Jona 2 - Ạḍinya Iigbia

Ịiḅereghi phọ aJona

¹ Kꞌẹpe eekuna ologhi ọkuruḅaka egbogh ena phọ kụ ẹdi aJona ạaḅereghi Ọmoogh-we Ẹnaan phọ ọdi:

² “Esi amukum ologhi ạmi, Ọmoogh-we, mị ụmagh ni nyịna, kụ nạ ụphagharanaan ịmi. Kꞌẹpe eekuna ọmar iḍim, mị umoghi ni ịlo ẹloghonaan, kụ nạ ụnaghanan ni ịmi.

³ Nạ uroph ni ịmi asumeeny ḍigher, kꞌẹpe ọlha-ude ọphiiny phọ, esi dị ạrumuum mọ kụ ikoom ịmi, kụ oomo oologh phọ ạna uughironom ghan ịmi.

⁴ Mị ụkar ri agbi mọ muroph ịmi ogbeph dị kạ́miin mun Otu iigbia phọ ạna.

⁵ Ạmuum mọ ụminoghom ni ịmi kụ ạḅile aḍiku ịitaku ạmi; ọphiiny phọ uukpereghiom ni ịmi ạmadan, kụ ọphurughiom ẹmhu ạmi rọogho ọphiiny.

⁶ Mị ụghi ni kꞌẹpe ọlha-ude aruugum mọ, kꞌẹpe ẹmha phọ ọkasaghi bọ rụnhu-aḍibuo phọ ọdi bịn kꞌagee-pọ. Kụ ọlo nạ, Ọmoogh-we Ẹnaan phọ ạmi, kụ ụsighe ịmi eye kꞌẹpe aḍigher phọ amitiom.

⁷ Mem dị mị ạmiin bọ mọ aghuḍum ạmi mạghorom rạḍua, pọ kụ amem dị mị ụuḅereghi ni nyịna Ọmoogh-we phọ, kụ sịphe Otu iigbia phọ ạna nạ ụnaghanan ni ịmi.

⁸ Bụphe rọoḅereghi ghan bọ ịkaaghineen ạrumugh phọ ị́moogh bọ mạar oḍighinom mọ moghel ọḅogh aloor ạbidi ọngo ạna.

⁹ Kụ ọlo mị kaboom ni nyịna; mị kạpighiron ni ẹkia ạngo nyịna kụ aḍighi ịpe mị maguanaan bọ. Ạpeleeny rạḍua ghan esi Ọmoogh-we phọ kụ karu!”

¹⁰ Kụ Ọmoogh-we phọ agbi ọḅeni egbogh ena phọ mọ etoka Jona ẹpe ọgbal esiḍia phọ, kụ ẹtuugh ịdipho eḍighi.