Josua 3 - Ạḍinya Iigbia

Awe phọ Ịzirel mọḅeeny Ọphiiny ạJodan

¹ Ḍịroor bịn aJosua rꞌoomo awe phọ oḅon oḅetenu, ọḍua sịphe arugbogo ẹpe Akasia kụ ọghi osi Jọdan esi phọ bịdi ọrol bọ mem dị rọwa ọḅeeny ạJodan ophun.

² Kụ rẹman ịraar aḍughul-otu kụ bụo ạrumhu awe ẹgham mọ ọḍua ogbogo oten ogbogo,

³ kụ ọḅeni we phọ mọ, “Mem dị nyina ẹmiin Igbe Ịyo phọ Ọmoogh-we Ẹnaan phọ anyina dị ariil ạrikia phọ aLivai orool, pọ iikoroghian eḅetenu ẹdaph bịdi.

⁴ Nyina sịen kẹ̋rol ghan kꞌekulha kụ bịdi kiḍeenaan inyina eten ọghi. Kétuman igbe phọ. Ịtol esi dị ẹman oniin otobi ọḍua sịphe Igbe Ịyo phọ kụ oḅula ọman.”

⁵ AJosua ạḅeni we phọ mọ, “Iselemian siloor anyina, ịdi eḍighi bọ iḍue Ọmoogh-we phọ kaḍighi ni ịiḍaany sịen ogbo phọ anyina.”

⁶ AJosua ạḅeni bụpinyon rịkia phọ mọ, “Ịsighe Igbe Ịyo phọ erool eḍiemiom we phọ.” Kụ bịdi ọsighe Igbe Ịyo phọ orool oḍiemiom we phọ.

⁷ Kụ Ọmoogh-we phọ ạḅeni Josua mọ, “Arodon kụ ẹdi mị kamiigh bọ ophophe ạna ọbughe esi oomo awe phọ Ịzirel, ọbo bịdi olegheri mọ ịdipho mị ạrolom bọ Mozis kụ ịdi mị kạtuugh ạrolom nyịna.

⁸ Tọ ạḅeni bụpinyon rịkia phọ, bụphe orool bọ Igbe Ịyo phọ, mọ mem dị bịdi ọghi osi ẹpe oogbom ọnuronu Ọphiiny ạJodan bịn ọguph oḍigh kụ ọmeera sịphe.”

⁹ Kụ aJosua ạḅeni we phọ mọ, “Iḍuraan ẹebeeph ẹnaghan ịphen Ọmoogh-we Ẹnaan phọ anyina rạkaaph bọ.

¹⁰ Ịsien kụ esi dị nyina kẹsighe kụ elegheri mọ Ẹnaan phọ rémugh ghan bọ edianaan ni rꞌanyina kụ ọdi kạ́bile ophorogh ạbuo aKenanait phọ rꞌạHitait phọ rꞌaHivait phọ rꞌạPerezait phọ rꞌaGirgasait phọ rꞌẠmorait phọ rꞌaJebusait phọ.

¹¹ Ipogh, Igbe Ịyo phọ Ẹnaan phọ ẹmoogh bọ oomo aḅirini phọ kụ kẹpur ịḅeeny inyina Jọdan epun.

¹² Kụ nyịidipho ịson ḍioph rꞌịyal awe sịphe arughunughun phọ Ịzirel ẹsighe, eghun eghun, oye oye.

¹³ Kụ mem dị ariil ạrikia phọ, bụphe orool bọ Igbe Ịyo phọ Ọmoogh-we phọ Ẹnaan phọ ẹmoogh bọ oomo aḅirini phọ, mọtophori rạda aruwol sịphe ạmuum mọ ạJodan, ạJodan kasophe okil, kụ ạmuum mọ ạḍua bọ ẹpe ạnyu phọ kụ rasoor kaakpomoghan eniin esi akpolan aḍighi eḅum.”

^14-15 Iḍighi mem ibugha kụ aḍigho eḍigh ọphiiny phọ. Mem dị awe phọ ọḍuaghu sịphe rugbogo phọ ọḅeeny ạJodan, ariil ạrikia phọ kụ uḍia ọpham Igbe Ịyo phọ. Egina amem ịdipho ariil ạrikia phọ ọdaari ẹda bọ sịphe ọphiiny phọ

¹⁶ ạmuum mọ asophe okil bịn akpolan eḅum kꞌẹpe ogbo ọphiiny sịphe Ạdam, ẹmha dị edi ọogaany aZaretan; kụ ekiilom ạmuphe rasoor bọ kaḍigh Ọphiiny-Ạla phọ ẹkar bịn esophaan: kụ awe phọ oru ọḅeeny ophun esi dị etuman Jeriko.

¹⁷ Ịdipho awe phọ orelhe bọ rọḅeeny ḍịgharaghar ade, ariil ạrikia phọ ạbuphe orool bọ Igbe Ịyo phọ Ọmoogh-we phọ ụmeera ḍịgharaghar ade ogbo ạJodan, tụtu oomo awe phọ oten.