Mị kụ Ọmoogh-we Ẹnaan phọ anyina.”