Lịvitikos 13 - Ạḍinya Iigbia

Iilogh ịlo ạreezegh aḍizu aloor

¹ Ọmoogh-we phọ ạto ạḅeni Mozis rꞌEeron mọ,

² “Mem lọ aloor oye ewuphogh aḍizu phọ eeph, etiagha kụ enmia eḍighi ẹzegh ufe, pọ ịsighe oye phọ ọpo ẹghiomonaan Eeron oyil ạrikia phọ mꞌoniin ọony phọ ọdi ḍi aḍighi oyil ẹkia.

³ Kụ oyil ạrikia phọ ạaḅeghion aphogh ọdo phọ ẹepoph phọ eḍighi bọ nyọdi. Mụghumo ạburu aloor phọ ọdi mọ ạḅaal, pọ ẹepoph phọ melheeny loor ọdi, pọ ẹzegh ọku ufe kụ iḍighi. Oyil ạrikia phọ ạaḅeghion aphogh kụ agananami nyọdi mọ mạphuph.

⁴ Kụ eru mạar dị ariisi phọ etiagha bọ mekitonu ẹḅaal sịphe aḍizu phọ ọdi kụ ílian ípu ḍizu phọ kụ ạburu aloor phọ ọdi kőkitonu ọ̋ḅaal, pọ oyil ạrikia phọ ạsighe oye ẹzegh phọ aghughiom otu oḍual aḍughul-otu.

⁵ Rẹman oḍual aḍughul-otu, oyil ạrikia phọ ạaḅeghion oye phọ aphogh kụ ạmiin mọ ẹzegh phọ ke̋lheeny loor ọdi, pọ ọdi ạḅile aghughiom nyọdi ịnon oḍual aḍughul-otu.

⁶ Kụ oyil ạrikia phọ ạḅile ạaḅeghion nyọdi aphogh esi oḍual aḍughul-otu phọ. Kụ eru mạar dị ọdi ạmiin mọ ariisi phọ etiagha bọ mewilogh kụ ẹzegh phọ íleeny loor phọ ọdi, pọ ọdi agananami nyọdi mọ ọdi ọ́phuph, pọ kéepuph pọ ẹko bịn, pọ oye phọ aatologh rukpe bịn ọdi mạḅaal.

⁷ Eru mạar dị ariisi phọ emiteghu bọ loor phọ ọdi melheeny oomo aloor phọ ọdi dị maḍeenaan ghan bọ ni oyil ạrikia phọ, pọ ọdi ạḅile ni ạghi aḍeenaan loor phọ ọdi oyil ạrikia phọ.

⁸ Kụ eru mạar dị oyil ạrikia phọ ạmiin mọ ariisi phọ emiteghu bọ loor phọ ọdi melheeny oomo aloor phọ ọdi, pọ ọdi agananami nyọdi mọ ọdi mạphuph ọ́ḅaal mọ ẹzegh ọku ufe kụ iḍighi.

⁹ “Tọrobo oye lọ ẹzegh ọku ufe kụ eḍighi, pọ ịsighe ẹghiom oyil ạrikia phọ.

¹⁰ Oyil ạrikia phọ ạaḅeghion nyọdi aphogh, kụ eru mạar dị ariisi phọ ewuphogh kụ ẹḅaalogh, kụ ạburu aloor phọ ọdi makitonu ạḅaal, kụ aḍizu phọ ọdi ị́kua kụ ariisi phọ mewuphogh,

¹¹ pọ meḍighi egbaany ẹzegh ọku ufe sịphe aloor phọ ọdi. Oyil ạrikia phọ agananami nyọdi mọ mạphuph. Ọdi kúkughiom mun nyọdi otu ịdi eḍighi bọ ọdi mạphuph.

¹² Kụ eru mạar dị ẹzegh ọku ufe phọ mẹwalala eleeny oomo aloor phọ ọdi, kụ ẹepoph phọ mẹsiiny ẹmhu ọdi ẹḍua esoor ruwol, tọrobo esi aloor phọ ọdi lọ oyil ạrikia phọ aphogh,

¹³ pọ oyil ạrikia phọ ạatughianam nyọdi. Eru mạar dị ẹzegh ọku ufe phọ mẹkaraghi ni eleeny oomo phọ aloor phọ ọdi, pọ ọdi agananami nyọdi mọ ọdi mạḅaal esi ẹepoph phọ, mọ oomo phọ ọdi makitonu ạḅaal, mọ ọdi mạḅaal.

¹⁴ Kụ eru mạar dị aḍizu phọ ọdi ị́kua, pọ ọdi ọ́ḅaal.

¹⁵ Oyil ạrikia phọ ạaḅeghion ḍizu phọ ọdi ị́kua bọ aphogh, agananami nyọdi mọ dị ọ́ḅaal ịdi eḍighi bọ aḍizu phọ ọdi kẹ̋kua. Ẹpe phọ ẹzegh ọku ufe.

¹⁶ Eru mạar dị aḍizu phọ ọdi ị́kua bọ kụ ẹḅile enmia kụ ẹḅaal, pọ ọdi ạḅile ni ạghi kꞌoyil ạrikia phọ.

¹⁷ Kụ oyil ạrikia phọ ạḅile ạaḅeghion nyọdi aphogh kụ eru mạar dị ẹzegh phọ mekitonu ẹḅaal, pọ oyil ạrikia phọ agananami nyọdi mọ ọdi mạḅaal, mọ mạkua.

¹⁸ “Mem lọ ofuku aḅol oye kụ mạnighe kụ eetu phọ edi bọ sịphe aloor oye phọ

¹⁹ kụ eetu phọ ebuph ḅilẹ ekira kụ rẹtogh ịḅaal, pọ ạghi ghan aḍeenaan oyil ạrikia phọ.

²⁰ Oyil ạrikia phọ ạaḅeghion aphogh, kụ eru mạar dị aḍizu phọ rꞌesi phọ ị́ḅophoghan, kụ ạburu aloor phọ makitonu ạḅaal, pọ oyil ạrikia phọ agananami nyọdi mọ mạphuph, ẹpe phọ ẹzegh ọku ufe, ịḍua sịphe ofuku phọ kụ emite.

²¹ Kụ oyil ạrikia phọ ạaḅeghion aphogh kụ ạburu aloor phọ ọdi ọ́ḅaal, aḍizu phọ rꞌesi phọ eeleeny ni, kụ esi phọ egururu, pọ oyil ạrikia phọ aghughiom oye phọ otu oḍual aḍughul-otu.

²² Kụ eru mạar dị melheeny oomo aloor phọ ọdi, pọ oyil ạrikia phọ agananami nyọdi mọ mạphuph, mọ ẹzegh.

²³ Kụ eru mạar dị esi phọ etia bọ ị́yarara ileeny loor, edi ni eniin phọ ịsiphe eetu ofuku phọ bịn, pọ oyil ạrikia phọ agananami nyọdi mọ ạḅaal li.

²⁴ “Sịphe aloor phọ ọdi kụ aḍizu phọ ẹghigh dịadi ạnian kụ ịsu, kụ aḍizu phọ ọdi ị́kua etiagha yogh ẹtol kịakia kụ ẹḅaal,

²⁵ pọ oyil ạrikia phọ ạaḅeghion nyọdi aphogh, kụ eru mạar dị ạburu phọ asi bọ esi phọ atiagha bọ makitonu ạḅaal kụ iilenyan rꞌaḍizu phọ, pọ ẹzegh ọku ufe kụ eḍighi, pọ ịḍua sịphe ewil bọ kụ emite. Oyil ạrikia phọ agananami nyọdi mọ mạphuph.

²⁶ Kụ eru mạar dị oyil ạrikia phọ ạaḅeghion aphogh kụ ạburu phọ asi bọ esi phọ atiagha bọ ókitonu ọ́ḅaal, kụ esi phọ rꞌaḍizu phọ ẹḅophoghian ni, kụ egururu, pọ oyil ạrikia phọ aghughiom nyọdi otu oḍual aḍughul-otu.

²⁷ Kụ rẹman oḍual aḍughul-otu phọ, oyil ạrikia phọ ạḅile ạaḅeghion nyọdi aphogh, kụ eru mạar dị melheeny oomo aloor phọ ọdi, pọ ọdi agananami nyọdi mọ mạphuph, mọ ẹzegh.

²⁸ Kụ eru mạar dị esi phọ etiagha bọ ileeny oomo aloor phọ kụ ewil bịn, pọ eewupha phọ ịtuan sịphe ẹkpoghoronu bọ, pọ oyil ạrikia phọ agananami nyọdi mọ dị mạkua, pọ eetu ịsiphe phọ ẹkpoghoronu bọ bịn.

²⁹ “Eru mạar dị kꞌạnir kꞌolephiri kụ ẹzegh eḍighi ẹmhu ọdi mụghumo ẹewe ọdi,

³⁰ pọ oyil ạrikia phọ ạaḅeghion aphogh eḍighieen phọ. Kụ eru mạar dị esi phọ rꞌaḍizu phọ iileenyaan, kụ ạburu aloor phọ ạrol kịakia, pọ oyil ạrikia phọ agananami nyọdi mọ ọ́ḅaal, dị meḍighi roopho kụ rekponyonaan, pọ ẹzegh ọku ufe meḍighi ẹmhu phọ ọdi mꞌẹewe phọ ọdi.

³¹ Eru mạar dị oyil ạrikia phọ ạaḅeghion eḍighieen phọ aphogh, kụ aḍizu phọ eeleeny ni kụ ạburu phọ úbil, pọ ọdi ạsighe oye ẹzegh aroopho phọ aloor phọ rẹlian bọ aghughiom otu oḍual aḍughul-otu.

³² Kụ remunughan oḍual aḍughul-otu phọ, oyil ạrikia phọ ạḅile ạaḅeghion eḍighieen phọ aphogh, kụ eru mạar dị ariisi phọ rekponyonaan bọ íleeny oomo aloor phọ, kụ ạburu aloor phọ ụ́kiakia kụ ạreebephenu phọ ílian, aḍizu phọ eeleeny,

³³ pọ oye phọ aghula bọ ẹmhu ọdi kụ sịphe etiagha bọ dị kúkula; oyil ạrikia phọ ạḅile aghughiom nyọdi ịnon oḍual aḍughul-otu, loor aroopho phọ edi ẹmhu phọ ọdi.

³⁴ Kụ rẹman oḍual aḍughul-otu, oyil ạrikia phọ ạḅile ạaḅeghion roopho phọ aphogh, kụ eru mạar dị oomo aloor phọ ọdi aroopho íleeny, ḅịle kẹn aḍizu phọ ílian, pọ oyil ạrikia phọ agananami oye phọ mọ mạḅaal, dị aatologh rukpe ọdi bịn mạkua.

³⁵ Eru mạar dị ọdi maselemian loor kụ aroopho phọ ẹḅile emiteghu eleeny loor phọ ọdi,

³⁶ pọ oyil ạrikia phọ ạḅile ạaḅeghion nyọdi aphogh kụ eru mạar dị aroopho phọ melheeny oomo aloor phọ ọdi, pọ oyil ạrikia phọ kúpogh ịlo ọkiakia ạburu, pọ oye phọ mạphuph.

³⁷ Eru mạar dị ọdi ạmiin mọ areephegha phọ ị́yarara kụ oḍiil ạburu masi loor phọ ọdi, pọ areephegha phọ megheel dị maḍum ạkua. Kụ oyil ạrikia phọ agananami nyọdi mọ ọdi mạḅaal.

³⁸ “Mem dị olephiri mꞌạnir ạmoogh ịphalaḅaal aradama sịphe aḍizu phọ,

³⁹ oyil ạrikia phọ ạaḅeghion nyọdi aphogh kụ eru mạar dị areephegha phọ edi bọ loor phọ ọdi ebaghagha yogh, pọ ạronyo kụ imiteghu loor ọdi, ọ́phuph, ọdi ạḅaal li.

⁴⁰ “Eru mạar dị ạsilaal ẹmhu oye kụ retupha, pọ ekpol kpol ẹmhu, kẹ́zegh. Ọdi ạḅaal li, ọ́phuph.

⁴¹ Oye lọ ạsilaal elhor ọdi kụ erupha, pọ ạkukpol kpol arisigh, kẹ́zegh. Ọdi ạḅaal li, ọ́phuph.

⁴² Eru mạar dị ịkiakia ariisi emiteghu sịphe ẹmhu phọ ọdi mꞌelhor phọ ẹekpolonu bọ, pọ ẹzegh ọku ufe kụ remiteghu sịphe ẹmhu phọ ọdi mꞌarisigh phọ ọdi ẹekpolonu bọ.

⁴³ Pọ oyil ạrikia phọ ạaḅeghion nyọdi aphogh, kụ eru mạar dị ariisi phọ emiteghu bọ sịphe aghisigh phọ ọdi mꞌẹmhu phọ ọdi ẹḅaal kịakia ịdipho oye lọ ẹzegh ọku ufe edi loor,

⁴⁴ pọ ẹzegh ọku ufe meḍigh oye phọ ọpo, mạphuph, ọ́ḅaal. Oyil ạrikia phọ agananami nyọdi mọ mạphuph, mọ ẹzegh edi ẹmhu ọdi.

⁴⁵ “Oye phọ ọpo ẹzegh ọku ufe eḍighi bọ amunughian ịphanyuan phạnyuan arukpe, ạwile sịlaal phọ ọdi efana fana, aakpereghi ọodoronhu ạnyu phọ ọdi, kụ ạlooghi ghan mọ ọno mạphuph, mọ ọno ọ́ḅaal.

⁴⁶ Oomo ạsia phọ ịpe ẹepoph phọ kẹtol bọ loor phọ ọdi, pọ ọdi mạphuph, ọdi ọḅaal, dị ạḍua sịphe arugbogo phọ, ạghi arugh ḍịo ọdi bịn gem.

Iilogh dị egbolomaam ḍiibum

⁴⁷ “Mem dị aḍiibum kụ edi loor iinmenian mụghumo awul mꞌọyegheyeghe ọmur, mꞌukpe

⁴⁸ mꞌolhooneen mꞌoḍighinom ozu ẹnam,

⁴⁹ kụ esi phọ ẹzegh phọ ẹbiph bọ egururu mꞌẹtogh ni sịphe ạsuoma phọ, mꞌulo ni mꞌụkol li, pọ ẹzegh ọku ufe. Ịsighe ẹghi eḍeenaan oyil ạrikia phọ.

⁵⁰ Oyil ạrikia phọ ạaḅeghion aphogh, aghughiom otu oḍual aḍughul-otu.

⁵¹ Kụ rẹman oḍual aḍughul-otu phọ, oyil ạrikia phọ ạḅile ạaḅeghion aphogh mụghumo ẹzegh phọ eleeny ạsuoma phọ, mꞌolhooneen mꞌọkoloneen mꞌaḍizu mꞌạtorobo ịyaar phọ ẹpe roḍighinaan ghan bọ loor. Melheeny, pọ ẹzegh ọku ufe meḍigh, pọ ọ́ḅaal, mạphuph.

⁵² Pọ ọdi ạsighe ạsuoma phọ aguom nịan. Ẹzegh ọku ufe, ẹkaraph ẹzegh dị rẹdaph ghan ạsuoma mꞌolhooneen mꞌọkoloneen rꞌạtorobo ịyaar phọ ẹpe roḍighinaan ghan bọ loor kụ kẹphue.

⁵³ “Kụ eru mạar dị oyil ạrikia phọ ạaḅeghion aphogh kụ ạmiin mọ ẹzegh phọ ke̋lheeny,

⁵⁴ pọ ọdi ạkpaariom bịdi mọ ootologh rạraar phọ ịpe ẹzegh phọ ẹḅiphogh bọ, kụ dị ạḅile aghughiom otu ịnon oḍual aḍughul-otu.

⁵⁵ Oyil ạrikia phọ ạaḅeghion rạraar phọ ịpe mootologh bọ ịpe ẹzegh phọ ẹdaph bọ aphogh, kụ eru mạar dị aḍizu ẹzegh phọ ínmia ghạlamo ẹzegh phọ ị́yarara, pọ ịyaar phọ mephum ḍiibum mꞌedi ologhi mꞌedi ạnyu, pọ oguom nịan.

⁵⁶ Oyil ạrikia phọ ạaḅeghion aphogh kụ ẹzegh phọ megururu sịphe ạsuoma phọ mootol bọ ni, pọ ọdi ạpogh esi phọ ịsiphe ạphaar ạsighe.

⁵⁷ Eru mạar dị esugha ni sịphe ạsuoma phọ mꞌolhooneen mꞌọkoloneen mꞌozu, pọ ẹepoph phọ releeny leeny, pọ ọpo ạmoogh bọ ạsighe nyẹen ẹepoph phọ edi bọ, aguom nịan.

⁵⁸ Eru mạar dị mẹḍua, pọ ḅịle aatol amuneni ịyal amem, pụruku mạkua, ạḅaal.

⁵⁹ “Ọphon phọ ologh ịlo ạraraar dị ephum ḍiibum, ọlo ạrusuoma, mꞌawul mꞌọmur, mꞌolhooneen mꞌọkoloneen mꞌozu ẹnam.”