Lịvitikos 12 - Ạḍinya Iigbia

Oselemian aloor ạnir dị mạmar

¹ Ọmoogh-we phọ ạto ạḅeni Mozis mọ ọdi ạḅeni we phọ Ịzirel mọ,

² “Eru mạar dị ạnir-ephoph aamor kụ ạmar olephiri, pọ ọdi ạrol dọl ạnir lọ odi ẹmha ạnmariir oḍual aḍughul-otu, ọdi ọ́ḅaal.

³ Kụ rẹman ọphaanya aḍughul-otu bịn eḍun ọony phọ.

⁴ Ọdi ạrol rꞌạmugbo phọ 33 aḍughul-otu, ọdi kụ́ḅogh ịyaar lọ eḍighi iigbia, ḅịle ọdi kúḍigh sịphe Ogbogo Iigbia phọ tụtu ariiḍio oselemian aloor phọ ọdi emunughan.

⁵ “Kụ eru mạar dị ọdi ạmar ọnyani, pọ ọdi ạrol dọl ạnir lọ odi ẹmha ạnmariir ḍioph rꞌinya aḍughul-otu; kụ ọdi ạrolom rꞌạmugbo phọ 66 aḍughul-otu, ịlo oselemian aloor phọ ọdi.

⁶ “Kụ mem lọ ariiḍio ạmugbo phọ ọdi memunughan, mꞌolephiri mꞌọnyani, pọ ọdi ạsighe ghan oyool-ọga lọ ạman ḍiniin ạlha, ọlo ọphighoronom ẹkia oguom ạnian, rꞌeekumude mꞌọgaami ọkurughozo, ọlo ọphighoronom ẹkia ịkaraph, ạsighe ạghi sịphe ọnhu-aḍibuo Ogbogo Ạdol Ọmoogh-we phọ, ạngo oyil ạrikia phọ.

⁷ Ọdi ạphighironaan ẹkia phọ sịphe egbodo Ọmoogh-we phọ, awoph nyọdi aselemi, pụruku ọdi mạḅaal esi ạmugbo phọ amiteghu bọ loor phọ ọdi. Ọphon phọ kụ ologh ạnir lọ ạmar mꞌolephiri mꞌọnyani.

⁸ “Kụ eru mạar dị ạnir phọ kátue ạmoogh oyool-ọga, pọ ọdi ạsighe ghan ịyal aruukumude mụghumo ịyal ịgaami arukurughozo; oniin ọlo ẹkia oguom ạnian, ọphori phọ ọlo ọphighoronom ẹkia ịkaraph. Kụ oyil ạrikia phọ awoph nyọdi aselemi nyọdi dị ạḅaal.”