Josua 14 - Ạḍinya Iigbia

Abin ẹmoogh mụo arughunughun ạga emeelom erumuḍio phọ ạJodan

¹ Ịphen kụ ạramha phọ awe phọ Ịzirel ọmoogh bọ ẹpe ade phọ aKenan, ẹpe Ẹliazar oyil ạrikia phọ rꞌaJosua ọony phọ ạNon rꞌạbuo ạrumhu ạburude arughunughun phọ Ịzirel odiemi bọ bin ẹmoogh phọ bịdi.

² Ụsa ẹlhel kụ odiom ghan bọ bin ẹmoogh phọ, ịdipho Ọmoogh-we phọ ạlogh bọ ologh ạngo Mozis ịlo esugha rꞌạpakiri arughunughun phọ rꞌopol ẹpheri phọ eghun phọ,

³ ịdi eḍighi bọ aMozis mạngo ni ịyal arughunughun rꞌạpakiri eghun bin ẹmoogh mụo ạbidi ạga emitenom erumuḍio phọ ạJodan kụ bụo kꞌaLivai ọdi ọ́ngo aani bịdi bin ẹmoogh.

⁴ (Sịphe ạnmuny phọ ạJosef ịyal arughunughun, eghun ạManase rꞌeghun Ifraim.) Bụo kꞌaLivai bin ụ́ngo sịphe ade phọ, omuton rạmha orughogh bịn ekpisi ade ịḅal ẹlo ịnam-otu phọ ạbidi rꞌaruphua phọ ạbidi.

⁵ Awe phọ Ịzirel ụdaph ịpe Ọmoogh-we phọ ạlogh bọ ologh ạngo Mozis kụ odian bọ de phọ.

AJosua ạsighe Hẹbron ạngo Kẹleb

⁶ Awe phọ aJuda ọghi ọteeny Josua ẹpe Gịlgal, kụ ạKeleb ọony phọ aJefune ọlo aKenizait ạḅeni Josua mọ, “Nạ alegheri ni ịpe Ọmoogh-we phọ ạḅeni bọ Mozis oye phọ Ẹnaan ịlo ạmi rꞌạna ẹpe Kades Bania.

⁷ Mị ạman bọ inyadi ạsia mem mọ aMozis otelhedom mọ Ọmoogh-we phọ urom bọ ịmi ẹpe Kades Bania mọ mị ụki uḅiligha de phọ, kụ mị ạghi aḅula ạghaaph ịlo ologhi ạmi ạḅeni nyọdi.

⁸ Kụ abumor phọ ạmi bụphe rꞌạmi ọghi bọ uḍighi ni ịdi iloghi awe phọ ẹkonono yogh kụ mị ụdaph ni rꞌoomo ologhi ạmi Ọmoogh-we Ẹnaan phọ ạmi.

⁹ AMozis aghunya ḍio phọ ạḍiphe phọ kụ ạḅem mọ, ‘Agey ni, ade phọ ḍịphe aruwol phọ ạna ẹezeghi bọ, ḍịphe phọ kụ abin ẹmoogh mụo ạna rꞌạnmuny ạna kꞌagee-pọ; loor esi dị nạ ụsighe ni rꞌoomo ologhi phọ ạna kụ ạdapham Ọmoogh-we phọ Ẹnaan phọ ạmi.’

¹⁰ Kụ nyịidipho Ọmoogh-we phọ muuko ịmi mị ạtol ạteeny rodon ịdipho dị ạḅem bọ mem mọ ọpo mị ạman bọ inyadi rꞌoogh ạsia, ẹsighe kꞌamem mọ Ọmoogh-we phọ ạghaaph bọ ịphen phọ. Kụ nyịidipho pogh, rꞌarodon mị mạman bọ ọphaanyadi rꞌoogh ạsia,

¹¹ kụ mị odi ni gbakiki kꞌarodon ịdipho aḍio phọ aMozis urom bọ ịmi. Ịpe ịnyaam mọ ạmi ẹrol bọ mem mọ ọpo kụ ịdi ịnyaam ạmi edi ni.

¹² Kụ iḍighi ụngo ịmi roogbolom mọ ịphen, ịpe Ọmoogh-we phọ ạghaaph bọ ḍio phọ ạḍiphe nạ ạnaghan bọ ni, mem mọ ạmuphe Anakim phọ odoghoḍi ni rạmha phọ ạbidi ọkparami. Ạgama keḍighi ni ịdi Ọmoogh-we phọ kụrolonaan ịmi kụ mị aporogh bịdi ạsighiogh ịdipho Ọmoogh-we phọ ạḅem bọ.”

¹³ Kụ aJosua ạseph Kẹleb ọony phọ aJefune, kụ ạsighe Hẹbron ạngo nyọdi mọ abin ẹmoogh ẹlo ọdi.

¹⁴ Kụ ạHebron aḍighi bin ẹmoogh ẹlo ạKeleb ọony phọ aJefune ọlo aKenizait kꞌarodon, ịdi eḍighi bọ dị ạsighe ni rꞌoomo ologhi ọdi kụ ạdapham Ọmoogh-we Ẹnaan phọ Ịzirel.

¹⁵ Ḍien ạHebron ẹḅel amem phọ ughol ghan mọ ạKiriat Arba. Arba kụ ogbogh oye sịphe Anakim mọ. Kụ ade phọ ẹpho, ẹgham ị́tol mun.