Josua 21 - Ạḍinya Iigbia

Igbogh ạramha ạbuo aLivai

¹ Bụo ạrumhu ịsiphe ropolo ạbuo aLivai phọ ọghi ọteeny Ẹliazar oyil ạrikia phọ, Josua ọony phọ ạNon, rꞌạbuo ạrumhu arughunughun phọ awe Ịzirel,

² kụ opuru bịdi ẹpe Sailo ẹpe de phọ aKenan kụ ọḅeni bịdi mọ, “Ọmoogh-we phọ ạlogh ni ologh ạngo Mozis mọ ọdi ụngaani ni iyoor rạmha ịlo yoor kotugh ẹphen etuman bọ de ịḅal phọ, ẹlo ịnam-otu phọ ayoor.”

³ Kụ awe phọ Ịzirel ọsighe sịphe asibin phọ ạbidi ọngaani bụo aLivai, loor ologh phọ ọpo Ọmoogh-we phọ ạlogh bọ, rạmha phọ ịphen rꞌarere ịḅal ịnam mọ ạbidi.

⁴ Kụ ẹlhel ẹlo ọto aKohatait emite. Ẹlhel phọ iphinanaan bin ẹmoogh ẹlo ọophi kꞌEeron oyil ạrikia phọ ḍioph rꞌịraar ạramha ịpe eghun aJuda, eghun ạSimion rꞌeghun ạBenjamin ẹmoogh bọ.

⁵ Ẹlhel phọ iphinanaan bin ẹmoogh ẹlo ạbueri phọ aKohatait ḍioph ạramha ịpe eghun Ifraim, eghun ạDan rꞌạpakiri eghun ạManase ọmoogh bọ.

⁶ Ẹlhel phọ iphinanaan bin ẹmoogh ẹlo ọto aGerson ḍioph rꞌịraar ạramha ịpe eghun Ịsaka, eghun Ạser, eghun ạNaftalai rꞌọphori phọ opol eghun ạManase ẹpe Bạsan ọmoogh bọ.

⁷ Ẹlhel phọ iphinanaan bin ẹmoogh ẹlo ọto aMerari ḍioph rꞌịyal ạramha ịpe eghun aRuben, eghun ạGad rꞌeghun ạZebiulon ọmoogh bọ.

⁸ Awe phọ Ịzirel ọsa ẹlhel kụ ọsighe rạmha phọ ịphen rꞌarere ịḅal ịnam mọ ạbidi ọngo bụo aLivai, ịdipho Ọmoogh-we phọ ạlogh bọ ologh ạngo Mozis.

^9-10 Ịphen phọ ọgo bọ sịen kụ ạramha phọ ịpe eghun aJuda rꞌeghun ạSimion ọngo bọ bụo ọophi kꞌEeron sịphe iipolo aKohatait ạbuo aLivai (abin mụo ạbidi kụ ạmuḅel abin):

¹¹ ọngo bịdi Kịriat Arba (ịduon phọ pọ ạHebron) ẹpe aroogbolom mọ aJuda rꞌarere ịḅal ịnam mọ eko bọ bịdi ekitonom. (Ọde Anak kụ Arba phọ).

¹² Kụ sileeny phọ rꞌịbam ạramha phọ bịdi ụsighe ọngo Kẹleb ọony phọ aJefune bin ẹmoogh ẹlo ọdi.

¹³ Ọophi kꞌEeron oyil ạrikia phọ, ụngo bịdi Hẹbron, ẹmha dị ạrookom-enu kosuma ghan okeel, Libna,

¹⁴ Jatir, Estemoa,

¹⁵ Holon, Debir,

¹⁶ Ain, Juta, Bẹt Semes rꞌarere ịḅal ịnam mọ ạbidi. Esugha ạramha kụ ịdi bịdi ọsighe bọ sịphe ịyal phọ arughunughun.

¹⁷ Ịphen kụ ạramha phọ ịpe eghun ạBenjamin ọngo bọ bịdi: Gịbion, Geba,

¹⁸ Anatot, Almon rꞌarere ịḅal ịnam mọ ạbidi; inya ạramha.

¹⁹ Ạramha ịlo ariil ạrikia bụo ọophi kꞌEeron ẹman bọ ḍioph rꞌịraar ạramha rꞌarere ịḅal ịnam mọ ạbidi.

²⁰ Ẹlhel phọ iphinanaan bọ bin ẹmoogh ẹlo ịpheri phọ iipolo aKohatait ạbuo aLivai, rạmha phọ ọngo bọ bịdi ịḍua eghun Ifraim.

²¹ Ụngo bịdi Sẹkem ẹpe aroogbolom mọ Ifraim, ẹmha dị ạrookom-enu kosuma ghan okeel, Gezer,

²² Kibzaim, Bẹt Horon rꞌarere ịḅal ịnam mọ ạbidi; inya ạramha.

²³ Ịphen kụ ạramha phọ eghun ạDan ọngo bọ bịdi: Elteke, Gibeton,

²⁴ Aizalon, Gạt Rimon rꞌarere ịḅal ịnam mọ ạbidi: inya ạramha.

²⁵ Ịphen kụ ạramha phọ ạpakiri eghun ạManase ọngo bọ bịdi: Taanak, Gạt Rimon rꞌarere ịḅal ịnam mọ ạbidi; ịyal ạramha.

²⁶ Ḍioph ạramha phọ ịphen rꞌarere ịḅal ịnam mọ ạbidi kụ ọngo bọ ịpheri phọ aropolo ạbuo aKohatait.

²⁷ Ịphen kụ ạramha phọ ọphori phọ ạpakiri eghun ạManase ọngo bọ iipolo aGerson ạbuo aLivai: Golan ẹpe Bạsan (ẹmha dị ạrookom-enu kosuma ghan okeel), Beestera rꞌarere ịḅal ịnam mọ ạbidi: ịyal ạramha.

²⁸ Ịphen kụ ạramha phọ eghun Ịsaka ọngo bọ bịdi Kịsion, Daberat,

²⁹ Jamut, En Gannim rꞌarere ịḅal ịnam mọ ạbidi; inya ạramha.

³⁰ Ịphen kụ ạramha phọ eghun Ạser ọngo bọ bịdi: Misal, Abdon,

³¹ Helkat, Rehob rꞌarere ịḅal ịnam mọ ạbidi: inya ạramha.

³² Ịphen kụ ạramha phọ eghun ạNaftalai ọngo bọ bịdi: Kedes ẹpe Galili (ẹmha dị ạrookom-enu kosuma ghan okeel), Hamot Dor, Kạtan rꞌarere ịḅal ịnam mọ ạbidi: ịraar ạramha.

³³ Ḍioph rꞌịraar ạramha phọ ịphen rꞌarere ịḅal ịnam mọ ạbidi kụ ọngo bọ iipolo phọ aGerson.

³⁴ Ịphen kụ ạramha phọ eghun ạZebiulon ọngo bọ bụeri phọ aLivait bụo iipolo phọ aMerari: Jokniam, Kata,

³⁵ Dimna, Nạhalel rꞌarere ịḅal ịnam mọ ạbidi: inya ạramha.

³⁶ Ịphen kụ ạramha phọ eghun aRuben ọngo bọ bịdi: Bezer, Jahaz,

³⁷ Kedemot, Mefaat rꞌarere ịḅal ịnam mọ ạbidi: inya ạramha.

³⁸ Ịphen kụ ạramha phọ eghun ạGad ọngo bọ bịdi: Ramot Gịliad (ẹmha dị ạrookom-enu kosuma ghan okeel), Mahanaim,

³⁹ Hesbon, Jazer rꞌarere ịḅal ịnam mọ ạbidi: inya ạramha.

⁴⁰ Ọsa ẹlhel kụ ọsighe ḍioph rꞌịyal ạramha phọ ịphen ọngo bụeri phọ aLivait bụo iipolo phọ aMerari.

⁴¹ Oomo ạramha phọ ạbuo aLivai edi bọ sịphe areelhe awe phọ Ịzirel, ẹman bọ inyadi rꞌọphaanya ạramha ọḅaram rꞌarere ịḅal ịnam mọ ạbidi.

⁴² Tọrobo ẹmha ẹmoogh ni rere ịḅal ịnam mọ dị eko bịdi ekitonom. Ịduon kụ ịdi oomo ạramha phọ ẹrol bọ.

Awe Ịzirel morugh de phọ ọmadan

⁴³ Ọmoogh-we phọ ạngo we phọ Ịzirel oomo ade phọ ḍịphe ọdi aghunya bọ ạngo bụrude phọ ạbidi, kụ bịdi ọmoogh de kụ orughogh.

⁴⁴ Ọmoogh-we phọ ạngo bịdi ẹepho rꞌophooghian oomo eelhe phọ, ịdipho dị aghunya bọ ạngo bụrude phọ ạbidi. Ạbumulogh-ḍien phọ ạbidi útue ụ́merenyan bịdi, ịdi eḍighi bọ Ọmoogh-we phọ arorori oomo ạbumulogh-ḍien phọ ạbidi ạngo bịdi.

⁴⁵ Kụ oomo igey aruguan phọ ịpe Ọmoogh-we phọ aguanaan bọ we phọ Ịzirel, ẹlo ẹpiom ị́tol; ịtuugh ni oomo ịpe ọdi aguanaan bọ kụ emite.