Josua 23 - Ạḍinya Iigbia

Ọghaaph dị aJosua ạghaaph akureriom

¹ Kụ ịphen phọ reru bọ reten, ibia ni mem mọ Ọmoogh-we phọ aḍighi bọ ịdi awe phọ Ịzirel oḍigh ạdol ophooghian esi ạbumulogh-ḍien phọ odi bọ ogbo ạbidi; mem mọ ạmuen phọ aJosua mạkpo, ariiḍio asiḍughul-otu phọ aJosua remunughan,

² kụ aJosua aakpomoghi oomo awe phọ Ịzirel, ikumoor awe phọ rꞌạbuo ạrumhu phọ rꞌạbuo ịiruen phọ rꞌạbuo iiḍighi phọ ạbidi, kụ ạḅeni bịdi mọ, “Nyina rẹmiin bọ ịduon mị mạkpo bọ, asiḍughul-otu aghuḍum mọ ạmi memunughan,

³ kụ nyina mẹmiin ni oomo ịpe Ọmoogh-we Ẹnaan phọ anyina eḍighi bọ oomo areelhe phọ loor ẹmhu phọ anyina, ịpe Ọmoogh-we phọ Ẹnaan phọ anyina eenaan bọ inyina.

⁴ Ipogh, mị mạsa ẹlhel ạsighe idiemi inyina reelhe phọ ịpe esugha bọ eḍighi bin ẹmoogh arughunughun phọ anyina ọḅaram rꞌoomo areelhe phọ ịpe mị asoph bọ ạsighe, emiigh ẹpe Jọdan ẹsighe ẹghi esiemi ẹpe Ọphiiny aMeditarenian ẹpe erumuḍio phọ remeel ghan bọ.

⁵ Ọmoogh-we Ẹnaan phọ anyina kaporogh ni bịdi ọḍuaghu risigh anyina, ạboor bịdi de phọ ạbidi risigh anyina, kụ nyina ẹmoogh de phọ ạbidi, ịdipho Ọmoogh-we Ẹnaan phọ anyina iguanaan bọ inyina.

⁶ Kụ iḍighi, ịmaar ẹphama siloor anyina esereghian eeko ghan eḍighi oomo ịpe ọge bọ sịphe ạḍinya Ologh phọ aMozis, ọbo nyina kekitonu ghan bọ ẹki elhiom mꞌekeeny,

⁷ ọbo nyina keeḍikuan ghan bọ rꞌareelhe phọ ịphen esugha bọ sịen ogbo phọ anyina eeghologhan siḍien ạrumugh phọ ạbidi. Íkunya ghan rụmugh phọ ạbidi, eeseeny bịdi. Ísooromi ghan siloor anyina ẹngo bịdi.

⁸ Ịḅararian loor Ọmoogh-we phọ Ẹnaan phọ anyina bịn, ịdipho nyina reḍighi ghan bọ kꞌarodon.

⁹ Ọmoogh-we phọ maphorogh iboom areelhe phọ ẹmoogh bọ ịikpo ạsighiogh risigh anyina. Oye ólho dị katue ạmerenyan egbodo anyina kꞌarodon.

¹⁰ Oniin ọnyo anyina bịn kaporogh ni oniin ọonir ạbidi, ịdi eḍighi bọ Ọmoogh-we Ẹnaan phọ anyina reenaan ghan inyina, ịdipho dị iguanaan bọ inyina.

¹¹ Kụ iḍighi, ịmaar ẹphama siloor anyina, ẹphomoghian Ọmoogh-we Ẹnaan phọ anyina.

¹² Eru mạar dị nyina ekiton eḅula ọman kụ ẹghi ẹḅophoghan rꞌịyal-ikpo ạbuen osugha bọ sịen areelhe phọ edi bọ ogbo anyina, kụ eephinighan, nyina ephinogh nmạnyaan ạbidi, bịdi ophinogh nmạnyaan anyina,

¹³ pọ ilegheri mọ Ọmoogh-we Ẹnaan phọ anyina káporogh mun reelhe phọ ịphen esugha bọ risigh anyina. Kpạripe bịdi koḍighi ooto rꞌosooromineen ịdipho asiphil mꞌịka dị ịdianaan inyina, ọkigh ịdipho aruuḅurom riḍien anyina ḅịle rꞌiitoor dị kigimi ghan inyina tụtu nyina epe eguul emuneen sịen ẹmha phọ, ade phọ ạḍien Ọmoogh-we phọ Ẹnaan phọ anyina ịngo bọ inyina.

¹⁴ “Ipogh. Nyịidipho amem ạmi mẹteeny omugh. Oomo phọ anyina elegheri ni sịphe iloghi phọ anyina rꞌaruwaloor phọ anyina mọ rꞌeniin ịyaar dị úḍighi ílho esi oomo igey ạraraar phọ ịpe Ọmoogh-we Ẹnaan phọ anyina iguanaan bọ inyina. Oomo phọ ịdi memiteghu etu eten, ịyaar ísugha.

¹⁵ Kụ esi oomo igey ạraraar phọ ịpe Ọmoogh-we Ẹnaan phọ anyina iguanaan bọ inyina, ọdi miḍighinaan ni inyina ạmadan. Ịdipho kẹn kụ ịdi Ọmoogh-we phọ kạsighe oomo ịkaraph ạraraar phọ ịpe ị́nighe bọ isoroghuom inyina tụtu nyina eguul ephe emuneen sịphe aḍiiḅi ade phọ ḍịphe Ọmoogh-we Ẹnaan phọ anyina ịngo bọ inyina.

¹⁶ Eru mạar dị nyina ẹphioman kụ ẹepu ịyo phọ ịpe Ọmoogh-we Ẹnaan phọ anyina eghiran bọ kụ ạlogh ologh ịngo inyina, kụ nyina ẹghi kụ reeseeny ịnon ạrumugh ekpuḍian ẹeḅereghi ịnon ạrumugh, pọ Ọmoogh-we phọ kịghagham ni inyina ọghagh ologhi dị kạbugh ni iboom bịn iigulemi inyina apiemi sịphe aḍiiḅi ade phọ dị ịngo bọ inyina.”