Josua 10 - Ạḍinya Iigbia

Ọkpar opu bụo Ạmorait

¹ Eru ẹteeny mem dị Adoni Zedek ọdaam mọ aJeruselem ạnaghan mọ aJosua mạsighe Eai apiemi mọ ịyaar ósugheeny, aḍighi Eai rꞌọdaam ẹmha phọ ịdipho ọdi aḍighi bọ Jeriko rꞌọdaam ẹmha phọ, rꞌịpe awe phọ ạGibion rꞌawe phọ Ịzirel ọḅophoghan bọ odi,

² kụ aruugu rasiph nyọdi ịdi eḍighi bọ Gịbion eboom ẹmha ni, ẹmoogh ọdaam ẹmha rꞌikpolom awe ịdipho ịnon igbogh ạramha, ẹbugh kẹn epu Eai.

³ Kụ Adoni Zedek ọdaam mọ aJeruselem arom ạghiomonaan Hoham ọdaam mọ ạHebron rꞌaPiram ọdaam mọ aJamut rꞌạJafia ọdaam mọ aLakis rꞌaDebir ọdaam mọ Ẹglon mọ,

⁴ “Ịloghonaan ịmi ḍịghaagh ọghi ọze we phọ Gịbion, ịdi eḍighi bọ bịdi mọghi bịn aJosua rꞌawe phọ Ịzirel ọḅophoghan.”

⁵ Bịn oogh phọ ạbudaam mọ Ạmorait, ọdaam mọ aJeruselem, ọdaam mọ ạHebron, ọdaam mọ aJamut, ọdaam mọ aLakis rꞌọdaam mọ Ẹglon ookpomoghan ọghi. Bịdi rꞌawe ẹgham ạbidi orugh emitenom arugbogo ạGibion kụ oruphiom bịdi ẹgham.

⁶ Kụ awe phọ ạGibion orom ọghiomonaan Josua ẹpe arugbogo phọ ạGilgal kụ ọḅeni nyọdi mọ, “Kátoph mem esi abutelhedom mọ ạna. Gboogborion aru ụteeny iyoor, ụphel iyoor ạsighe. Oomo phọ ạbudaam mọ Ạmorait mọḍuaghu ẹpe roogbolom mọ ookpomoghan bịn otu uzuom iyoor ẹgham.”

⁷ Kụ aJosua rꞌoomo awe ẹgham mọ ọdi oḅetenu ọḍua ẹpe Gịlgal rꞌoomo ikpolom awe phọ.

⁸ Kụ Ọmoogh-we phọ ạḅeni Josua mọ, “Kákiilaan bịdi, ịdi eḍighi bọ mị mạḅogh bịdi ạlogh ḍịghaagh ạna; oye ólho sịphe ogbo phọ ạbidi dị kạmeera egbodo ạna.”

⁹ AJosua ạḍua ḍughul ẹpe Gịlgal kụ arelhe aru aḅutonom Ạmorait ekperenom.

¹⁰ Kụ Ọmoogh-we phọ aḍighi ịdi oomo phọ Ạmorait rokpereghaan egbodo awe phọ Ịzirel, kụ ọze ịminighan ạbidi sịphe Gịbion, kụ ophorogh bịdi osumeeny ẹpe eten phọ ẹpe rẹki bọ ẹpe Bẹt Horon, kụ ọze bịdi osiemi ẹpe Azeka osiemi ẹpe Makeda.

¹¹ Kụ Ạmorait phọ oghiilaan Ịzirel rosumughu kụ bịdi rosi emitenom ạBet Horon ọrol ẹpe, Ọmoogh-we phọ ạsighe iboom ạrana aroḅol bịdi asiemi kꞌẹpe Azeka, kụ omuughu. Bụdi omugh bọ ạbuminighan ni loor ẹghologhol ạrana phọ; bụdi omugh bọ opu bụphe Ịzirel ọziom bọ elhool ẹgham mọ.

¹² AJosua ạghaaph ạḅeni Ọmoogh-we phọ ḍio phọ ạḍiphe Ọmoogh-we phọ ạḅogh bọ bụo Ạmorait phọ ạngo we phọ Ịzirel. Kụ ọdi ạghaaph esomanan oomo awe phọ Ịzirel mọ, “Erumuḍio, mẹera ẹpe Gịbion, kụ nạ, ụnwanyu phọ, tọl ẹpe ạnyu Eḍiiny Aizalon.”

¹³ Kụ erumuḍio ẹmeera zim, kụ ụnwanyu phọ azinian tụtu awe phọ Ịzirel ọliom ghẹlhe bụmulogh-ḍien phọ ạbidi. Ọge ni ịphen phọ sịphe ạḍinya phọ ạJasar ḍụghum? Erumuḍio phọ ẹmeera bịn ị́mu, ímeel ḍio phọ ạḍiphe.

¹⁴ Ịphen phọ ke̋mite ghan ẹnon aḍio kꞌageediidi, dị Ọmoogh-we phọ ạnaghanan ẹḍogh oye. Ọmoogh-we phọ kụ eenaan Ịzirel.

¹⁵ Kụ aJosua rꞌoomo awe phọ Ịzirel oḅula ẹpe arugbogo phọ ẹpe Gịlgal.

AJosua asiphi oogh phọ ạbudaam mọ Ạmorait

¹⁶ Oogh phọ ạbudaam mọ Ạmorait osuma ọghi ẹpe Makeda ạaghian loor egbogh epogh aḍighiigh.

¹⁷ Kụ ọghi ọḅeni Josua mọ, “Mịin, oogh phọ ạbudaam mọ ọbooghian loor epogh aḍighiigh phọ ẹpe Makeda.”

¹⁸ Kụ aJosua ạḅeni bịdi mọ, “Ịki eekilemi igbogh asighiigh phọ eekpereghiom epogh phọ, kụ ẹlhogh we ọrol sịphe phọ ogon ghan bịdi.

¹⁹ Kụ ị́tol sịphe phọ, ephorogh ghan bụmulogh-ḍien phọ anyina ẹze bụphe odi bọ ẹphen ọman phọ. Ímeera ghan bịdi oḍiku sịphe ạramha phọ ạbidi, loor esi dị Ọmoogh-we Ẹnaan phọ anyina mạḅogh bịdi ạlogh ḍịghaagh anyina.”

²⁰ Mem dị aJosua rꞌawe phọ Ịzirel mọze bịdi ẹziom dị ẹphughan, ọboor bịdi ọmadan. Kụ ịyal-ikpo ạbudi osugha bọ osumughu ogheleghu rạmha dị oghoonyogh.

²¹ Kụ oomo awe phọ bụphe ọghi bọ omunughan oḅula oru ọteeny Josua ẹpe arugbogo phọ ẹpe Makeda. Oye ọ́rol dị ạsighe nem ọdi ạḅeni we Ịzirel ḍịkaraph.

²² AJosua ạḅeni bịdi mọ, “Ikughuron epogh phọ, ẹsighe oogh phọ ạbudaam mọ iruom ịmi.”

²³ Kụ bịdi ọtuugh ịdipho aJosua ạḅeni bọ bịdi oḍighi. Ọghi ọsighe oogh phọ ạbudaam mọ sịphe epogh eegum mọ oruom Josua, ọdaam mọ aJeruselem, ọdaam mọ ạHebron, ọdaam mọ aJamut, ọdaam mọ aLakis rꞌọdaam mọ Ẹglon.

²⁴ Kụ mem dị bịdi ọsighe bọ bụdaam mọ oruomonaan Josua, aJosua aakpomoghi oomo awe phọ Ịzirel kụ apuru bụo ạrumhu awe ẹgham mọ, bụphe ọdaph bọ nyọdi ọghi, mọ, “Iḍuraan ẹebeeph, ịsighe ruwol anyina ẹezeghiom irum ạbudaam mọ ạbuen.” Kụ bịdi ọghi ọsighe ruwol ạbidi ọozeghiom irum mọ ạbidi.

²⁵ Kụ aJosua ạḅeni bịdi mọ, “Aruugu inyina kísiph, kékiriri yogh; ịkparami siloor anyina, ẹmoogh oḅiom, ẹmoogh oḅom ẹmhu. Ịphen phọ kụ ịdi Ọmoogh-we phọ kaḍighi oomo ạbumulogh-ḍien phọ anyina bụphe rꞌanyina rebe bọ ẹgham.”

²⁶ Kụ aJosua ạgurogh bụdaam mọ ạze, ạsighe bịdi asinogh loor oogh ireeny, bịdi ọrol sịphe ireeny phọ ẹteeny kꞌadulhe.

²⁷ Kụ rẹteeny dulhe mem dị erumuḍio remeel ighool, kụ aJosua ạto ạḅeni we mọ, “Ịki ẹsighe iḍim mọ ẹghi esumughi sịphe epogh eegum mọ bịdi ạaghian bọ.” Kụ bịdi ọsighe iboom asighiigh okpol sịphe ọnhu epogh eegum mọ, kụ edi ghan sịphe phọ kꞌarodon.

AJosua ạḅile ạka bụo Ạmorait ạsighe de phọ ạbidi

²⁸ AJosua ạsighe Makeda ḍio phọ ạḍiphe, kụ ạsighe eḍume elhool ẹgham mọ ạziom bịdi rꞌọdaam ẹmha phọ ạbidi. Ọdi ạze oomo awe ẹmha phọ ạmadan rꞌẹnum oye ósugheeny. Ọdi ạtuugh ịpe ọdi aḍighi bọ ọdaam mọ aJeriko aḍighi ọdaam mọ aMakeda.

²⁹ Ịphen phọ reten bọ, kụ aJosua rꞌoomo awe phọ Ịzirel ọḍua Makeda ọghi osi Libna, bịdi rꞌaLibna eeghi.

³⁰ Kụ Ọmoogh-we phọ ạḅile kẹn ạḅogh Libna rꞌọdaam ẹmha phọ ạbidi ạlogh ḍịghaagh Ịzirel. Bịdi ọsighe eḍume elhool ẹgham mọ ọziom oomo awe ẹmha phọ ọmadan, rꞌẹnum oye úsugheeny. Bịdi oḍighi ọolha-ẹmha phọ ạbidi ịdipho bịdi oḍighi bọ ọolha-ẹmha phọ aJeriko.

³¹ Ịphen phọ reten bọ, kụ aJosua rꞌoomo awe phọ Ịzirel ọḍua sịphe Libna ọghi osi Lakis odoghoḍi sịphe rugbogo kụ ạarom bịdi ẹmha phọ orughogh oruphiom bịdi ẹgham.

³² Kụ Ọmoogh-we phọ ạsighe ẹmha phọ aLakis ạḅogh ạngo we phọ Ịzirel, kụ esi ịyal aḍughul-otu bịn bịdi ọsighe ẹmha phọ ọsighe eḍume elhool ẹgham ọziom oomo awe ẹmha phọ rꞌẹnum oye ósugha ịdipho bịdi oḍighi bọ Libna.

³³ Kụ aHoram ọdaam mọ aGezer aru ọlhoghonaan ạḍighaagh Lakis kụ aJosua aghiigh nyọdi, ạze oomo awe phọ ọdi ạmadan, rꞌẹnum oye ósugheeny.

³⁴ Kụ aJosua rꞌoomo awe phọ Ịzirel ọḍua sịphe Lakis ọghi osi Ẹglon, kụ odoghoḍi rugbogo sịphe ạarom bịdi ẹmha phọ, oruphiom bịdi ẹgham.

³⁵ Kụ Ịzirel ạarom bịdi ẹmha phọ ḍio phọ ạḍiphe, kụ ọsighe eḍume elhool ẹgham ọziom oomo awe ẹmha phọ. Oomo awe ịsiphe ẹmha phọ bịdi ụze ni ọmadan ḍio ḍio phọ, ịdipho bịdi oḍighi bọ Lakis.

³⁶ Ịphen phọ reten bọ, kụ aJosua rꞌoomo awe phọ Ịzirel ọḍua sịphe Ẹglon ọghi osi Hẹbron, kụ oruphiom bịdi ẹgham.

³⁷ Kụ Ịzirel ạarom bịdi ẹmha phọ, kụ ọsighe eḍume elhool ẹgham ọziom oomo awe ẹmha ọmadan rꞌọdaam ẹmha phọ ạbidi, rꞌoniin oye úsugheeny sịphe ẹmha phọ. Ịdipho bịdi oḍighi bọ Ẹglon kụ ịdi ọtuugh oḍighi.

³⁸ Kụ aJosua rꞌoomo awe phọ Ịzirel oḅula ọman, ọghi osi Debir, kụ oruphiom bịdi ẹgham.

³⁹ Kụ ọdi ạarom bịdi ẹmha phọ rꞌọdaam ẹmha phọ ạbidi rꞌoomo ạramha phọ ạbidi, kụ ọsighe eḍume elhool ẹgham ạziom oomo awe ẹmha phọ, rꞌoniin oye úsugheeny. Ịdipho dị aḍighi bọ ẹpe Hẹbron rꞌaLibna rꞌọdaam ẹmha phọ ạbidi kụ ịdi dị aḍighi ọdaam ẹmha phọ aDebir.

⁴⁰ AJosua ạkpar apu oomo ade phọ, emiigh kꞌẹpe aroogbolom mọ rꞌạḍigharaghar ade esoorom mọ esiemi ẹpe eḍiinyaan bọ rꞌẹpe ekpululu bọ; ạze bụdaam ẹmha phọ ạbidi rꞌoomo awe phọ ropooghu bọ ạmadan, rꞌoniin oye ósugheeny, ịdipho Ọmoogh-we Ẹnaan phọ Ịzirel ạto bọ ạḅeni nyọdi.

⁴¹ AJosua amiigh ẹpe Kades Bania kụ ạze bịdi ạghi asiemi ẹpe Gaza rꞌoomo ạramha phọ ẹpe aGosen, asiemi kꞌẹpe Gịbion.

⁴² AJosua ạsighe oomo arere phọ ạbidi rꞌạbudaam mọ ạbidi egina amem, ịdi eḍighi bọ Ọmoogh-we Ẹnaan phọ Ịzirel kụ eenaan Ịzirel.

⁴³ Kụ aJosua rꞌoomo awe phọ Ịzirel oḅula ogheel Gịlgal ẹpe arugbogo phọ ạbidi.