Lịvitikos 20 - Ạḍinya Iigbia

Ịikpia ịkaraph

¹ Ọmoogh-we phọ ạghaaph ạḅeni Mozis

² mọ ạḅeni we phọ Ịzirel mọ, “Tọrobo oye mꞌọlo ịsiphe ẹmha phọ mꞌooruen lọ rꞌanyina erughan kụ ạsighe oniin ọony ọdi ạḅogh ạngo Mọlek, pọ ikiigh ghan oye phọ ọpo. Nyina aḍita ạbuo ookpomoghan phọ itoḅol nyọdi ikpo.

³ Mị rꞌaloor kakiririom oye phọ ọpo apogh; kụ mị atoph nyọdi ogbeph, amutonaan nyọdi esi awe phọ ọdi, ịdi eḍighi bọ ọdi mạsighe nyoniin ọony ọdi ạḅogh ạngo Mọlek; ọdi mạapu Dọl Iigbia phọ ạmi, ạpue ḍien iigbia phọ ạmi.

⁴ Kụ eru mạar dị awe ịsiphe ẹmha phọ ophogh oye phọ ọpo bịn ọḅitonaan kụ oye phọ ọpo úkiigh,

⁵ pọ mị kakiririom ni nyọdi rꞌopolo ọdi apogh. Mị atoph oye phọ ọpo phọ ogbeph, ạḅaram rꞌawe phọ ạbuphe rꞌọdi oḍighan bọ Mọlek oḍighi yogh ọdorodo phọ.

⁶ “Tọrobo oye lọ aḍigh oghuugh ịmiin, ịiḍaany rꞌạghama kụ raḍighi yogh ọdorodo, pọ mị kakiririom ni oye phọ ọpo apogh. Mị atoph nyọdi ogbeph, ạgbatan nyọdi ạsighe, amutonaan nyọdi esi awe phọ ọdi.

⁷ Ịpama siloor anyina eselemian ẹrol dọl aghuḍuul. Mị kụ Ọmoogh-we Ẹnaan phọ anyina.

⁸ Iiko ghan iilogh phọ ạmi ẹdaph ghan kụ eḍighi. Mị kụ Ọmoogh-we phọ iseere bọ inyina dọl aghuḍuul phọ.”

⁹ Tọrobo oye lọ aatuuny ọde ọdi mụghumo onhiin ọdi, pọ ikiigh oye phọ ọpo. Ịḅaal ọdi ẹmhu ọdi.

¹⁰ Oye kụ aliom ẹmha ạnir ọnon oye; kẹn aliom ẹmha amatuman ọdi, pọ ịḅar ạnir phọ rꞌolephiri phọ eghiigh.

¹¹ Ọony kụ aliom ẹmha ạnir ọde ọdi, pọ ọdi mạmiin ẹdaḅa ọde ọdi, pọ ịḅar ịyal phọ ạbidi eghiigh; ịḅaal ạbidi, ẹmhu ạbidi.

¹² Oye lọ ạrolan esi rꞌạnir ọony phọ ọdi, pọ ịḅar ịyal phọ ạbidi eghiigh. Bịdi mọkom ghẹlhe ịgbaragbara oseere. Ịḅaal ạbidi, ẹmhu ạbidi.

¹³ Ịyal alephiri ạnmuny kụ ọrolan esi ịdipho ạnir-ephoph rꞌolephiri ọony rọtolan ghan bọ esi, pọ ịyal phọ ạbidi moḍighi ugbini ugbini, pọ ịḅar ịyal phọ ạbidi eghiigh; ịḅaal ạbidi edi ẹmhu ạbidi.

¹⁴ Eru mạar dị oye kụ ạḅaraghi ạnir rꞌonhiin ọdi kụ aphinogh, pọ ịsighe ịraar phọ ạbidi bịn eguom nịan loor ạḅaphanya phọ bịdi moḍighi bọ.

¹⁵ Oye kụ ạrolan esi rꞌẹnam, pọ ikiigh oye phọ ọpo, eghiigh ẹnam mọ.

¹⁶ Eru mạar dị ạnir-ephoph kụ ạrolan esi rꞌẹnam, pọ ikiigh ạnir phọ ọpo, eghiigh ẹnam mọ, ịḅar ịyal phọ ạbidi ẹze. Ịḅaal ạbidi edi ẹmhu ạbidi.

¹⁷ Eru mạar dị oye ạsighe ọnyani ọde ọdi mꞌọnyani onhiin ọdi kụ ọdi ạmiin ẹdaḅa ọnyani phọ, ọnyani phọ ạmiin ẹdaḅa ọdi, ịphen phọ ạraraar umugholoor. Bịdi mọḅophoghan rꞌạbunon ạnmuny ịsiphe ologhi otu phọ, awe phọ ạbidi. Imutonaan ịyal phọ ạbidi eroph bịdi ogbeph esi awe phọ ạbidi.

¹⁸ Eru mạar dị oye ạrolan esi rꞌạnir lọ odi ẹmha ạnmariir, pọ ọdi mạmiin ẹmha ạnir phọ, pọ ạnir phọ mạyegheronaan ẹrol phọ ọdi; imutonaan ịyal phọ ạbidi eroph bịdi ogbeph esi awe phọ ạbidi.

¹⁹ Oye kụ ạrolan esi rꞌumarani onhiin ọdi mꞌumarani ọde ọdi, pọ ọdi mạrolomi ẹdaḅa ọnyo asiya ọdi, pọ ịkaraph ạbidi edi ẹmhu ạbidi.

²⁰ Oye kụ ạrolan esi ạnir umor ọde phọ ọdi, pọ ọdi mạrolomi ẹdaḅa umor ọde phọ ọdi, pọ ịkaraph ạbidi edi ẹmhu ạbidi. Bịdi ọrol ẹ́mar tụtu bịdi omuughu.

²¹ Eru mạar dị oye ạsighe ạnir umor ọdi, pọ ạḅaphanya. Moḍue ọophi ẹmaria ạbidi, bịdi ọrol ẹ́mar bịn.

²² Ịdaph ghan iilogh phọ ạmi rꞌịiruen phọ ạmi kụ ẹtuugh ghan eḍighi, ọbo ade phọ aKenan mị ịsighe bọ inyina rạki orughemi kikuḅa ghan bọ inyina ezuughi.

²³ Ị́daph ghan rọozo eḍighinom ạraraar awe areelhe phọ ịpe edi bọ risigh anyina mị kaporogh bọ ạwalalami, ịdi eḍighi bọ bịdi roḍighi yogh ghan idaleghe kịrokiro kụ mị ạtu bọ ạḅitonaan bịdi.

²⁴ Kụ mị rịḅeni bọ inyina mọ ade phọ ạḍiphe ạḍio anyina. Mị mịngaani inyina mọ ịmoogh de phọ; de ẹetool rꞌọninom. Mị kụ Ọmoogh-we Ẹnaan phọ anyina, ọpo mịgbatan bọ inyina esi awe phọ.

²⁵ Kụ iḍighi, nyina ịlogh ọku ịnam mọ ịpe ẹḅaal bọ rꞌịpe ị́ḅaal bọ, rꞌịnun phọ ịpe ẹḅaal bọ rꞌịpe ị́ḅaal bọ. Ị́sighe ghan siloor anyina ẹ́kuom ḅạphanya. Ị́sighe ghan ruwaloor anyina eḍighi ḅạphanya ịnam rꞌịnun rꞌesi ạtorobo oomo ạraraar phọ rekuura bọ sịen ade phọ, ịpe mị mạlhogh bọ ọku esi ạbidi rꞌanyina.

²⁶ Nyina iḍighi we aghuḍuul esi ạmi, ịdi eḍighi bọ mị kụ Ọmoogh-we phọ, mị kụ Ẹnaan aruukuan. Kụ iḍighi, kụ mị mịgbatan inyina ạsighe esi ạbueri phọ awe phọ, ọbo nyina eḍighi bụo ạmi.

²⁷ Kꞌạnir, kꞌolephiri dị aru uwaloor ịmiin mụghumo ọḅaghama, pọ itoḅol nyọdi ikpo dị amugh; ịḅaal ọdi edi ẹmhu ọdi.