Josua 17 - Ạḍinya Iigbia

Arere ẹpe eelhe phọ aKenan ḍịo ạpakiri eghun ạManase

¹ Ịduon kụ ẹdi odiemi bin ẹmoogh ẹlo eghun ạManase. Ụsighe ni Gịliad rꞌạBasan ẹpe ẹḅeenyom ạJodan ọngo Makir ọde phọ ạGiliad, loor esi dị ọdi kụ ọkpana ọony ạJosef rꞌoye ẹgham.

² Kụ odiemi ḍịeri ade phọ ẹpe erumuḍio phọ remeel ghan bọ ọngo Abiezer, Helek, Ạsriel, Sẹkem, Hefer rꞌaSemida, bụo ọto rꞌopolo. Bụen kụ ọkaraghi ạbudi ọḍua ọkuruḅaka ạManase ọony phọ ạJosef kụ omite.

³ AZelofahad ọony phọ aHefer ọony phọ ạGiliad ọony phọ aMakir ọ́mar olephiri ọony, ạmar nmạnyaan bịn. Ịphen asiḍien ạnmanyaan phọ ọdi: Mala, Noa, Hogla, Milka rꞌaTirza.

⁴ Kụ bịdi ọghi ọteeny Ẹliazar oyil ạrikia phọ rꞌaJosua ọony phọ ạNon rꞌạbuo ạrumhu phọ kụ ọḅeni mọ, “Ọmoogh-we phọ ạḅeni ni Mozis mọ ọdi ụngaani iyoor bin ẹmoogh mụo ayoor sịphe abumor phọ ayoor.” Kụ loor esi ologh phọ Ọmoogh-we phọ ạlogh bọ, aJosua ạngo ni bịdi bin ẹmoogh ẹlo ạbidi sịphe abumor ọde phọ ạbidi.

⁵ Kụ ịphen phọ eḍighi ịdi abin eghun kꞌạManase aḍighi ḍioph abin ạloghom bin ade phọ ạGiliad rꞌạBasan ạga emitenom erumuḍio phọ ạJodan,

⁶ ịdi eḍighi bọ ạnmanyaan phọ ạManase rꞌalephiri ạnmuny phọ ọdi kụ uphinogh ọkuanagh ịiku; kụ de phọ ạGiliad udiemi bụeri phọ ạnmuny phọ ạManase.

⁷ Ọku ọlo eghun ạManase ạḍua ạki asi Ạser, ạki asi Mikmetat ẹpe Sẹkem erumuḍio phọ remite ghan bọ, kụ ọku phọ akiton ạki asi ẹpe ḍịghaagh esoorom ạbuphe orugh bọ ẹpe En Tapua.

⁸ Ade phọ etuman bọ Tapua ạḍio ạManase, kụ ẹmha phọ aTapua edi bọ sịphe ọku phọ ẹlo eghun Ifraim.

⁹ Ọku phọ ạsighe ạki asiemi ẹpe okol ạKana. Ḍịghaagh esoorom okol phọ, ạramha phọ Ifraim ịphen eeḍikuan ni rꞌạramha ịpe ạManase. Ọku ọlo ạManase aten ẹpe ạḍighaagh ephunom okol phọ. Ọphiiny aMeditarenian kụ eekuna ọku phọ.

¹⁰ Ạḍighaagh esoorom mọ ẹlo Ifraim, ạḍighaagh phọ ephunom mọ ẹlo ạManase; Ọphiiny aMeditarenian kụ ọku ạbidi. Bịdi otugh ni ọokpuronaan, ẹpe Ạser ḍịghaagh ephunom, ẹpe Ịsaka ẹpe erumuḍio phọ remite ghan bọ.

¹¹ Ẹpe Ịsaka rꞌẹpe Ạser, ạManase kụ ạmoogh Bẹt Sạn rꞌIbleam rꞌịbam ạramha phọ ạbidi, ḅịle rꞌaDor, rꞌEn Dor rꞌaTaanak rꞌaMegido rꞌịbam ạramha phọ ạbidi.

¹² Kụ awe phọ ạManase útue úporogh bụphe orugh bọ ẹpe ạramha phọ ịpe phọ; bụo aKenanait phọ ọkanan ni otugh sịphe ade phọ.

¹³ Kụ awe phọ Ịzirel rọmanam rọmoogh ịnyaam, kụ bịdi ọsighe we aKenanait phọ oseere dọl ịminimiin, úporogh bịdi mọ ị́ḍuaghu.

Eghun Ifraim rꞌạpakiri eghun ạManase ọwa mọ ọbughe rere phọ ạbuno

¹⁴ Kụ eghun ạJosef opuru Josua mọ, “Uḍighi ika kụ nạ ụngo bọ iyoor muniin abin bịn. Nạ ạmiin bọ ni mọ yoor aḍita kụ Ọmoogh-we phọ ụseph bọ ni iyoor?”

¹⁵ Kụ aJosua ạphagharanaan bịdi mọ, “Eru mạar dị nyina eḍighi ḍita kụ aroogbolom mọ inyina ígeni, pọ ịki ẹpe ẹekpua phọ ẹsam ẹboorogh eselemi de phọ eḍighi ẹlo anyina, ẹpe de ạbuo ạPerezait phọ rꞌạbuo aRefaim.”

¹⁶ Kụ eghun phọ ạJosef ọḅeni nyọdi mọ, “Aroogbolom mọ iyoor ígeni, kụ bụo aKenanait phọ orugh bọ ẹpe phọ ọmooghogh rughuugh-ude dị oḍighinom rukuron, bụphe orugh bọ ẹpe Bẹt Sạn rꞌịbam ạramha phọ rꞌạbuphe orugh bọ ẹpe ekpululu bọ ẹpe Jẹzreel.”

¹⁷ Kụ aJosua ạḅeni bụo ọophi ạJosef, eghun Ifraim rꞌạpakiri eghun ạManase mọ, “Nyina eḍiza we ẹmoogh ịikpo, nyina kẹ́moogh muniin abin bịn.

¹⁸ Kụ iḍighi, ịḅaram roogbolom mọ eḍighi ịlo anyina. Ghạlamo eḍighi ni ẹekpua, ịki ẹsam ẹboorogh eselemi de, ẹmoogh ẹsighe esiemi ẹpe eekuna ọku phọ. Ghạlamo awe aKenanait phọ ọmoogh ịikpo rꞌarughuugh-ude dị oḍighinom rukuron, nyina keporogh ni bịdi, bịdi ọḍuaghu.”