Josua 8 - Ạḍinya Iigbia

Ozuoghom mọ rꞌephiemiom mọ aEai

¹ Ọmoogh-we phọ ạḅeni Josua mọ, “Aruugu nyịna kúsiph mun. Ologhi ạna kụ́konono mun. Nạ rꞌoomo awe ẹgham mọ, iḅetenu ẹghi Eai. Mị kaḍighi ni ịdi nyina kẹkpar epu ọdaam mọ Eai. Mị rịngo inyina we phọ ọdi rꞌẹmha phọ ọdi rꞌade phọ ọdi.

² Nyina keḍighi Eai rꞌọdaam ẹmha phọ ạbidi ịpe nyina eḍighi bọ Jeriko rꞌọdaam ẹmha phọ ạbidi, kụ mem mọ ạmuen nyina keseerian rạraar phọ ịpe nyina kebum bọ rꞌịnam otu phọ ạbidi. Iikolobian ọḍua ẹgum ọman ozuom ẹgham ẹmha phọ ekperenom.”

³ Kụ aJosua aḅetenu rꞌoomo awe ẹgham mọ ọghi ozuom Eai. Kụ aJosua ạson ịraardi ọonir awe dị ọmoogh ịnyaam rꞌịyaar oḍighinom kụ arom mọ ọghi ḍughul.

⁴ Kụ ọdi ạto ạḅeni bịdi mọ, “Ịbooghian ḍịeri phọ ạga ẹmha phọ. Ịtol etuman ẹmha phọ, ị́ḍua ghan ị́kel. Oomo phọ anyina, ịnyaaghian ozuom.

⁵ Kụ mị rꞌoomo awe phọ ạbuen kotelhe ghan ọobeeph ẹpe ẹmha phọ. Mem dị awe Eai oru eenan ayoor, yoor kọgum ọman ịdipho yoor oḍighi bọ ẹḅel amem mọ.

⁶ Bịdi kuphorogh iyoor tụtu bịdi ọkelan ẹmha phọ. Bịdi kọotughian mọ yoor rokiilaan bịdi, ịdipho yoor oḍighi bọ ẹḅel amem mọ.

⁷ Ikem ẹḍua sịphe nyina ạaghian bọ emite, ẹmooghom ẹmha phọ. Ọmoogh-we Ẹnaan phọ anyina kạḅogh ni ẹmha phọ ịngo inyina.

⁸ Kụ nyina rẹsighe ẹmha phọ, kụ ẹsu nịan. Ịphen ikpo ọnhu dị nyina kẹdaph.”

⁹ Kụ Josua arom bịdi mọ ọghi, kụ bịdi ọghi esi ịbooghian phọ ạbidi kụ ọrol sịphe kụ okori. Esi phọ ịrol ịbaay ạBetel rꞌEai ạga emeelom ẹmha phọ aEai. Kụ aJosua rꞌawe phọ ọdi ọmina ḍughul sịphe arugbogo phọ.

¹⁰ Kụ aJosua aḅon aḅetenu esoph ạḍiroor kụ aakpomoghi we phọ Ịzirel, kụ aḅetenu rꞌikumoor awe phọ aḍiemiom we phọ rọki Eai.

¹¹ Kụ ạbuo ẹgham mọ bụphe osugha bọ oḅetenu kụ ọghi ọtol ropogh eḍighom ẹmha, kụ odoghoḍi rugbogo ẹpe ạga ephunom aEai kụ eḍiiny edi ịbaay ạbidi ra Eai.

¹² Kụ ọdi ạsighe we dị ọkiom oogh ọonir awe mọ bịdi ạaghian ẹpe eḍum mọ edi bọ ịbaay ạBetel ra Eai ẹpe ạga emeelom erumuḍio ẹmha phọ.

¹³ Rosereghi bọ ogbogh opol awe ẹgham mọ ẹpe ạga ephunom ẹmha phọ rꞌạbueri phọ ẹpe ạga emeelom erumuḍio ẹmha phọ rọman, kụ aJosua ạmina ḍughul phọ ẹpe eḍiiny phọ.

¹⁴ Mem dị ọdaam ẹmha phọ aEai ạmiin bọ we phọ aJosua, ọdi óphiemi mem. Ọdi rꞌawe ọdi uḅetenu ni eḅon ạḍiroor onyeene ẹpe Eḍiiny ạJodan eenan awe Ịzirel eniin esi phọ ịdipho ẹpheri phọ amem mọ, ólhegheri mọ awe kọḍua ọman ozuom nyịno.

¹⁵ Kụ aJosua rꞌoomo awe phọ Ịzirel okue bịn oḍighi ịdi ẹrol dịadi roḅulolom ọman kụ oghiil osumughu rọki ẹpe ẹdala phọ.

¹⁶ Kụ oomo awe phọ aEai ookpomoghan roporogh bịdi, kụ bịdi ophorogh Josua ọkele sịphe ẹmha phọ.

¹⁷ Rꞌẹnum oye ósugha sịphe Eai dị ụ́ki aani ophorogh awe phọ Ịzirel. Ẹmha phọ ephoghogho, roporogh ghan we phọ Ịzirel.

¹⁸ Kụ Ọmoogh-we ạḅeni Josua mọ, “Sele ọsoph phọ nạ ạpham bọ ḍịghaagh asomoriom Eai. Mị mạḅogh Eai ạlogh ḍịghaagh ạna.” Kụ aJosua asele ọsoph phọ dị ạpham bọ asomoriom ẹmha phọ.

¹⁹ Kụ bụphe ạaghian bọ okem oḅerenu riisi phọ bịdi ọrologhu bọ mem mọ aJosua asele bọ ọsoph phọ, kụ oghiil ọghi oḍigh ẹmha phọ kụ ọsu nịan ẹmha phọ.

²⁰ Kụ awe phọ Eai okiton ophogh ọman kụ ọmiin mụghi dị rạdumughu kạghi okuaḍio; kụ eten bịdi ị́tolonaan osuma, loor esi dị awe phọ bụphe oghiil bọ ọghi ẹpe ẹdala phọ ụḅile oḅula ozuom ạbidi.

²¹ Mem dị aJosua rꞌoomo awe phọ Ịzirel ọmiin bọ mọ awe phọ bụphe ạaghian bọ mọsighe ẹmha phọ kụ ạmughi ẹmha phọ masi kꞌẹpe ạnyu, bịdi ukitonaan omiigh ọze awe phọ aEai.

²² Awe phọ Ịzirel bụphe ọrol bọ ẹpe ẹmha phọ uru kụ oḍighan ẹgham, kụ awe Eai ọmiin mọ awe Ịzirel mokoom bịdi. Kụ Ịzirel ọze oomo ạbidi rꞌoye úsugheeny,

²³ emuton ọdaam ẹmha phọ aEai bịn. Usiph nyọdi ọghiomaan Josua.

²⁴ Awe phọ Ịzirel ụze tọrobo ọnyo ạmulogh-ḍien lọ ạrol ẹpe ẹdala phọ ẹpe ophorogh bọ bịdi, kụ oḅula Eai, kụ ọsighe ẹdume elhool ẹgham mọ ọziom bụphe ọrol bọ sịphe phọ.

^25-26 AJosua ọ́kul ḍịghaagh phọ ọdi ḍịphe ọdi ạpham bọ ọsoph phọ tụtu oghiigh tọrobo oye. Oomo awe ạbuo aEai ụze ḍio phọ ạḍiphe ọmadan, ḍioph rꞌịyal ọonir awe, lephiri rꞌạnmariir.

²⁷ Awe phọ Ịzirel useenaan siloor ạbidi ịnam rꞌaruphua phọ owum bọ sịphe ẹmha phọ ọdaphan ologh phọ ọpo Ọmoogh-we phọ ạlogh bọ ạngo Josua.

²⁸ Kụ aJosua ạsu nịan Eai, kụ ạraraar phọ ịpe bịdi ịphueghi bọ ekpolan egu. Ẹsighe kꞌaḍio phọ ạḍiphe ẹteeny kꞌarodon, edi ghan ịdipho.

²⁹ Kụ ọdi ạsighe ọdaam ẹmha phọ aEai asin loor oreeny bịn ạwile sịphe kꞌadulhe. Erumuḍio remeel ighool, kụ aJosua ạḅeni bịdi mọ ịsighe ḍizu phọ ọdi sịphe oreeny phọ eseere ude. Kụ ọsighe ḍizu phọ otebeeny sịphe ọnhu-aḍibuo eḍighom ẹmha phọ kụ okpol egu dị edi ghan sịphe phọ kꞌarodon.

Ạal iilogh phọ sịphe Eegum Ebal

³⁰ Kụ aJosua ạkananaan Ọmoogh-we Ẹnaan phọ Ịzirel enmeny ạrikia sịphe Ebal.

³¹ Ọdi ạkan ịdipho aMozis otelhedom Ọmoogh-we phọ ạlogh bọ Ologh phọ ạngo we phọ Ịzirel, ịpe ọge bọ sịphe ạḍinya iilogh aMozis, “enmeny ạrikia dị ọkanam ikpom asighiigh dị emunughan, ịdi oye kọ̋sighe ghan rạraar ạmaka óphoghomiom”. Sịphe ạnyu phọ kụ ẹdi Ịzirel ọphighironaan ẹkia oguom ạnian ọngo Ọmoogh-we phọ rꞌịyaar aghuḍum ẹboroph.

³² Sịphe aloor asighiigh phọ, mem dị awe Ịzirel ropogh, aJosua ạtuugh ịpe aMozis ạge bọ sịphe Ologh phọ ọdi ạge.

³³ Oomo awe phọ Ịzirel, ikumoor awe phọ ạbidi, bụo ạrumhu awe ẹgham mọ rꞌạbuo ịiruen phọ, mꞌaruuruen mꞌạbulo ọmar sịphe ẹmha phọ, ọmeregha osoman ariil ạrikia phọ bụo aLivait phọ, bụphe orool bọ Igbe Ịyo phọ Ọmoogh-we phọ. Buniin ọmeregha oniin ạga esomanan aGerizim, bụeri phọ ọmeregha ọphori ạga phọ esomanan Eegum Ebal. Mozis otelhedom mọ Ọmoogh-we phọ mạto ạḅeni bịdi mọ oḍighi ịduon mem dị amem mọ ẹteeny ạar ạḍiseph phọ.

³⁴ Kụ reten, kụ aJosua ạal amitiom oomo Ologh phọ, ạḅaram ogey ọghor ạḍiseph rꞌọkaraph ọghor itulughian, oomo ịpe ọge bọ sịphe ạḍinya Ologh phọ.

³⁵ Ekpo ịyaar ísugha sịphe iilogh phọ aMozis ạlogh bọ dị aJosua ụ́bal ụ́ḅeni sịphe ookpomoghan awe phọ Ịzirel, lephiri, nmạriir, ịbam ạnmuny rꞌaruuruen phọ ạbuphe rꞌạbidi orughan bọ.