Josua 22 - Ạḍinya Iigbia

AJosua aḅulemi ịyal rꞌạpakiri arughunughun phọ ẹmha ạbidi

¹ Kụ aJosua aakpomoghi eghun aRuben, eghun ạGad rꞌọphori phọ opol eghun ạManase,

² kụ ạḅeni bịdi mọ, “Nyina meeko ni oomo ịpe aMozis otelhedom mọ Ọmoogh-we phọ ạlogh bọ ologh ịngo inyina kụ nyina ịnaghanan bọ ni ịmi esi oomo ịpe mị ạlogh bọ ologh ịngo inyina.

³ Kụ nyina ị́bile bumor phọ anyina oomo asiḍughul-otu phọ ịpe meten bọ eru ẹteeny kꞌarodon, kụ ẹdaph ghan iilogh phọ ịpe Ọmoogh-we Ẹnaan phọ anyina ạlogh bọ ịngo inyina kụ ẹtuugh eḍighi.

⁴ Kụ nyịidipho Ọmoogh-we Ẹnaan phọ anyina mạngo bumor phọ anyina ophooghian ịdipho dị aguanaan bọ bịdi; esi ịphen phọ kụ iḍighi, iḅula egheel ẹpe arugbogo phọ anyina ẹpe ade abin ẹmoogh phọ anyina, ḍịphe aMozis otelhedom Ọmoogh-we phọ ịngo bọ inyina ạga emitenom erumuḍio phọ ạJodan.

⁵ Ịmaar ẹphama siloor anyina eeko ghan iilogh phọ rꞌologh phọ ọpo aMozis otelhedom mọ Ọmoogh-we phọ ạlogh bọ ịngo inyina. Ịpomoghian Ọmoogh-we Ẹnaan phọ anyina, erelhe ghan oomo areten phọ ọdi, ẹḅile eeko iilogh phọ ọdi, eḍighom nyọdi rꞌooseeny ọdi rꞌoomo ologhi rꞌaruwaloor phọ anyina.”

⁶ Kụ aJosua ạseph bịdi kụ ạḅeni bịdi mọ ikeel, kụ bịdi ogheel ẹpe arugbogo phọ ạbidi.

⁷ Oniin opol eghun ạManase aMozis ạngo bịdi bin ẹmoogh ẹlo ạbidi ẹpe Bạsan, kụ ọphori phọ eghun ạManase aJosua ạngo bịdi bin ẹmoogh ẹlo ạbidi atumeriom bumor phọ ạbidi ẹpe erumuḍio remeel ghan bọ ẹpe Jọdan. Kụ mem mọ aJosua ạḅeni bọ bịdi mọ ikeel ẹpe arugbogo phọ anyina kụ ạseph bịdi kụ ạḅeni bịdi mọ,

⁸ “Ikeel ẹpe arugbogo phọ anyina ẹmoogh eboom ẹelha, ẹmoogh ịnam-otu dị eḍiza ẹphughan, silva, gol, enaba, rukuron, ẹmoogh rukpe emuzeḍi, ẹsighe ruphua ạbumulogh-ḍien phọ anyina ịpe nyina ewum bọ abumor phọ anyina rꞌanyina edian.”

⁹ Eghun aRuben, eghun ạGad rꞌọphori phọ opol eghun ạManase ọgbatanaan we phọ Ịzirel sịphe Sailo ọḍua ẹpe ade phọ aKenan, ogheel ẹpe ẹmha ạGiliad bin ade ẹmoogh nyẹpe ạbidi, ọdaph ikpo ọnhu phọ ịpe Ọmoogh-we phọ ạḅeni bọ Mozis.

Ọkan enmeny ạrikia otumeriom Jọdan

¹⁰ Mem dị bịdi ọghi osi Gelilot ẹpe oogbom ạJodan, ẹpe ade phọ aKenan, eghun aRuben, eghun ạGad rꞌọphori phọ opol eghun ạManase ọkan sịphe phọ eboom enmeny ạrikia dị ẹphughan ophogh, otumeriom Jọdan.

¹¹ Kụ awe phọ Ịzirel ọnaghan kụ ọḅem mọ, “Ipogh. Eghun aRuben, eghun ạGad rꞌọphori phọ opol eghun ạManase mọkan enmeny ạrikia sịphe esomanan ade phọ aKenan ẹpe etuman bọ Jọdan, ạga phọ nyọpo ayoor.”

¹² Mem dị awe phọ Ịzirel ọnaghan bọ ịphen phọ kụ oomo ạbidi ookpomoghan egina esi ẹpe Sailo ịlo ọghi ozuom ịyal rꞌạpakiri arughunughun phọ ẹgham.

¹³ Kụ awe phọ Ịzirel orom Fịnehas ọony phọ Ẹliazar oyil ạrikia phọ ọghiom eghun aRuben, eghun ạGad rꞌọphori phọ opol eghun ạManase ẹpe ade phọ ạGiliad.

¹⁴ Aḍioph ikpolom awe ụdapham ni Fịnehas; eghun eghun oye oye sịphe oomo arughunughun phọ Ịzirel. Bụen phọ kụ ạbuo ạrumhu sịphe aruutu ạburude phọ ạbidi, sịphe ogbo ạsimuunir awe phọ Ịzirel.

¹⁵ Kụ bịdi ọghi ọteeny eghun aRuben, eghun ạGad rꞌọphori phọ opol eghun ạManase ẹpe ade ạGiliad, kụ bịdi ọghaaphan rꞌạbidi kụ opuru bịdi mọ,

¹⁶ “Ịphen kụ ịdi aḍita ookpomoghan phọ Ọmoogh-we phọ ụḅeni iyoor mọ ipuru inyina mọ, ‘Ịphen phọ nyina eḍighi bọ ịghen? Ipeel phọ ịphen nyina eḍighi bọ ẹpioman esi Ẹnaan phọ Ịzirel. Nyina mẹwile ọdaph Ọmoogh-we phọ rodon, ẹkan enmeny ạrikia ẹlo anyina, ẹmoogh oḅom ẹmhu dị aleeny ịduon esi Ọmoogh-we phọ rodon.

¹⁷ Ạsipioghom mọ aPior ịbam ni ḍụghum, ịpe yira korue bọ ni okpetenaan kꞌarodon, ịpe ẹtu bọ kụ ạreezegh esoorom bọ ookpomoghan Ọmoogh-we phọ,

¹⁸ bịn rodon nyina mẹgbatanaan ẹbile ọdaph Ọmoogh-we phọ? Kụ eru dị nyina ẹpioman Ọmoogh-we phọ rodon, tụ pọ iḍue dị kạliom ghẹlhe phọ ọdi oomo ookpomoghan phọ Ịzirel.

¹⁹ Nyịidipho eru mạar dị ade phọ ạḍien anyina ị́zala, pọ ịḅeeny ephun ẹpe ade phọ Ọmoogh-we phọ, ẹpe ọlogh bọ Ogbogo Ạdol Ọmoogh-we phọ, kụ ephin bin ẹmoogh ẹlo anyina. Kẹ́pioman esi Ọmoogh-we phọ, eḍighi ịdi ẹrol dị yoor kụpioman, dị nyina kẹkan enmeny ạrikia ẹlo anyina, dị ítu enmeny phọ nyẹpe Ọmoogh-we Ẹnaan phọ ayira.

²⁰ Akan ọony phọ aZera, ạphue ḍịen omeeraam mọ ọdi loor ạraraar phọ ịpe ọgbatan bọ ọngo Ẹnaan, kụ ạghelhe phọ asoorom bọ oomo ookpomoghan phọ Ịzirel? Ọdi bịn kụ óguul bọ loor ạsipioghom mọ ọdi?’”

²¹ Kụ eghun aRuben, eghun ạGad rꞌọphori phọ opol eghun ạManase ọphagharanaan kụ ọḅeni bụo ạrumhu arughunughun phọ Ịzirel mọ,

²² “Ẹnaan phọ ẹpe epu bọ oomo ạrumugh, Ẹnaan Ọmoogh-we phọ; Ẹmugh phọ ẹpe epu bọ oomo ạrumugh, Ẹnaan Ọmoogh-we phọ. Ọdi alegheri ni. Ịzirel rꞌaloor ạbidi olegheri ni. Mụghumo oḅom ẹmhu, kẹn, mụghumo ọpioman esi Ọmoogh-we phọ, pọ ọdi iyoor kụ́wilenaan rodon.

²³ Mọ yoor ụ́tuan eeghe kụ ọkan enmeny ạrikia ẹlo ayoor, mọ pọ yoor mọwile ọgbatanaan ọdaph Ọmoogh-we phọ, ọphinyon ạrikia oguom ạnian, mꞌạraraar aghuḍum ịnam mꞌạrikia ẹboroph ạnyu ịsiphe, pọ Ọmoogh-we phọ kụ upuru iyoor.

²⁴ Mụghumo yoor mụutughian bọ oḍighi ịphen phọ, kụ ḍio-pọ, ạnmuny anyina mụḅeniom ghan nmụny ayoor kụ opuru ghan nmụny ayoor mọ, ‘Nyina ị́moogh aani eeghe ịyaar oḍighinom Ọmoogh-we Ẹnaan phọ Ịzirel?

²⁵ Ọmoogh-we phọ mạsighe Jọdan aḍighi ọku anyina rꞌayoor. Nyina eghun aRuben rꞌeghun ạGad, nyina ị́moogh bin esi Ọmoogh-we phọ.’ Kụ iḍighi kụ ạnmuny anyina koḍighi ịdi yoor kọbile ọoḅereghi Ọmoogh-we phọ.

²⁶ Kụ iḍighi kụ yoor ọtu bọ oopuruan mọ ọkan enmeny ạrikia ẹlo ayoor.

²⁷ Eḍighi ịyaar dị kẹgba ghan emitiom ịlo anyina rꞌayoor, rꞌoghiil phọ ayira ọpo ratu bọ, mọ yoor uḍighi ghan ni oḍighi phọ Ọmoogh-we phọ sịphe Ogbogo ọphinyon aani ghan ni rịkia oguom ạnian rꞌịngooghineen rꞌạrikia ẹboroph phọ ayoor, ọbo ạnmuny anyina kẹ́ḅeniom ghan bọ nmụny ayoor, ḍio-pọ, mọ yoor ụ́moogh bin esi Ọmoogh-we phọ.

²⁸ Kụ yoor ọotughian bọ mọ, eru mạar dị ịphen phọ kụ eru ịdi kụḅeniom ghan iyoor rꞌạnmuny ayoor oghiil phọ ọpo ratu bọ, yoor kọḅem ghan mọ, ‘Ịmiin! Yoor ụtuugh enmeny ạrikia phọ Ọmoogh-we phọ nyẹpe ạburude phọ ayoor ọkan bọ. Kẹ́lo ạrikia oguom ạnian, kẹn, kẹ́lo ịngooghineen, ụtuan mọ eḍighi ịyaar dị kẹgba ghan emitiom ịlo anyina rꞌayoor.’

²⁹ Ịlo ayoor ríḍigh, dị yoor kọpioman Ọmoogh-we phọ, ọgbatanaan ọbile ọdaph Ọmoogh-we phọ rodon, ọkan enmeny ạrikia oguom ạnian mꞌịyaar aghuḍum ịnam mꞌịngooghineen, omuton enmeny ạrikia phọ Ọmoogh-we Ẹnaan phọ ayira ẹpe ẹmeera bọ sịphe Ogbogo phọ ọdi.”

³⁰ Mem dị ạFinehas oyil ạrikia phọ rꞌikpolom awe ookpomoghan phọ Ịzirel rꞌạbuo ạrumhu sịphe oomo arughunughun phọ ọnaghan bọ ịpe eghun aRuben, eghun ạGad rꞌọphori phọ opol eghun ạManase ọghaaph bọ, ịḅeeraan ni bịdi igey.

³¹ Kụ ạFinehas ọony phọ Ẹliazar oyil ạrikia phọ ạḅeni eghun aRuben, eghun ạGad rꞌọphori phọ opol eghun ạManase mọ, “Rodon yoor olegheri mọ Ọmoogh-we phọ odi ni ogbo ayira, ịdi eḍighi bọ nyina ị́pioman Ọmoogh-we phọ ịphen nyina eḍighi bọ. Nyịidipho nyina mẹphel we phọ Ịzirel ẹsighe ḍịghaagh Ọmoogh-we phọ.”

³² Kụ ạFinehas ọony phọ Ẹliazar oyil ạrikia phọ rꞌikpolom awe phọ ọḍua kꞌeghun aRuben rꞌeghun ạGad ẹpe ade phọ ạGiliad ogheel ẹpe ade phọ aKenan, ọteeny we phọ Ịzirel kụ ọghaaph oomo phọ ịdi ọḅeni.

³³ Kụ ịpe bịdi ọghaaph bọ ịḅeeraan ni we phọ Ịzirel igey, kụ awe phọ Ịzirel ọseph Ẹnaan, kụ ụ́kaaph mun ịlo ọghi ozuom ạbidi ẹgham ophiemi ade phọ ḍịphe eghun aRuben rꞌeghun ạGad orugh bọ.

³⁴ Eghun aRuben rꞌeghun ạGad oghol enmeny ạrikia phọ mọ, “Ọgba omitiom ogbo ayira,” kụ bịdi ọḅem ghan mọ rẹgba ghan kemitiom mọ Ẹnaan kụ Ọmoogh-we phọ.