Josua 18 - Ạḍinya Iigbia

Amadi arere phọ esugha bọ

¹ Oomo aḍita awe phọ Ịzirel ookpomoghan egina esi ẹpe Sailo kụ ọlogh Ogbogo Ạdol Ọmoogh-we phọ sịphe phọ, kụ ade phọ eḍighi ḍịo ạbidi.

² Esugha bọ oḍual arughunughun sịphe awe Ịzirel dị kọ̋moogh aani bin ẹmoogh ẹlo ạbidi.

³ AJosua apuru we phọ Ịzirel mọ, “Kꞌạpur amem kụ ẹdi nyina kẹbile bọ ọlhoghom ụden, ọghi ọmoogh ade phọ Ọmoogh-we Ẹnaan ạburude phọ anyina ịngo bọ inyina.

⁴ Imitiom ịraar ịraar awe eghun eghun ịngo ịmi. Mị katom bịdi ọghi oḅiligha ọge ịlo awe ekpisi phọ ọrol, bụphe orugh bọ sịphe ade phọ ọsighe urom ịmi.

⁵ Bịdi ọsighe odi oḍual abin. AJuda kụ ọku ẹpe ạḍighaagh esoorom mọ, ạJosef kụ ọku ẹpe ạḍighaagh ephunom phọ.

⁶ Kụ ẹmaar ẹmaaghi ịlo ade phọ, edi oḍual abin, kụ ẹsighe ịpe nyina ẹmiin bọ ẹge ẹsighe iruom ịmi sịen; kụ mị ịsaami inyina ẹlhel sịen egbodo phọ Ọmoogh-we Ẹnaan phọ ayira.

⁷ Eghun aLivai ụ́ḅaran bin rꞌanyina loor esi dị oḍighi ọphinyon ghan ạrikia Ọmoogh-we phọ kụ abin mụo ạbidi. Eghun ạGad, eghun aRuben rꞌọphori phọ opol eghun ạManase mọmoogh bin mụo ạbidi ẹpe ẹḅeenyom ạJodan ẹpe erumuḍio phọ remite ghan bọ, ẹpe aMozis otelhedom Ọmoogh-we phọ ạngo bọ bịdi.”

⁸ Kụ awe phọ oḅetenu ọghi, kụ aJosua ạlogh ologh ạngo bụphe rọki bọ ọge ịlo ade phọ ẹrol kụ ạḅem mọ, “Ịki erelhe ekitonom de phọ, kụ ẹge ịpe ade phọ ẹrol bọ. Ịḅile ẹsighe iruom ịmi. Mị kạtol sịen ịsaami inyina ẹlhel sịen egbodo Ọmoogh-we phọ sịen Sailo.”

⁹ Kụ awe phọ ọghi orelhe de phọ okitonom kụ ọge loor ạḍinya ịlo ẹmha rꞌẹmha, kụ odi oḍual abin sịphe ạḍinya phọ, kụ oḅula oru ọteeny Josua, ẹpe arugbogo phọ sịphe Sailo.

¹⁰ Kụ aJosua ạsaami bịdi ẹlhel sịphe Sailo egbodo Ọmoogh-we phọ. AJosua ạrol sịphe kụ adiemi de phọ we phọ Ịzirel, bụo abin rꞌabin.

Arere dị ọngo eghun ạBenjamin

¹¹ Kụ ẹlhel phọ ẹlo eghun ạBenjamin emite eḍeenaan ẹlo ọto rꞌopolo, kụ eghun aJuda rꞌeghun ạJosef kụ ụkuan ọku.

¹² Kụ ọku ọlo ạbidi ẹpe ḍịghaagh ephunom phọ ạḍua ẹpe Jọdan, ạsighe ạki asiemi ẹpe ịigaany aJeriko ḍịghaagh ephunom, ạḍua ạki asi ẹpe aroogbolom mọ ẹpe erumuḍio phọ remeel ghan bọ, ạsighe ạki asi ẹpe ẹdala phọ ạBet Aven.

¹³ Kụ ọku phọ ạḍua sịphe aago ạki asi ẹpe Luz (ịduon phọ pọ ạBetel) ẹpe ḍịghaagh esoorom, ạsighe ạki asi ẹpe Atarot Adar etuman ẹeḅaraph phọ edi bọ ẹpe ḍịghaagh esoorom ạBet Horon.

¹⁴ Ọku phọ ạḍua sịphe akiton ạki ọnon ạga akiton ẹpe erumuḍio phọ remeel ghan bọ ḍịghaagh esoorom, ạḍua sịphe ẹeḅaraph phọ edi bọ esoorom ọtol ropogh Bẹt Horon. Eekuna ọku phọ edi ẹpe Kịriat Baal (ịduon phọ pọ ạKiriat Jiarim). Eghun aJuda kụ ụmoogh ẹmha phọ; phọn kụ ọku ẹpe erumuḍio phọ remeel ghan bọ.

¹⁵ Kụ ọku esoorom mọ amiigh ẹpe eekuna ạKiriat Jiarim, kụ ọku phọ ạḍua ạki ẹpe emeelom erumuḍio phọ kụ ạki asi ẹpe arokol aNeftoa.

¹⁶ Kụ ọku phọ ạḍua sịphe ạki asi ẹpe eekuna ẹeḅaraph phọ koten kụ ọteeny ẹpe Eḍiiny Hinom ẹpe edi bọ ephunom eekuna Eḍiiny aRefaim, kụ ạḍua sịphe ạki asi ẹpe Eḍiiny aHinom, atuman ịigaany aJebus esoorom mọ kụ ạḍua ạki asi En Rogel.

¹⁷ Kụ ạḍua ẹpe ephunom mọ ạsighe ạki asi En Semes ạḍua ạki asi Gelilot, ọtol ropogh ẹpe rẹki bọ Adumim kụ ạḍua ạki asi ẹpe aḍighiigh phọ aBohan ọony phọ aRuben.

¹⁸ Kụ ạḍua sịphe aten ạki asi ịigaany Bẹt Araba ẹpe ephunom mọ, ạki asi Eḍiiny ạJodan.

¹⁹ Ọku phọ aten ạki asi ịigaany Bẹt Hogla ẹpe ephunom mọ, ạḍua ạki asi ẹpe ephunom ọphu Ọphiiny-Ạla phọ eekuna esoorom ạJodan. Ọphon kụ ọku ẹpe esoorom mọ.

²⁰ ẠJodan kụ ọku emitenom mọ. Mụen kụ abin ẹmoogh ẹlo eghun ạBenjamin, ọdaph ropolo phọ ạbidi.

²¹ Kụ ạramha ịlo eghun ạBenjamin bụo ọto rꞌopolo ịphen: Jeriko, Bẹt Hogla, Emek Keziz,

²² Bẹt Araba, Zemaraim, Bẹtel,

²³ Avim, Para, Ofra,

²⁴ Kefaramoni, Ofni, Geba; igbogh rꞌịbam ạramha ẹman bọ ḍioph rꞌịyal ạramha.

²⁵ Gịbion, Rama, Beerot,

²⁶ Mizpa, Kefira, Moza,

²⁷ Rekem, Ipeel, Tarala,

²⁸ Zela, Ha Elef, Jebus (ịduon phọ pọ aJeruselem), Gibia, Kịriat Jiarim; igbogh rꞌịbam ạramha ẹman bọ ḍioph rꞌinya ạramha. Mụen kụ abin ẹmoogh ẹlo eghun ạBenjamin, bụo ọto rꞌopolo.