Lịvitikos 14 - Ạḍinya Iigbia

Oselemian aloor mem dị ạreezegh aruzu aloor phọ mẹnighe

¹ Ọmoogh-we phọ ạghaagh ạḅeni Mozis mọ,

² “Ẹphen phọ iilogh ịlo oye lọ ẹzegh ọku ufe eḍighi. Ḍio oselemian aloor phọ ọdi, kọsighe ni oye phọ ọkiom oyil ạrikia phọ.

³ Oyil ạrikia phọ ạḍua sịphe arugbogo phọ amite, ạaḅeghion nyọdi aphogh mụghumo ọdi maakonoma ẹzegh ọku ufe phọ eḍighi bọ nyọdi aḍum.

⁴ Rọoḅeghion rophogh mọ mạkua, kụ ạkpaariom oye phọ mọ ạghi ạsighe ịyal ịnun lọ edi eye lọ kẹ̋epuan loor, opoḍi ọsaga, oodor rꞌaghuudia, ạsighe aru.

⁵ Oyil ạrikia phọ ạḅeni nyọdi ạkpaariom mọ ạsighe eniin ẹnun ạlogh ologhi okiki, aghiigh esi okiilia ạmuum,

⁶ Ịphen reten kụ ạsighe opoḍi ọsaga phọ rꞌoodor phọ rꞌaghuudia phọ ạḅaram ẹnun phọ nyẹpe esugha bọ, asumeeny sịphe ịḅaal ẹḅel ẹnun phọ dị aghiigh bọ sịphe okiilian ạmuum mọ.

⁷ Kụ ạsighe ạsaraghiom oḍual amem oye phọ ọpo ẹzegh aḍizu phọ eḍighi bọ aru bọ oselemian aloor phọ, kụ agbi nụun oghol oye phọ mọ ạḅaal li. Kụ ạwile ẹnun phọ nyẹpe úkiigh bọ ẹpheeph ẹḍua sịphe ẹmha phọ esuma ologhi eḍum.

⁸ Kụ oye phọ aru bọ oselemian aloor phọ kaatologh rukpe ọdi, akula ẹmhu ọdi, ạlogh mụum abura. Ọdi mạkua ạḅaal. Roḍighi ịphen phọ, ọdi aḅula ẹpe arugbogo phọ otu kúḍigh ạrol erugh oḍual aḍughul-otu.

⁹ Kụ rẹman oḍual aḍughul-otu, ọdi ạḅile aghula ẹmhu ọdi, ọleem ọdi, iidum ariḍien ọdi rꞌoomo ạburu aloor ọdi, kụ aatologh rukpe ọdi, ạlogh mụum awura, pụruku ọdi mạḅaal ạkua.

¹⁰ “Kụ rẹman ọphaanya aḍughul-otu, ọdi kạsighe ni ịyal idughuna lọ loor kẹ̋epuan, rꞌoniin oyool-ọga dị mẹman lhạ lọ loor kọ̋opuan, rꞌịraar igbogh ịtoom ẹemor igeny ịgbieneen ịbiakpa, adi eeku ạmunum ịraar abin kụ ạsighe bin ọphighironom ẹkia ịbiakpa.

¹¹ Kụ oyil ạrikia phọ ọpo raselemi bọ loor oye phọ ọpo aru bọ oselemian aloor phọ, ạsighe ghan oye phọ rꞌạraraar phọ ọdi, ạsighe oye phọ ạghi aḍeenaan egbodo Ọmoogh-we phọ sịphe ọnhu-aḍibuo Ogbogo Ạdol Ọmoogh-we phọ.

¹² Oyil ạrikia phọ ạsighe oniin odughuna ạḅaram adi eeku ạmunum ịraar abin kụ ạsighe bin ạphighironom ẹkia ọkpe-oḅulemi ạsighe ạgbanyan nyọdi egbodo Ọmoogh-we phọ.

¹³ Kụ ọdi ạsighe odughuna phọ aghiigh sịphe rọze ghan bọ ịnam lọ koḍighinom ịyaar aghuḍum ịkaraph rꞌịyaar aghuḍum oguom ạnian. Ịdipho ịnam lọ oḍighinom ịyaar aghuḍum ịkaraph eru bọ ịlo oyil ạrikia phọ, ịdipho kụ ịdi ịyaar aghuḍum ọkpe-oḅulemi phọ edi. Eḍighi ni iboom iigbia.

¹⁴ Oyil ạrikia phọ ạsighe ịḅaal phọ agbul aḅeri-elhiom rꞌakugbogh ạghunugh ạḍighaagh elhiom rꞌakugbogh ạghunugh owol elhiom oye phọ roselemi bọ.

¹⁵ Oyil ạrikia phọ ạsighe ẹphurukpu ạmunum sịphe eeku phọ ạlogh ẹda ạḍighaagh ekeeny ọdi.

¹⁶ Ạsighe ghụnugh ạḍighaagh elhiom ọdi atiom mụnum mọ odi bọ ẹda ạḍighaagh ekeeny phọ ọdi, kụ ạsaraghi mụnum mọ oḍual amem egbodo Ọmoogh-we phọ.

¹⁷ Kụ oyil ạrikia phọ ạsighe ẹphurukpu ạmunum mọ odi bọ sịphe ẹda ạḍighaagh phọ ọdi, rꞌịḅaal phọ, ạsighe ạsagharan aḅeri-elhiom oye phọ ọpo aru bọ oselemian aloor phọ, rꞌakugbogh ạghunugh elhiom ọdi, rꞌakugbogh ạghunugh owol ọdi.

¹⁸ Kụ mụnum mọ mụphe asugha bọ ẹda ạḍighaagh oyil ạrikia phọ, ọdi ạsighe ạsagharan ẹmhu oye phọ ọpo aru bọ oselemian aloor phọ. Oyil ạrikia phọ awoph nyọdi egbodo Ọmoogh-we phọ.

¹⁹ “Oyil ạrikia phọ ạsighe ẹkia ịkaraph phọ ạphighiron, awoph nyọdi ạsighe esi ịkaraph. Ịphen reten kụ ọdi ạsighe ẹnam mọ ẹpe kọpighironom bọ ẹkia oguom ạnian phọ aghiigh,

²⁰ ạsighe ạphighiron ẹkia ịyaar aghuḍum oguom ạnian rꞌẹkia ịbiakpa phọ sịphe ạnyu enmeny phọ, kụ awoph nyọdi bịn ọdi mạkua ạḅaal.

²¹ “Kụ eru uwekulom dị ụ́moogh, pọ ọdi ạsighe ghan oniin odughuna ọlo koḍighinom ịyaar aghuḍum ọkpe-oḅulemi, ạsighe ạgbanyan nyọdi egbodo Ọmoogh-we phọ, ạsighe ogbogh ọtoom ẹemor ịgbieneen ịbiakpa dị okironom mụnum, adi eeku ạmunum ịraar abin kụ ạsighe bin ạphighironom ẹkia,

²² rꞌịyal aruukumude mụghumo ịyal ịgaami arukuru-ghọzo, oniin ọlo kọpighoronom ẹkia ịkaraph, oniin ọlo ẹkia oguom ạnian.

²³ Rẹman ọphaanya aḍughul-otu, ọdi ạsighe rạraar phọ ịphen phọ, aru ạngo oyil ạrikia phọ sịphe ọnhu-aḍibuo Ogbogo egbodo Ọmoogh-we phọ ịlo oselemian aloor.

²⁴ Oyil ạrikia phọ ạsighe odughuna phọ, rꞌeeku ạmunum ịraar abin kụ ạsighe bin ạphighironom ẹkia ọkpe-oḅulemi phọ, ạsighe ạgbanyan nyọdi egbodo Ọmoogh-we phọ.

²⁵ Kụ ọdi aghiigh odughuna phọ kọpighironom bọ ẹkia ọkpe-oḅulemi phọ kụ ạsighe ịḅaal agbul aḅeri-elhiom oye phọ ọpo aru bọ oselemian aloor phọ, rꞌakugbogh ạghunugh ạḍighaagh elhiom, rꞌakugbogh ạghunugh owol elhiom ọdi.

²⁶ Oyil ạrikia phọ ạsighe ẹphurukpu ạmunum sịphe eeku phọ ạlogh ẹda ạḍighaagh ekeeny ọdi.

²⁷ Ạsighe ghụnugh ạḍighaagh elhiom ọdi atiom mụnum mọ odi bọ ẹda ạḍighaagh ekeeny phọ ọdi, kụ ạsaraghi mụnum mọ oḍual amem egbodo Ọmoogh-we phọ.

²⁸ Kụ oyil ạrikia phọ ạsighe ẹphurukpu ạmunum mọ odi bọ sịphe ẹda ạḍighaagh phọ ọdi, rꞌịḅaal phọ, ạsighe agbul aḅeri-elhiom oye phọ ọpo aru bọ oselemian aloor phọ, rꞌakugbogh ạghunugh elhiom mọ ọdi, rꞌakugbogh ạghunugh owol elhiom mọ ọdi.

²⁹ Kụ mụnum mọ mụphe asugha bọ ẹda ạḍighaagh oyil ạrikia phọ, ọdi ạsighe ạsagharan ẹmhu oye phọ ọpo aru bọ oselemian aloor phọ. Oyil ạrikia phọ awoph nyọdi egbodo Ọmoogh-we phọ.

³⁰ Kụ ọdi ạsighe eniin eekumude phọ mꞌọgaami ọkurughozo phọ, ịpe oye phọ arue bọ ạmoogh, ạsighe ạphighironom ẹkia ịkaraph phọ,

³¹ kụ ạsighe ẹpheri phọ eekumude phọ mꞌọgaami ọkurughozo phọ, ạsighe ạphighironom ẹkia mọ oguom ạnian phọ ạḅaram rꞌẹlo ịbiakpa phọ. Ịdipho phọ kụ ịdi oyil ạrikia phọ awoph nyọdi egbodo Ọmoogh-we phọ ạsighe esi ịkaraph.

³² Ọphon phọ ologh oye lọ ẹzegh ọku ufe eḍighi, kụ kátue ạmoogh rạraar phọ ịpe kọpinyon ghan bọ ẹkia oselemian aloor phọ.”

Ịlo aruutu lọ ephum ḍiibum

³³ Ọmoogh-we phọ ạḅeni Mozis rꞌEeron mọ,

³⁴ “Mem dị nyina esi ẹpe ade phọ aKenan mị rịngaani bọ inyina, kụ mị ạsighe ẹzegh ọku ufe ạlogh oniin otu,

³⁵ oye phọ ạmoogh bọ otu phọ ạghi ạḅeni oyil ạrikia mọ ẹkigh dịadi ẹepoph meḍigh sịphe otu phọ ọno,

³⁶ pọ oyil ạrikia phọ ạḅeni nyọdi ạkpaariom mọ omiteghom oomo ạraraar otu phọ, kụ oyil ạrikia phọ agbi ọghi ophogh ọdo phọ ẹzegh phọ, ọbo ẹpooph phọ kẹpueghi ghan bọ oomo awe phọ orugh bọ sịphe otu phọ. Kụ oyil ạrikia phọ aḍigh otu phọ ọoḅeghion ophogh.

³⁷ Oyil ạrikia phọ ạnmanaghian aphogh esi phọ ẹzegh phọ edi bọ, mụghumo iikpe otu phọ melian egbughagbugha eḍighi ginini, ẹkiakia ẹtogh etiagha egbughagbugha.

³⁸ Oyil ạrikia phọ amite, asi sịphe ọnhu-aḍibuo otu phọ, aghughi otu phọ, ạwile ẹman oḍual aḍughul-otu.

³⁹ Remunughan oḍual aḍughul-otu phọ, oyil ạrikia phọ ạḅile ạghi ạnmanaghian aphogh mụghumo ẹepoph phọ melheeny oomo iikpe otu phọ.

⁴⁰ Melheeny ni, pọ ọdi ạkpaariom bịdi mọ ọsighiogh oomo asighiigh phọ ịpe ẹepoph phọ edi bọ, ọḍuanam sịphe arugbogo phọ ẹghi esumughi ẹpe ọobeph.

⁴¹ Bịdi ọghol oomo iikpe otu phọ ẹzegh phọ edi bọ, ọghol okitonom ọman rꞌologhi otu phọ ọsighe ịpe bịdi ọghologh bọ ọḍuanam sịphe arugbogo phọ ọghi osumughi ologhi ọobeph.

⁴² Bịdi ọsighe ịnon asighiigh odoghoḍi riisi phọ ịpe bịdi ọsighiogh bọ ịḅel asighiigh phọ. Kụ ọdi ạḅile agbul otu phọ.

⁴³ “Eru mạar dị ẹepoph phọ ẹḅile eḅula sịphe otu phọ, dị mọsighiogh bọ ni ịḅel asighiigh phọ, ọghol otu phọ ogbul,

⁴⁴ pọ oyil ạrikia phọ ạghi ạnmanaghian aphogh, kụ eru mạar dị ẹepoph phọ melheeny oomo otu phọ, pọ ẹkaraph ẹzegh dị reeteneghian ghan sịphe otu phọ, pọ ẹepoph, otu phọ ọ́ḅaal.

⁴⁵ Pọ ọdi alhereghi otu phọ, aḅonyon sighiigh phọ, ạsighiogh oomo ireeny phọ rꞌoomo ọogha otu phọ, arool ạsighe ạḍuanam sịphe ẹmha phọ ạsighe ạghi asumughi ologhi ọobeph.

⁴⁶ Tọrobo oye lọ ạghi aḍigh sịphe otu phọ oghughi yogh bọ, pọ ọdi mạapuan loor, ạrol ḍịo ọdi gem ẹteeny dulhe.

⁴⁷ Tọrobo oye lọ aḍigh sịphe otu phọ kụ ạmina, pọ ọdi aatologh rukpe ọdi. Ọlo aḍigh sịphe otu phọ kụ ạrol alhe eḍien, pọ ọdi aatologh rukpe ọdi.

⁴⁸ “Eru mạar dị oyil ạrikia phọ ạghi ạnmanaghian otu phọ aphogh kụ ẹepoph phọ ílho mun sịphe otu phọ mogbul bọ, pọ ọdi kạḅem mọ otu phọ mạḅaal, mọ mookonom ẹzegh phọ.

⁴⁹ Ọdi ạsighe ịyal ịnun rꞌopoḍi ọsaga, oodor rꞌaghuudia awophom otu phọ.

⁵⁰ Kụ ọdi ạsighe eniin ẹnun aghiigh ologhi ọnyoki esi okiilia ạmuum.

⁵¹ Kụ ọdi ạsighe opoḍi ọsaga phọ, rꞌoodor phọ rꞌaghuudia phọ ạḅaram ẹnun phọ úkiigh bọ asumeeny sịphe ịḅaal ẹnun phọ ẹpe oghiigh bọ sịphe okiilia ạmuum mọ; kụ ạsighe ạsagharan otu phọ oḍual amem.

⁵² Ịdipho phọ kụ ẹdi ọdi kạsighe ghan ịḅaal ẹnun phọ rꞌạmunum mọ rꞌẹnun phọ nyẹpe úkiigh bọ, rꞌopoḍi ọsaga phọ, aghuudia phọ, ạḅaram rꞌoodor phọ kụ awoph otu phọ aselemi.

⁵³ Kụ ọdi ạwile ẹnun phọ nyẹpe úkiigh bọ ẹpheeph ẹḍua sịphe ẹmha phọ esuma ologhi eḍum. Ịdipho phọ kụ ẹdi ọdi kawoph otu phọ aselemi.”

^54-56 Ịphen phọ iilogh aruuḅulha ọku ufe, ẹlo eḍighi ạsuoma rꞌẹlo eḍighi otu, rꞌạḍikaraph aḍizu, rꞌaloor lọ etiagha.

⁵⁷ Ịphen phọ reḍeenaan ghan mem lọ ịyaar ephuph rꞌamem lọ ípuph.