Josua 7 - Ạḍinya Iigbia

Ịkaraph phọ Akan

¹ Ologh phọ Ọmoogh-we phọ ạlogh bọ ạngo we Ịzirel mọ ịyaar kụ́sighe úmitenom ẹpe Jeriko ụ́daphan. Oye dị oghol mọ Akan ạsighe iniin ạraraar phọ ịpe ọnyagharanaan bọ ọngo Ọmoogh-we phọ, kụ Ọmoogh-we phọ ạghagham ologhi we phọ Ịzirel. (Akan aḍighi mọony aKami, ọony ọony aZabdi, ọlo ọto aZera, ọlo eghun aJuda.)

² AJosua arom we mọ ọḍua Jeriko ọghi Eai, ẹmha dị edi ạga emitenom ạBetel dị etuman Bẹt Aven, oḅiligha ophogh ịpe ade phọ ẹrol bọ. Kụ awe phọ ọghi oḅiligha.

³ Kụ awe phọ oḅula oru ọteeny Josua kụ ọḅeni nyọdi mọ, “Ị́kpianaan dị oomo awe kozuom elephiri Eai; tom we dị ọman ịyal ọonir mụghumo ịraar ọonir bịn. Oomo awe phọ kụ́miinom erelhe ụ́ki, ịdi eḍighi bọ ẹmha phọ ị́bugh ekom ni.”

⁴ Awe dị ọkiom ịraar ọonir awe kụ ụghi ẹgham mọ; kụ uḍighi ịdi bịdi oḅulolom ọman.

⁵ Awe phọ aEai uphorogh bịdi omitiom sịphe ọnhu-aḍibuo ẹmha phọ osiom esi dị roogbo ghan sighiigh, kụ ọze we dị ọman ịraardi rꞌodiiny awe, ekpisi dị eegbolom mọ ekpululu. Kụ iḅiom awe Ịzirel ẹpheeph; iloghi ạbidi ẹrol ịdipho ạmuum.

⁶ Kụ aJosua rꞌikumoor awe phọ Ịzirel orunyian ibura ạbidi loor ọto kụ omeel ezuemi ozuan egbodo Igbe Ịyo phọ Ọmoogh-we phọ, kụ ọmina sịphe kꞌadulhe, rꞌọoru rụmhu ạbidi oḍeenaan okururu.

⁷ Kụ aJosua ạḅem mọ, “Seseeny, Ẹnaan Ọmoogh-we, esi ika kụ ịdi nạ ạtuan bọ ạsighe we phọ ạbuen ạḅeeny Jọdan aphune? Nạ ụtuan ọḅogh ayoor ọngo ạbuo Ạmorait phọ mọ ụze iyoor? Ịḅeeraan ghụn ni iyoor, ịphoonaan iyoor orugh ọphori phọ ọman phọ ạJodan.

⁸ Ọmoogh-we, mịna kạkaaph ika kụ ạḅeni we phọ Ịzirel mem dị bịdi mọgumom ọman bụmulogh-ḍien phọ ạbidi rosumughu?

⁹ AKenanait phọ rꞌoomo ạbuphe orugh bọ ẹpe ade phọ kọnaghan ni ịphen phọ. Bịdi kuuko iyoor okitonom, kụ opiemi ḍien phọ ayoor sịen aḅirini phọ. Kụ oḍighi ika ḍiboom mọ aḍien phọ ạna?”

¹⁰ Kụ Ọmoogh-we phọ ạḅeni Josua mọ, “Ḅetenu. Uḍighi ika kụ nạ ạmina bọ ezuemi?

¹¹ Awe phọ Ịzirel mọḅile kẹn ụpioman ịmi, ọka ịyo phọ ạmi ịpe mị ạlogh bọ ologh ạngo bịdi. Bịdi momiighi iniin ạraraar phọ ịpe ọnyagharanaan bọ ọngo ạmi. Bịdi mọḅile kẹn roḍighi iipheeny ọsighe ịpe ạmi ọḅaram ịlo ạbidi.

¹² Kụ iḍighi kụ awe phọ Ịzirel kótue bọ ọmerenyan rꞌạbumulogh-ḍien phọ ạbidi. Bịdi kọgumom ni ọman bụmulogh-ḍien phọ ạbidi, ịdi eḍighi bọ bịdi rꞌaloor moruule loor ạbidi ọngo muphe. Mị nyịna kạ́rolonaan mun, omuton dị nạ maphiemi bụphe moruule bọ sịphe ogbo phọ anyina.

¹³ Ḅetenu aselemi we phọ ạmi kụ ạḅeni mọ, Iselemian siloor anyina, kụ egbi ọteeny iḍue. Ọmoogh-we Ẹnaan phọ Ịzirel ạḅem mọ, ‘Weye Ịzirel, ạraraar phọ ạmi ịpe ọnyagharanaan bọ ọngo ạmi edi ogbo anyina. Nyina kétue ẹmerenyan bụmulogh-ḍien phọ anyina tụtu nyina ẹsighe rạraar phọ ịpe ọnyagharanaan bọ ọngo ạmi edi bọ sịphe ogbo phọ anyina eroḅologhi.’

¹⁴ Kụ iḍighi, iḍue, oomo arughunughun phọ anyina oru otuman, eghun etum eghun. Kụ eghun phọ ẹpe mị Ọmoogh-we phọ kạsighe bọ oru otuman, ọto atum ọto. Kụ ọto phọ ọpo mị Ọmoogh-we phọ kạsighe bọ oru otuman, oye atum oye.

¹⁵ Kụ oye phọ ọpo kosiphom bọ rạraar phọ ịpe ọnyagharanaan bọ ọngo ạmi, koguom oye phọ ọpo phọ rꞌoomo aruphua phọ ọdi nịan, ịdi eḍighi bọ dị mạka ịyo phọ ạmi Ọmoogh-we phọ, ạsighe we phọ Ịzirel umugholoor.”

¹⁶ Eḅon ạḍiroor ḍịeri phọ aḍio phọ aJosua ạsighe Ịzirel eghun etum eghun ạkoolomi, kụ eghun ẹpe aJuda kụ ẹdi osiphom bọ.

¹⁷ Kụ ọdi ạsighe iipolo phọ eghun phọ aJuda ạabemi, kụ ọto phọ ọpo aZera kụ ọdi osiphom bọ. Kụ ạsighe ọto phọ nyọpo aZera ạkoolomi, eghunotu etum eghunotu, kụ osiphom Zabdi.

¹⁸ Kụ ọdi ạsighe eghunotu aZabdi ạkoolomi, oye atum oye, kụ Akan ọony phọ aKami, ọony phọ aZabdi, ọony phọ aZera ọlo eghun aJuda kụ ọdi osiphom bọ.

¹⁹ AJosua ạḅeni Akan mọ, “Mọony ạmi, seseeny, ngọ rughuenian Ọmoogh-we phọ Ẹnaan phọ Ịzirel ạseph nyọdi. Kạaph amitiom ịpe nạ aḍighi bọ, kạ́booghi.”

²⁰ Akan ạphagharanaan Josua kụ ạḅem mọ, “Agey ni. Mị maḍighi ịkaraph ạpioman Ọmoogh-we Ẹnaan phọ Ịzirel. Ịphen kụ ịdi mị aḍighi bọ.

²¹ Mị ạmiin sịphe ạraraar phọ yoor owum bọ oniin ạdoni ọlo ạBabilon, silva dị ẹemor phọ ẹghiom ni ịyal igbogh ịtoom, ḅịle rꞌopoḍi agol dị ẹemor phọ ẹman epu egbem ogbogh ọtoom, kụ mị ạseph ạsighenom. Nyina kẹmiin dị oḍi ude sịphe ogbogo phọ ạmi, kụ asilva phọ odi ude.”

²² Kụ aJosua arom rụukpaany mọ oghiil ọghi ẹpe ogbogo phọ. Kụ ọmiin mọ ạraraar phọ oghel bọ ọkar oḍi sịphe, rꞌasilva phọ ude.

²³ Kụ bịdi oḍighiron rạraar phọ sịphe ogbogo phọ kụ ọsighe ọpham oruomonaan Josua rꞌoomo awe phọ Ịzirel, kụ osereghi ude egbodo Ọmoogh-we phọ.

²⁴ AJosua rꞌoomo awe phọ Ịzirel ụsighe ni Akan ọony phọ aZerah, silva phọ rꞌạdoni phọ rꞌopoḍi agol phọ, nmụny phọ ọdi, lephiri rꞌạnmanyaan, sịnam rꞌịnam adool phọ ọdi, iyool-ịga phọ ọdi rꞌogbogo phọ ọdi rꞌoomo aruphua phọ ọdi kụ bịdi ọsighe oomo ịne osiom ẹpe Eḍiiny Ịiḅaghami.

²⁵ Kụ aJosua ạḅeni nyọdi mọ, “Uḍighi ika kụ nạ ạsighe ịiḅaghami dị ẹrol ịduon uruom iyoor? Ọmoogh-we phọ kạsighe nyịidipho ịiḅaghami aruom nyịna.” Kụ oomo awe phọ Ịzirel ọsighe ikpo oroḅol Akan oghiigh; bịdi ọḅile oroḅol ikpo eghunotu ọdi kụ oguom bịdi rꞌaruphua ạbidi nịan.

²⁶ Kụ bịdi okpolom egu ipoḍi asighiigh ạnyu ọdi, kụ edi ghan kꞌarodon. Loor ịphen phọ okol esi phọ mọ Eḍiiny Ịiḅaghami kꞌarodon. Kụ ọghagh ologhi phọ Ọmoogh-we phọ ạwologhu.