Lịvitikos 23 - Ạḍinya Iigbia

Ạrayaal phọ

¹ Ọmoogh-we phọ ạghaaph ạḅeni Mozis

² mọ ạḅeni we phọ mọ, “Ịphen kụ ạrayaal dị awe phọ Ịzirel kookpomoghan eniin esi ooseeny Ọmoogh-we phọ.

³ Odiiny aḍio kụ ịdi nyina kekumuan ghan oomo arukumuan phọ anyina. Ḍịphe emuneniom bọ oḍual aḍughul-otu phọ aḍio ophooghian. Ḍio phọ ạḍiphe, ịmoogh ookpomoghan iigbia, kékumuan ghan rꞌẹnum arukumuan sịphe oomo asimarugh phọ anyina.

⁴ Ịphen kụ ạrayaal Ọmoogh-we phọ dị nạ akori agbeel ạmaaghi ịlo amem rꞌamem.

Ẹyaal ọphel otene phọ rꞌẹpe ạbred dị yist ụ́logh

⁵ “Ọḅel ụnwanyu ạlha phọ, ḍioph rꞌinya aḍughul-otu dulhe, ḍio phọ ạḍiphe, pọ aḍio ẹyaal ọphel otene phọ.

⁶ Emiigh kꞌaḍioph rꞌoogh aḍughul-otu ọḅel phọ ụnwanyu phọ kụ ẹdi nyina kéle ghan brẹd dị ologh yist oḍual aḍughul-otu. Ẹphen kụ ẹyaal ạbred dị yist ụ́logh.

⁷ Ḍịḅel aḍughul-otu phọ, nyina ịmoogh ookpomoghan iigbia, kékumuan rukumuan ḍio phọ ạḍiphe.

⁸ Iḍighi ghan ịyaar aghuḍum oguom ạnian phọ oḍual aḍughul-otu, kụ ḍịphe emuneniom bọ oḍual aḍughul-otu ẹmoogh ookpomoghan iigbia, kékumuan rꞌẹnum arukumuan ḍio phọ ạḍiphe.”

⁹ Kụ Ọmoogh-we phọ ạghaaph ạḅeni Mozis

¹⁰ mọ ạḅeni we phọ Ịzirel mọ, “Mem dị nyina ẹghi esi ẹpe ade phọ mị ịngo bọ inyina kụ nyina rebugha riiḍien phọ nyina eḅeph bọ, ịsighe ghan ẹḅel eḍien ibugha phọ anyina ẹghiom oyil ạrikia phọ.

¹¹ Oyil ạrikia phọ kạsighe ni ḍịgba ịbiakpa phọ ạpighiron egbodo Ọmoogh-we phọ, ọbo okori ịloghoma inyina; kụ aḍio ophooghian phọ reten, rẹḅaal kụ ọdi akori ạsighe ạgbanyan.

¹² Ḍio phọ ạḍiphe nyina rẹsighe ḍịgba ịbiakpa phọ rẹphighironaan, ịsighe odughuna lọ mạman lhạ lọ loor kọ̋opuan eḍighinom ịyaar aghuḍum oguom ạnian ẹngo Ọmoogh-we phọ.

¹³ Ịyaar aghuḍum ịbiakpa koḍighinom ghan ịduon. Ịsighe ịyal igbogh ịtoom ẹemor ịgbieneen ịbiakpa dị okirionom mụnum-ọliv oguom nịan egbodo Ọmoogh-we phọ ịdipho ịyaar aghuḍum dị kepur eeḅi eḍu. Ịyaar aghuḍum ịpughol phọ kọḅaram bọ, eniin eeku amiim.

¹⁴ Íle ghan ạbred ịbiakpa, mꞌimoom, mꞌụphoghi ni tụtu nyina mẹsighe ịyaar aghuḍum mọ etuom Ẹnaan phọ anyina. Ọphon phọ ologh dị nyina keeko ghan oghiil atum oghiil sịphe asimarugh phọ anyina.

Ẹyaal ibugha

¹⁵ “Aḍio ophooghian phọ reten rẹḅaal, emiigh ḍio phọ ạḍiphe nyina ẹsighe bọ ḍịgba ịbiakpa ẹghi ẹphighironaan, egbi emuneni ariiḍio.

¹⁶ Remunughan oḍual phọ ariiḍio phọ kụ rẹḅaal, emiigh egbi 50 aḍughul-otu, kụ ẹsighe imoom ịbiakpa eru eḍighinom ịyaar aghuḍum ịbiakpa ẹngo Ọmoogh-we phọ.

¹⁷ Oye ye ạghi kꞌọdi ạsighe ịyal iiḅoghoḍi ạbred dị oḍighinom yist rꞌịyal igbogh ịtoom ẹemor ịgbieneen ịbiakpa, ịlo ọphighironaan. Eḍighi igeny ịgbieneen ịbiakpa dị ọgbaghaḍi ni ọkuami. Ịphen phọ ịḅel iimuma ọphighiron ọngo Ọmoogh-we phọ.

¹⁸ Kụ ạsighe oḍual ạnmuny iyool-ịga lọ mẹman lhạ dị kẹ̋epuan, ẹḅaram rꞌạbred phọ ḍiniin aḍilephiri ạnam rꞌịyal idughuna. Ịphen phọ koḍighinom ịyaar aghuḍum oguom ạnian ọngo Ọmoogh-we phọ, ọḅaram rꞌịyaar aghuḍum ịbiakpa phọ rꞌịyaar aghuḍum ịpughol phọ. Ẹphen phọ ịyaar aghuḍum dị repur eeḅi eḍu egbodo Ọmoogh-we phọ.

¹⁹ Kụ ạsighe eniin ekpe ạphighironom ẹkia ịkaraph, ạḅile ạsighe ịyal idughuna dị mẹman ḍiniin ạlha ạphighironom ẹkia ẹboroph.

²⁰ Kụ oyil ạrikia phọ kạsighe ni ịyal idughuna phọ ạḅaram ạbred ịḅel iimuma phọ ạgbanyan bịdi ạphighiron ẹkia phọ ẹphen phọ egbodo Ọmoogh-we phọ. Ịphen phọ mọphighironaan bọ, ịlo oyil ạrikia phọ. Eḍighi ni iigbia.

²¹ Ḍio phọ ạḍiphe, ịmoogh ookpomoghan iigbia, kékumuan ghan rꞌẹnum arukumuan sịphe oomo asimarugh phọ anyina. Ọphon phọ ologh dị nyina keeko ghan kꞌagee-pọ.

²² “Mem lọ nyina rebugha riiḍien sịphe ade phọ, íbugha ghan ẹekpanion oomo ịiku iizo phọ anyina; ḅịle kẹn, kéḅula ẹekpanion ịkereku phọ, ịbilenaan rukulom mọ rꞌaruuruen phọ. Mị kụ Ọmoogh-we phọ Ẹnaan phọ anyina.”

Ẹyaal aḍimoom ạlha phọ

²³ Ọmoogh-we phọ ạghaaph ạḅeni Mozis

²⁴ mọ ạḅeni we phọ Ịzirel mọ, “Ḍịḅel aḍughul-otu oḍual ụnwanyu ạlha phọ, aḍio phọ ạḍiphe aḍio ophooghian. Mem dị ophula yogh ruuḍue phọ, itu eekpomoghan ịlo ọoḅereghi.

²⁵ Kékumuan rukumuan ḍio phọ ạḍiphe. Ịyaar dị nyina keḍighi, ịpighironaan ẹkia dị oḍighinom nịan ẹngo Ọmoogh-we phọ.”

Aḍio ọogbirion ịkaraph phọ

²⁶ Ọmoogh-we phọ ạghaaph ạḅeni Mozis mọ,

²⁷ “Ḍioph aḍughul-otu oḍual ụnwanyu phọ, aḍio phọ ạḍiphe aḍio oselemian aloor, aḍio iiwopha. Ḍio phọ ạḍiphe, ịtol ghan ọkoony kụ ẹmoogh ookpomoghan iigbia, ẹphighironaan ẹkia phọ roḍighinom ghan bọ nịan ẹngo Ọmoogh-we phọ.

²⁸ Íkumuan ghan rꞌẹnum arukumuan ḍio phọ ạḍiphe. Aḍio phọ ạḍiphe aḍio oselemian aloor, aḍio iiwopha risigh Ọmoogh-we phọ Ẹnaan phọ anyina.

²⁹ Tọrobo oye lọ ale eḍien ḍio phọ ạḍiphe, pọ itoph oye phọ ọpo ogbeph, emutonaan nyọdi esi awe phọ ọdi.

³⁰ Tọrobo oye lọ akumuan rukumuan ḍio phọ ạḍiphe, mị kapiemi ni oye phọ ọpo esi ogbo awe phọ ọdi.

³¹ Íkumuan ghan rukumuan ḍio phọ ạḍiphe sịphe asimarugh phọ anyina. Ọphon phọ ologh dị nyina keeko ghan kꞌagee-pọ oghiil atum oghiil.

³² Emiigh kꞌadulhe esugha aḍughul-otu ụnwanyu ẹteeny dulhe aḍioph aḍughul-otu phọ, ipooghian ghan oomo aḍio phọ ạḍiphe ẹrol ọkoony.”

Ẹyaal arubughotu

³³ Ọmoogh-we phọ ạghaagh ạḅeni Mozis

³⁴ mọ ạḅeni we phọ Ịzirel mọ, “Ḍioph rꞌoogh aḍughul-otu oḍual ụnwanyu phọ, aḍio phọ ạḍiphe ẹyaal arubughotu. Oḍual aḍughul-otu kụ ẹdi nyina kele ghan ẹyaal phọ ẹphen egbodo Ọmoogh-we phọ.

³⁵ Ḍịḅel aḍughul-otu phọ, nyina ịmoogh ookpomoghan iigbia, kékumuan rukumuan ḍio phọ ạḍiphe.

³⁶ Iḍighi ghan ịyaar aghuḍum oguom ạnian phọ oḍual aḍughul-otu, kụ ḍịphe emuneniom bọ ọphaanya aḍughul-otu ẹmoogh ookpomoghan iigbia, kékumuan rꞌẹnum arukumuan ḍio phọ ạḍiphe.

³⁷ (“Ịphen phọ ạrayaal dị nyina keeko ghan ịlo oghueniom Ọmoogh-we phọ; ạrayaal oḍighi yogh ạrikia mọ ịpe oḍighinom bọ nịan, ịlo oguom ạnian, ịlo ịbiakpa, ịlo ịpughol, ịpe rọwa bọ aḍio etum ḍio.

³⁸ Ạrayaal phọ ịphen, ịlo ọḅaram ịpe aḍio ophooghian phọ ịlo aruunmo, ịlo ophooph ologhi, ịlo ọkpiom arughuanaan Ọmoogh-we phọ.)

³⁹ “Ḍioph rꞌoogh aḍughul-otu oḍual ụnwanyu ạlha phọ, mem dị nyina mebugha oomo ariiḍien phọ ịsiphe ade phọ, ikori ghan elhe ẹyaal arubughotu phọ oḍual aḍughul-otu. Ạḍiḅel aḍughul-otu phọ aḍio ophooghian.

⁴⁰ Ḍịḅel aḍio phọ, ịpam ghan igeny iimuma, sịgo alhe rꞌigeny ịphiph ireeny rꞌinyaaru epheghogh rephegh, ẹmoogh iboh rꞌọḅaal ologhi, esi oḍual aḍughul-otu ghisigh Ọmoogh-we Ẹnaan phọ anyina.

⁴¹ Ile ghan ẹyaal phọ ẹphen oḍual aḍughul-otu lhạ. Ọphon phọ ologh dị nyina keeko ghan kꞌagee-pọ, oghiil atum oghiil.

⁴² Oḍual aḍughul-otu oomo aḍita phọ anyina eru bọ we Ịzirel itughogh rugbogo,

⁴³ ọbo oghiil atum oghiil phọ anyina alegheri mọ, mem mọ mị ịsighe bọ inyina awe phọ Ịzirel amitiom ạḍuanam ẹpe eelhe phọ Ijipt, nyina irughogh ghan rugbogo. Mị kụ Ọmoogh-we phọ Ẹnaan phọ anyina.”

⁴⁴ Ịdipho phọ kụ ẹdi aMozis ạghaagh bọ amitiom agananami ạḅeni we phọ Ịzirel rạyaal phọ ịpe kokueniom ghan bọ Ọmoogh-we phọ ẹlo amem rꞌamem.