Jona 1 - Ạḍinya Iigbia

AJona ạḅaar ẹmhu esi Ọmoogh-we phọ

¹ Eniin aḍio Ọmoogh-we phọ ạḅaanaan ni Jona, ọony Amitai.

² Ọdi ạḅeni mọ, “Kịa Nineve, ẹpe egbogh ẹmha phọ, kụ ạghaaph ịkaraph ạbidi amitiom; mị alegheri ni ịdi iloghi awe phọ ẹgbagara.”

³ Kpạripe rọghi, aJona ạḅile anyeene ni ẹnon ạga, ọbo ọdi akpetenaan ipẹ Ọmoogh-we phọ arom bọ nyọdi. Ọdi ạghi asi Jọpa, kụ ẹpe phọ ọdi ạmiin ụnwunyaru dị rạki Spen. Ọdi ạkpe ikpoki bịn aḍighan bịdi ọghi aani aSpen, ekpisi ọḍua aghisigh Ọmoogh-we phọ.

⁴ Kụ Ọmoogh-we phọ arom olhom oghim ạlogh ọphiiny phọ; oghim mọ ạkpar ri dị ạnya ghan oḅomoghi ụnwunyaru phọ.

⁵ Aruugu asiph ni bụzoghiom ụnwunyaru phọ kụ tọrobo ọnyo ạbidi amiigh ọlo ọmagh ẹmugh ọdi mọ ẹloghonaan ḍịghaagh. Kụ esi oghome ịiḅaghami phọ bịdi ophoor iniin asidool osumughi ọphiiny phọ. Ịduon phọ, aJona maḍigh eeḍian oghuugh phọ bịn ạmina rạnaani ghan.

⁶ Uwo ẹmhu ụnwunyaru phọ ạghi kụ ạmiin nyọdi kụ apuru nyọdi mọ, “Nạ rạnaani ghan eeghe ạralha? Ḅetenu ạmagh ẹmugh ạna ịlo ọloghonaan ạḍighaagh. Ịduon sịen, ọdi kụnma ni iyira ighirigiir ạpel ghuḍum ayira.”

⁷ Kụ ạbuzoghiom mọ oopuruan mọ, “Ọsa ẹlhel olegheri oye phọ rụngo bọ iyira ịiḅaghami phọ ịphen.” Kụ rọsa, kụ emeghenom ḍien aJona.

⁸ Kụ bịdi ọḅeni nyọdi mọ, “Nyịidipho ụḅeni iyoor! Kọḍagha ạnhian ịlo ịphen phọ? Nạ raḍighi ghan eeghe sịen? Nạ ụḍua ẹghen ẹmha kụ aru bọ? Nạ ọkar ọlo ẹghen ẹmha?”

⁹ “Mị ọlo aHibru,” kụ ịdi aJona ạphagharanaan. “Mị rạaḅereghi ghan Ọmoogh-we phọ, Ẹnaan phọ ẹpe kꞌạke, ọpo ạlhem bọ de rꞌọphiiny.”

¹⁰ AJona ạloghom ni mọ ọno ạkar akiilaan Ọmoogh-we phọ kụ rạsuma. Kụ aruugu asiph bụzoghiom ụnwunyaru phọ, kụ ọḅeni nyọdi mọ, “Ẹpe phọ ẹgbagara ịyaar dị ị́nighe oḍighi!”

¹¹ Oghim mọ rạkpar ghan bịn, kụ awe phọ opuru nyọdi, “Yoor oḍighi ika nyịna kụ oghim mọ ạpo?”

¹² Kụ aJona ạphagharanaan mọ, “Ịsighe ịmi esumeeny sịphe ọphiiny phọ bịn kạpo ni. Mị alegheri ni mọ ẹmhu ạmi kụ ẹdi nyina ezuan bọ olhom oghim mọ ọphon phọ.”

¹³ Kpạripe ghụn ạbuzoghiom mọ ụkururu ọzoghi ọghi ọgbal ọphiiny phọ kụ ị́ḅoph.

¹⁴ Kụ bịdi ọlho ọḅeni Ọmoogh-we phọ mọ, “Ọmoogh-we, yoor rọoḅereghi ni, iyoor kụ́ghelhom ghẹlhe aḍuugh, loor esi ophiemi aghuḍum oye phọ ọphon! Nạ Ọmoogh-we kụ raḍighi bọ ni oomo phọ ịphen phọ.”

¹⁵ Pọ kụ amem dị bịdi ọsighe Jona osumeeny sịphe ọphiiny phọ, kụ ọphiiny phọ ạpho egina amem.

¹⁶ Ịphen phọ iḍighi ni ruugu esi ạbuzoghiom mọ loor oghiilaan Ọmoogh-we phọ, kụ bịdi ọphighiron ẹkia kụ oguanaan okumu ọngo ọdi.

¹⁷ Esi adom dị Ọmoogh-we phọ kụ arom, egbogh ena iru ni bịn ẹmin Jona, kụ ọdi ạrol ologhi ọkuruḅaka ena phọ ịraar aḍughul rꞌịraar ootaany.