Biblia Todo Logo
Bìoball air-loidhne

- Sanasan -

Josua 9 - Ạḍinya Iigbia


Bụo ạGibion ookeleghi Josua

1 Ọdu ọkpar opu phọ Ịzirel aaleghaan ni ạteeny oomo ạbudaam-ẹmha phọ bụphe orugh bọ ạga emeelom erumuḍio phọ ạJodan, kꞌẹpe aroogbolom mọ rꞌẹpe aruugum mọ, rꞌẹpe ọgbal Ọphiiny aMeditarenian phọ ẹteeny eelhe dị etuman Lẹbanon: bụen kụ ạraalha ạHitait phọ rꞌẠmorait phọ rꞌaKenanait phọ rꞌạPerezait phọ rꞌaHivait phọ rꞌaJebusait phọ.

2 Oomo phọ ạbidi ookpomoghan esi kụ ọḅophoghan eenan aJosua rꞌawe phọ Ịzirel.

3 Kụ awe ẹmha ạGibion oḍighi bọ bụo aHivait ọnaghan ịpe Josua maḍighi bọ Jeriko rꞌEai,

4 kụ bịdi ọotughian ookeleghi ọdi. Bịdi ụsighe eḍien ọlogh ologhi igbaany ạsikpuru dị mẹphaanyuan rꞌarukuru aruzu-ịnam amiim ịya dị mẹphanyu kụ opu, ọḅamaghi ạnyu ịnam adool phọ ạbidi ọsaany.

5 Bịdi ọkpologhian ịparapara ạrusuoma rꞌipaḅara arokoro. Ạbred dị bịdi ọpham ạkpar kụ apum ḍiibum,

6 kụ bịdi ọghi ọteeny Josua ẹpe arugbogo phọ ẹpe Gịlgal ọḅeni nyọdi, ọḅile ọḅeni we phọ Ịzirel mọ, “Ekpisi phọ yoor ọḍua bọ kụ oru, ẹmha ayoor, ẹkel li. Yoor rọwa dị nyina kekiran ịyo rꞌayoor.”

7 Kụ awe phọ Ịzirel opuru bịdi mọ, “Esi ika kụ ẹdi yoor rꞌanyina kekiran bọ ịyo? Iini sịen amarugh anyina ọ́kel.”

8 Kụ bịdi ọḅeni Josua mọ, “Yoor odi okumu ọngo ạna.” Kụ aJosua apuru bịdi mọ, “Nyina ạbuo ạnhian? Nyina ịḍua ẹghen kụ eru bọ?”

9 Kụ bịdi ọgba iphirigba phọ ịphen ọḅeni Josua mọ, “Yoor abutelhedom mọ ạna ụḍua kꞌekpisi ẹmha dị ẹkel kụ oru, loor esi dị yoor ọnaghan ịlo Ọmoogh-we Ẹnaan phọ anyina. Yoor rọnaghan ghan ni ọdu aḍien ọdi rꞌoomo ịpe ọdi aḍighi bọ ẹpe Ijipt,

10 rꞌoomo ịpe ọdi aḍighi bọ ịyal phọ ạbudaam mọ Ạmorait bụphe orugh bọ ẹpe ạga emitenom mọ ạJodan, ịpe ọdi aḍighi bọ Sihon ọdaam mọ aHesbon, rꞌịpe ọdi aḍighi bọ Ọg ọdaam mọ ạBasan, bụphe orugh bọ ẹpe Astarot.

11 Kụ ikumoor awe rꞌoomo awe phọ ịsiphe ẹmha phọ ayoor ụḅeni iyoor mọ, ‘Ịpam riiḍien lọ nyina kele ẹpe eten phọ kụ ẹghimom, kụ ẹḅeni bịdi mọ, “Yoor odi okumu ọngo anyina. Itu nyịidipho yoor rꞌanyina oghiran ịyo.”’

12 Ịmaar ẹmiin ạbred ayoor. Ḍio phọ yoor oḅetenu bọ erelhe phọ oru ọteeny ạna, ạbred phọ ọphon yoor kole ghan bọ otelhiom ẹpe eten phọ, rạanyuum ni kụ nyịidipho, pogh, mạsikiri apum ḍiibum ạkaraghar.

13 Mem dị yoor omuzeḍi rukuru amiim mọ ịphen, iḍighi ni imoom. Arukuru aruzu-ịnam amiim ịya phọ ayoor amuza ni aḍighi mumoom. Kụ ịmiin. Mẹphaanyu, aruuku phọ ayoor meḅomoghian, arokoro phọ ayoor mẹphaanyuan eḍighi igbaany eḅu. Ạrusuoma ayoor rꞌipaḅara arokoro ayoor meḅu loor ẹedoony erelhe phọ.”

14 Awe phọ Ịzirel ạar iniin ariiḍien ạbidi, kụ úpuru Ọmoogh-we phọ.

15 AJosua aḍighi ịlo ẹepho esi awe phọ rꞌawe phọ Ịzirel, kụ bịdi oghiran ịyo, ọwile ạbidi ọrol oḍum; kụ bụo ạrumhu ịsiphe ookpomoghan phọ okunya.

16 Rẹman ịraar aḍughul-otu bịdi oghiran bọ ịyo phọ, kụ bịdi ọnaghan mọ awe phọ ạbuen phọ amatuman ạbuno ni, mọ bịdi ooḍikuan ni marugh.

17 Kụ awe phọ Ịzirel oḅetenu erelhe kụ esi ịraar aḍughul-otu bịn osi rạmha phọ awe phọ odi bọ: Gịbion, Kefira, Beerot rꞌạKiriat Jiarim.

18 Kụ awe phọ Ịzirel bịdi ụ́ze ịdi eḍighi bọ bụo ạrumhu ịsiphe ookpomoghan phọ moghol bọ ḍien Ọmoogh-we Ẹnaan phọ Ịzirel okunya. Kụ oomo ookpomoghan phọ ọgumom bụo ạrumhu phọ ạbidi.

19 Kụ bụo ạrumhu phọ ọḅeni oomo ookpomoghan phọ Ịzirel mọ, “Yira moghol ḍien Ọmoogh-we Ẹnaan phọ Ịzirel bịdi rꞌayira okiran ịyo, kụ iḍighi oye bịdi kụ́ḅogh.

20 Ịduon kụ ịdi yira koḍighi bịdi: yira bịdi kọ́ze, ọbo ạghelhe kụrolonaan ghan bọ iyira loor esi ịyo phọ bịdi rꞌayira moghiran bọ.

21 Yira bịdi kọ́ze. Bịdi kụsooghinaan ghan iyira ịpe, ọḅile ụkpaaghinaan ghan iyira mụum.” Ịphen phọ kụ ịdi bụo ạrumhu phọ ọḅeni ookpomoghan phọ.

22 AJosua ạmagh ni we phọ ạGibion kụ apuru mọ, “Uḍighi ika kụ nyina iigbegheḍiom bọ iyoor ịduon, kụ ẹḅem bọ mọ yoor ụḍua ni kꞌẹekela ekpisi kụ oru, dị nyina erugh bọ sịen rꞌịsien?

23 Kụ iḍighi, nyịidipho mịsu inyina ọkaraph ọnhu. Nyina keḍighi rẹbene, ọsooghi ghan ịpe, ọkpaaghi ghan mụum mụo ịsiphe otu phọ Ọpo ụmoogh bọ ịmi.”

24 Kụ bịdi ọḅeni Josua mọ, “Yoor uḍighi ịduon, oye phọ, ịdi eḍighi bọ ụḅeni iyoor abutelhedom mọ ạna mọ Ọmoogh-we Ẹnaan phọ anyina ạlogh ologh ạngo Mozis otelhedom mọ aphiemi bụphe orugh bọ sịphe ade phọ edi bọ ẹpe esomanan phọ anyina mọ ọno mịngo inyina oomo ade phọ. Yoor uḍighi ni loor esi dị aruugu usiph iyoor iboom. Yoor ughiilaan loor aghuḍum mọ ayoor loor ẹmhu anyina.

25 Pogh, nyịidipho yoor odi ḍịghaagh ạna. Uḍighinom iyoor ịlo nạ ạatughian mọ ẹkpianaan.”

26 Kụ ịduon kụ ịdi aJosua aḍighi: ọdi ạmaar ạpham bịdi kụ ómeera awe phọ Ịzirel ọze bịdi.

27 Kụ mem mem mọ ọdi ạsighe bịdi aḍighi rẹbene ọso ghan ịpe ọḅile ọkpaaghinaan ghan ạmuum ookpomoghan awe phọ Ịzirel rꞌịsiphe enmeny ạrikia phọ Ọmoogh-we phọ. Kꞌarodon bịdi odi ghan oḍighi ịphen phọ esi dị Ọmoogh-we phọ ạsaḅar mọ ọrol ghan kụ ọoḅereghi.

© 2018 ALDLS  

Abuan Language Development and Literacy Society 

Ayama-Abua, Rivers State, Nigeria

Published by 

NBTT 

Nigeria Bible Translation Trust 

No. 7 Old Airport Road 

P.O. Box 790, Jos Plateau State, Nigeria

ISBN: 978-978-966-354-5 

In cooperation with

MIDI BIBLE 

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published 

in 1978 by The Bible Society of Nigeria with © UBS

Nigeria Bible Translation Trust
Lean sinn:



Sanasan