Lịvitikos 24 - Ạḍinya Iigbia

Ịlo ọmaar ophogh ghan ịtozi phọ

¹ Ọmoogh-we phọ ạḅeni Mozis

² mọ ạto ạḅeni we phọ Ịzirel mọ, “Ịsighe mugeny ạmunum oreeny-ọliv dị ọkuami oghum iruomonaan ịmi mụo ọsuom ghan ịtozi phọ, ọbo ạḍiḅaal esoor ghan oomo amem.

³ Eeron kạtol ghan sịphe Ogbogo Ạdol Ọmoogh-we phọ asu ghan ịtozi phọ emiigh dulhe tụtu ẹḅaal ḍịroor egbodo Ọmoogh-we phọ ẹpe ọman ukpe phọ ọkpo bọ osophoghom Igbe Ịyo phọ edi bọ ọgbanaghi phọ. Ọphon phọ ologh dị nyina keeko ghan kꞌagee-pọ, oghiil atum oghiil.

⁴ Eeron kụ kạsighe ịtozi phọ ạḅamaghi ạnyu ịmeremiom ịtozi phọ oḍighinom bọ gol apogh ghan ḍughul rꞌootaany ọbo keḍim ghan bọ.

Ạbred dị ọphighiron ọngo Ẹnaan

⁵ “Ịsighe ḍioph rꞌịyal igbogh ịtoom ẹemor igeny ịgbieneen ịbiakpa ẹgbaghaḍi eḍighi ḍioph rꞌịyal iiḅoghoḍi ạbred.

⁶ Kụ ạsighe ạde ịyal ạsikool, odiiny ịne ḍịkool sịphe ạnyu ịdaabili phọ oḍighinom bọ gol egbodo Ọmoogh-we phọ.

⁷ Kụ ạsighe ịnsens asereghi sịphe ạsikool phọ kụ eḍien phọ eḍighi ghan ịyaar ọsighe ghan ọotughianam, kẹn, kẹḅile ẹtol dịadi ẹkia dị ọḅaram nịan kụ ọphighironaan ọngo Ọmoogh-we phọ.

⁸ Tọrobo aḍio ophooghian Eeron ạmaar ghan ạde rạraar phọ ịlo esi rꞌesi egbodo Ọmoogh-we phọ oomo amem. Ịphen phọ, ịyo dị awe Ịzirel oghiran dị kẹtol kꞌagee-pọ.

⁹ Ịphen ịlo Eeron rꞌạnmuny phọ ọdi, bịdi ọrol esi iigbia kụ ole. Eḍighi ni iboom iigbia, ịdi eḍighi bọ ọsighe bin phọ ạmuen sịphe ẹkia phọ oguom bọ nịan ọngo Ọmoogh-we phọ.”

Eḍeenaan ọliom dị ạsel kụ aaleeny

^10-11 Oniin oye ạrol li dị ạnir ọlo Ịzirel kụ ạmar kụ ọde phọ aḍighi ọlo Ijipt kụ ạdaph we phọ Ịzirel arigheel. Ḍien onhiin oye phọ ughol mọ aSelomit ọnyani phọ aDibri ọlo eghun phọ ạDan. Sịphe ologhi arugbogo phọ, oye phọ ọphon rꞌoye ọlo Ịzirel kụ eeghi elephiri. Ọony ạnir ọlo Ịzirel phọ aafolomi aatuuny ḍien phọ Ẹnaan, kụ bịdi ọsighe nyọdi ọghi ọteeny Mozis,

¹² ọlogh esi dị kopogh ghan kụ okoriom Ọmoogh-we phọ ọḅeni ạbidi ịyaar oḍighinom ọdi.

¹³ Ọmoogh-we phọ ạghaaph ạḅeni Mozis mọ,

¹⁴ “Sịghe nyọdi sịphe ologhi arugbogo phọ amitiom, kụ oomo ạbuphe ọnaghan bọ ịpe oye phọ arunyon bọ ọsighe rạghaagh ạbidi ọḅamaghi ẹmhu ọdi ịlo ọgba omitiom mọ epum ni nyọdi, kụ reten oomo aḍita ookpomoghan phọ kotoḅol nyọdi ikpo.

¹⁵ Ḅẹni we phọ Ịzirel mọ, ‘Tọrobo oye lọ aatuuny Ẹnaan, pọ ịkaraph ọdi ẹmhu ọdi.

¹⁶ Tọrobo oye lọ aafolomi ḍien phọ Ẹnaan, pọ ikiigh ghan oye phọ ọpo. Oomo phọ anyina, itoḅol ghan nyọdi ikpo. Mꞌooruen mꞌọlo ịpa ẹmha phọ dị aafolomi ḍien phọ Ọmoogh-we phọ, pọ ikiigh ghan.

¹⁷ “‘Tọrobo oye lọ ạko enu, pọ ikiigh ghan.

¹⁸ Tọrobo oye lọ aghiigh ẹnam ọnon oye, pọ ạsighe ghan ẹnam ạkpiom; ẹnam erelhian ẹnam.

¹⁹ “‘Eru mạar dị oye kụ ạlogh onyoogbo ọdi ẹgha, pọ ẹgha phọ ẹpe ọdi ạlogh bọ oye phọ kụ ẹdi kọtuugh ọlogh aani nyọdi.

²⁰ Ẹgha irelhian ẹgha, ekpeḍien erelhian ekpeḍien, ọlaay arelhian ọlaay. Ẹgha phọ ẹpe nạ ạlogh bọ ọnon oye kụ ẹdi kọtuugh ọlogh aani nyịna.

²¹ Ọlo aghiigh ẹnam, ạsighe ẹnam ạkpiom; tọrobo oye lọ ạko enu, pọ ikiigh ghan.

²² Ologh phọ ọphon idianaan ni inyina ạbuo ẹmha phọ rꞌaruuruen phọ; ịdi eḍighi bọ mị kụ Ọmoogh-we phọ, Ẹnaan phọ anyina.’”

²³ AMozis rọghaaph ịphen phọ rọḅeni we phọ Ịzirel, kụ bịdi ọsighe oye iitunyian phọ omitenom sịphe arugbogo phọ oroḅol nyọdi ikpo oghiigh. Ịduon kụ ẹdi awe phọ Ịzirel ụdaph ni ologh phọ Ọmoogh-we phọ ạlogh bọ ạngo Mozis.