Lịvitikos 17 - Ạḍinya Iigbia

Ịdi ịḅaal eḍighi iigbia

¹ Ọmoogh-we phọ ạghaaph ạḅeni Mozis

² mọ ạḅeni Eeron rꞌạnmuny phọ ọdi rꞌoomo awe phọ Ịzirel mọ ịphen kụ ịdi Ọmoogh-we phọ ạto.

³ “Tọrobo ọlo ịsiphe ọkuruḅaka phọ Ịzirel kụ aghiigh nạm mꞌoyool-ọga mꞌạtu-ọga sịphe arugbogo phọ, mụghumo ạḍuanam ni sịphe arugbogo phọ kụ aghiigh,

⁴ dị ụ́sighe útu sịphe ọnhu-aḍibuo Ogbogo Ạdol Ọmoogh-we phọ oḍighinom ịyaar aghuḍum ọngo Ọmoogh-we phọ, pọ kọsighe ni apum ozu ịḅaal ọḅam ẹmhu oye phọ ọpo, pọ awe phọ ọdi oroph nyọdi ogbeph omutonaan nyọdi.

⁵ Ẹmhu ịto phọ ịphen eḍighi ịdi awe phọ Ịzirel nyịidipho kọsighe ghan ịnam mọ bịdi ọze ghan bọ ẹpe erugh otuom oyil ạrikia phọ sịphe ọnhu-aḍibuo Ogbogo phọ kụ okiigh ịdipho ịyaar aghuḍum ẹboroph ọngo Ọmoogh-we phọ.

⁶ Oyil ạrikia phọ kạsighe ịḅaal phọ ạsaraghi ạnyu enmeny ạrikia phọ, sịphe ọnhu-aḍibuo Ogbogo phọ, kụ ạsighe ẹnuum mọ aguom nịan ịdi ephur eeḅi eḍu esi Ọmoogh-we phọ.

⁷ Bịdi kúkel mun Ọmoogh-we phọ, kụ́pinyonaan ghan mun rịkia phọ ạbidi ụ́ngo ruru. Ịphen phọ eḍighi iigbia esi anyina kꞌagee-pọ, oghiil atum oghiil.

⁸ “Tọrobo ọnyo Ịzirel rꞌooruen lọ rꞌanyina erughan kụ ạphighiron ẹkia oguom ạnian mụghumo ẹnon ẹkia,

⁹ kụ ụ́sighe útu sịphe ọnhu-aḍibuo Ogbogo phọ ụ́pighironaan ụ́ngo Ọmoogh-we phọ, pọ itoph ogbeph oye phọ ọpo emutonaan nyọdi.

¹⁰ “Tọrobo ọnyo Ịzirel rꞌooruen lọ rꞌanyina erughan kụ ạa ẹnam rꞌịḅaal dị edimom, pọ mị kakananaam ni apogh oye phọ ạa bọ ịḅaal phọ. Mị katoph ni nyọdi ogbeph, ạgbatan nyọdi ạsighe esi awe phọ ọdi.

¹¹ Aghuḍum ạtorobo ịyaar dị repooghu edi sịphe ologhi ịḅaal phọ. Kụ iḍighi, kụ mị ạlogh bọ ologh ịngo bọ inyina mọ nyina kẹki ghan sịphe enmeny phọ kụ ewopha yogh siloor anyina, ịdi eḍighi bọ ịḅaal kụ ịdi rowophaam ghan bọ ọwaam aghuḍum.

¹² Kụ iḍighi, kụ mị rạḅeni bọ oomo phọ anyina awe Ịzirel mọ kẹ́ba ghan tọrobo ẹnam dị ịḅaal phọ edimom. Ghạlamo ooruen lọ rꞌanyina erughan, kụ́ba ghan.

¹³ “Tọrobo ọnyo Ịzirel rꞌooruen lọ rꞌanyina erughan kụ aru ọtayaam ịtaya kụ aghiigh ẹnam mꞌẹnun lọ ẹḅaal ọkoom ghan ịko aloor, pọ ạmeegh orum mọ aaku ịḅaal phọ ude, ạsighe ịisaar aakpereghiom,

¹⁴ ịdi eḍighi bọ ịḅaal kụ aghuḍum oomo ạraraar phọ ịpe repooghu bọ. Ịduon kụ iḍighi kụ mị ạtu bọ ịḅeni inyina awe phọ Ịzirel mọ ị́ba ghan tọrobo ẹnam dị ịḅaal phọ edimom. Kụ iḍighi, kụ tọrobo oye lọ ạa ịḅaal, pọ kotoph nyọdi ogbeph.

¹⁵ “Tọrobo ọlo ịsiphe ọkuruḅaka phọ Ịzirel rꞌooruen lọ rꞌanyina erughan kụ ạa ịyaar lọ ẹpu bịn emugh, mꞌẹlo elhom ẹnam kụ eghiigh, pọ ọdi aatologh rukpe ọdi, asoor ologhi ạmuum awura, pọ ọdi mạapuan loor ạrol ḍịo ọdi gem kꞌadulhe, pụruku ọdi mạḅaal.

¹⁶ Kụ eru mạar dị ọdi rukpe phọ ọdi úutologh mụum úbura, pọ ịkaraph ọdi, ẹmhu ọdi.”