Lịvitikos 11 - Ạḍinya Iigbia

Ịnam dị ẹkpe ni ạa ghan

¹ Ọmoogh-we phọ ạto ạḅeni Mozis rꞌEeron

² mọ ọḅeni we phọ Ịzirel mọ, “Esi oomo phọ ịnam mọ edi bọ sịen aḅirini phọ, ịnam mọ ịphen kụ ịdi nyina kẹba ghan.

³ Tọrobo ẹnam mọ ẹpe aruwol phọ ọdi ẹzaghagha bọ kụ ạsunugh phọ ọdi egophan bọ kụ rekuḅa ghan kẹraala, ịnam mọ ịphen kụ ịnam dị ẹkpe ạa ghan.

⁴ Kụ ọlo kẹ́ba ghan kạmel, ịtu ghan mọ aruwol ạbidi ẹzaghagha, ḅịle rekuḅa ghan kẹraala, ạsunugh ạbidi ígophan, ị́ba ghan oonaagh, dị ọ́zala ọ́ḅaal esi anyina.

⁵ Ḍiwoor kẹn, ịtu ghan mọ ọdi rakuḅa ghan kạraala, ạsunugh ọdi ígophan, dị ọ́zala ọ́ḅaal ị́ba ghan.

⁶ Anamade kẹn, ịtu ghan mọ ọdi rakuḅa ghan kạraala ạsunugh ọdi ígophan, dị ọ́zala ọ́ḅaal ị́ba ghan.

⁷ Ophoropo kẹn, ịtu ghan mọ ạsunugh ọdi ogophan aruwol ekpulughan kụ rákuḅa ghan kạraala, ọdi ọ́zala ọ́ḅaal ị́ba ghan.

⁸ Ị́ba ghan ịnam mọ ịphen. Ọnyo ạbidi lọ amugh, ị́ḅogh ghan, bịdi ụ́zala ụ́ḅaal.

⁹ “Esi ạraraar phọ ịpe edi bọ ụmuum, ịphen kụ ịdi nyina kẹba ghan: tọrobo ẹlo ẹmoogh ịmughiom rꞌipholopol kụ edi sịphe ạriphiiny phọ, mꞌọphiiny ạmubo ạmuum, mꞌọphiiny ạla, pọ ịba ni.

¹⁰ Kụ oomo ina phọ ịpe ị́moogh bọ ịmughiom rꞌipholopol kụ edi bọ sịphe ạriphiiny phọ, mꞌọphiiny ạmubo ạmuum mọ, mꞌọphiiny ạla phọ, oomo ịpe retelhe yogh bọ ologhi ạrumuum mọ, bịdi ạḅaphanya esi anyina ị́ba ghan.

¹¹ Bịdi eḍighi ḅạphanya esi anyina, ị́ba ghan bịdi. Ẹlo emugh ị́ḅogh ghan, ạḅaphanya esi anyina.

¹² Tọrobo ẹlo edi sịphe ạrumuum mọ kụ ị́moogh ịmughiom, ị́moogh ipholopol, pọ eḍighi ḅạphanya esi anyina.

^13-19 “Kụ ẹku ịnun, ịphen eḍighi ḅạphanya esi anyina: uga, ọdelhe, ạkpekpereegh, eghulhe, ẹghiligho, eekughum, adipa ọdunme, ọogho, ootuuny, obilogo, ọoke, ọowooph, ạkeledeeny, obar-uga, ọgbaghaghaany, ạakpo rꞌoomo ọmar phọ ạbidi.

²⁰ “Oomo ịraghada dị ẹmoogh raphaaph kụ retelhiom ghan bọ inya asike ạḅaphanya esi anyina, ị́ba ghan.

²¹ Kụ esi oomo ạraraar phọ ịpe ẹmoogh bọ raphaaph kụ retelhiom ghan bọ ḍita, ịba ni ịpe repeleghu bọ sịen ade phọ.

²² Sịphe aḍita phọ ạbidi, ịphen kụ ịdi nyina kẹba ghan: igurubia, sịghida, suogh-aben ọdo kịrokiro phọ ạbidi.

²³ Oomo ịpheri phọ ịpe ẹmoogh bọ raphaaph rꞌinya aruwol ị́ba ghan, bịdi ạḅaphanya esi anyina.

²⁴ “Tọrobo oye lọ ạḅogh ịnam mọ ịphen lọ memugh, pọ mạapuan loor ọdi. Oye phọ ọpo phọ kụ́ḅophan rꞌạbunon awe tụtu ẹteeny dulhe.

²⁵ Tọrobo oye lọ arool ẹnam lọ mamugh, pọ mạapuan loor ọdi, oye phọ ọpo phọ aatologh rukpe ọdi ạrol ḍịo ọdi gem tụtu ẹteeny dulhe.

^26-28 Tọrobo ẹnam lọ aruwol phọ ọdi ekpulughan ị́zaghagha kụ rékuḅa ghan ni kẹraala; tọrobo ẹnam inya asike dị ẹmoogh rạraaph sịphe ạsunugh phọ ọdi.

^29-30 “Ḍita ịphen phọ kẹn ị́ḅaal esi oomo ạraraar phọ ịpe rekuura bọ ude, retelhiom bọ ọkuruḅaka: aḍianya, ọodu-aḍiwo, ubeku, eghol, ạḅaagh rꞌoonaagh.

³¹ Ịphen phọ ị́ḅaal esi oomo ạraraar phọ ịpe rekuura bọ ude. Tọrobo oye lọ ạḅogh ọnyo ạbidi lọ memugh, pọ mọ ạapuan loor ọdi, ạrol gem ḍịo ọdi tụtu ẹteeny dulhe.

³² Tọrobo ịyaar erughotu dị ịnam mọ ịphen lọ memugh kụ emeel esuma ologhi, pọ mạapu ịyaar phọ, mꞌodo mꞌẹkpa mꞌạsuoma, mꞌaḍizu mꞌukpe-ọto. Ịsighe ẹroph ologhi ạmuum ẹrol pạ ologhi ạmuum tụtu ẹteeny dulhe, pụruku mẹḅaal.

³³ Eru mạar dị ẹdo ẹnam mọ ẹphen kụ emeel esuma ologhi oko mꞌọnyoki, pọ oomo ạraraar lọ edi ologhi mẹphuph, pọ iḅomoghi.

³⁴ Esi oomo ạraraar phọ ịpe eru bọ eḍien dị role ghan kụ ạmuum oko phọ ọpo ạteeny, pọ mẹphuph. Tọrobo ạmuum mọ ạmuphe rọpughol ghan bọ kụ ạmuum oko phọ ọpo aḍigh, pọ mạphuph.

³⁵ Tọrobo aguugh ịisa lọ ọnyo ạbidi lọ mamugh kụ ameel asuma ologhi, mꞌaguugh ẹḍaany mꞌaguugh arukuron, pọ mạphuph, pọ iḅomoghi. Bịdi ị́ḅaal mun esi anyina.

³⁶ Tọrobo ịlo ạmuum ọodu mꞌạmuum ooni ạrol, pọ ạḅaal li. Kụ ọlo ạghi sịphe kụ ạḅogh ẹlo memugh, pọ mọ ạapuan loor ọdi.

³⁷ Kụ ẹnam lọ memugh kụ emeelom ịizupha dị oseere ịlo olool, pọ ẹḅaal li ịzuph ni.

³⁸ Eru mạar dị ọsighe ịizupha phọ kụ ọroph ologhi ạmuum kụ ẹlo memugh esuma ologhi ạmuum mọ, pọ mẹphuph ị́ḅaal mun esi anyina.

³⁹ “Kụ esi ịnam mọ ịpe eru bọ ni ịpe nyina rẹba ghan bọ, kụ memugh, tọrobo ọnyo anyina lọ ạḅogh pọ mọ ạapuan loor ọdi, ạrol ḍịo ọdi gem tụtu ẹteeny dulhe.

⁴⁰ Kụ ọnyo anyina lọ ạa ẹnam lọ memugh, pọ ọdi aatologh rukpe ọdi. Ọdi mọ ạapuan loor, ạrol ḍịo ọdi gem tụtu ẹteeny dulhe. Ọlo arool ẹnam lọ memugh, pọ ọdi mọ ạapuan loor ọdi, aatologh rukpe ọdi ạrol ḍịo ọdi gem ẹteeny dulhe.

⁴¹ “Tọrobo ẹbam ẹnam mọ ẹpe rekuura bọ, mọ ẹlo retelhiom ọkuruḅaka sịen ade phọ eḍighi ḅạphanya anyina.

⁴² Tọrobo aḍita ịpe rekughol bọ kụ retelhiom bọ inya asike, rꞌịpe ịbadi aruwol phọ rekuura bọ sịen ade phọ, eḍighi ḅạphanya anyina.

⁴³ Ị́sighe ghan siloor phọ anyina íseere dọl dị ẹrol dịadi nyina ílegheri mọ oomo phọ ạraraar phọ ịpe retelhiom bọ ọkuruḅaka kụ rekuura bọ sịen ade phọ eḍighi ḅạphanya anyina. Kétuman bịdi ọbo nyina kẹepuan ghan bọ siloor anyina.

⁴⁴ Mị kụ Ọmoogh-we Ẹnaan phọ anyina. Iselemian siloor anyina, ọbo ẹrol dọl iigbia, ịdi eḍighi bọ mị Ẹnaan iigbia.

⁴⁵ Mị kụ Ọmoogh-we phọ ịsighe bọ inyina emitiom ẹpe ade phọ Ijipt. Mị Ẹnaan anyina. Kụ iḍighi ịmaar ẹphama siloor anyina eseere dọl iigbia ịdi eḍighi bọ mị Ẹnaan iigbia.

⁴⁶ “Ọphon phọ kụ ologh ọlo ịnam rꞌịnun, rꞌoomo ịpe ọlhem bọ edi bọ ụmuum; rꞌoomo ịpe ọlhem bọ edi bọ sịen aḅirini phọ retelhiom bọ ọkuruḅaka, rekuura bọ sịen ade phọ.

⁴⁷ Ịlogh ọku ẹgbarion esi ịpe ị́ḅaal bọ rꞌesi ịpe ẹḅaal bọ, esi ịnam ịpe kọba ghan bọ rꞌịpe kọ́ba bọ.”