Job 9 - Ạḍinya Iigbia

Job

^1-2 Ii, mị mạnaghan ni oomo phọ ịpe phọ atene. Kụ ọlo oye kaḍighi ika kụ ạmoogh akeel dị Ẹnaan rꞌọdi kụ ọokonoghian?

³ Oye kaḍighi ika kụ ạagbaghanaan rꞌọdi? Ọdi katue ni apuru oniin ọonir asipuru dị oye kátue ạpanyanaan.

⁴ Ẹnaan ẹmoogh ni iboom ịikpo rꞌolegheri ịyaar; oye kátue ạmerenyan nyọdi.

⁵ Ekperenom ọdi kapighemi ni rạaḅaraph kụ esi ọghagh ologhi aagulemi bịdi.

⁶ Ẹnaan epighemi de phọ iniin ariisi eḅomoghian; ọdi apighemi rọko phọ erool bọ de phọ.

⁷ Ọdi katue ni akikima erumuḍio mọ kímite, ḅịle kẹn rạanaan phọ mọ kị́mu ḍughul.

⁸ Oye ọ́lhoghonaan ḍịghaagh Ẹnaan phọ kụ ạatarion bọ sịke phọ, ọbo ọbo ạazeghi bọ ọman elhom ẹnam ọphiiny phọ.

⁹ Ẹnaan kụ ịde oomo ạraanaan ẹpe okuaḍio phọ — Egbogh Ẹenaan ạBeya, Orion, rꞌạPledis, ḅịle rꞌạraanaan ẹpe esoorom mọ.

¹⁰ Yira kótue ọnaghanan igbogh ạraraar phọ ọdi raḍighi ghan bọ, ḅịle kẹn esi ịiḍaany phọ ọdi eekuna ílho.

¹¹ Ẹnaan reten ghan ni ịduon phọ kụ ọlo mị kátue ạmiin nyọdi.

¹² Ọdi rạsighe ghan ịlo ọdi rạwa, oye kátue akikima nyọdi; oye kámighiron apuru nyọdi, “Ịphen nạ raḍighi bọ ịghen?”

¹³ Ọghagh ologhi Ẹnaan phọ ránmia ghan. Ọdi aagulemi bụmulogh-ḍien phọ ọdi, bụphe ọloghonaan bọ ḍịghaagh Rehab, elhom ẹnam ọphiiny phọ, kụ eenan bọ nyọdi.

¹⁴ Kụ iḍighi kụ mịna kạmoogh bọ ẹghen ikpo ọnhu ọsighe ọphagharanaan Ẹnaan?

¹⁵ Ghạlamo ịduon mị ụ́piom bọ ni, oomo ịdi mị katue aḍighi ọlom ọnma ighirigiir esi Ẹnaan oogboom ịiruen phọ ạmi.

¹⁶ Kụ ghạlamo ịduon phọ kẹn ni ọdi ameera mọ mị ụkaaph, mị kátue ameeraam mọ ọdi kụnaghanan ni ịmi.

¹⁷ Ọdi atom oghim mọ ukuphogh ịmi aḍighi yogh rạraar elegh, dị ịyaar mị úḍighi.

¹⁸ Ọdi kámeera mọ mị upooghu; ọdi mạsighe eghiḍim amuzeḍi ghuḍum ạmi.

¹⁹ Mị kạnmagharanam nyọdi ḍụghum? Ạnmagharanam Ẹnaan phọ ni? Mị kạki otu iilogh asi sịagba? Oye katue ni aporogh nyọdi ḍụghum?

²⁰ Mị ịyaar ụ́piom kụ Ẹnaan kőghel, kụ ọlo ikpo ọnhu phọ ạmi ẹkigh mụdi mị ạpiom ni, kụ tọrotoro ịyaar lọ mị ạḅem ẹḅile bịn rịngo ghan ịmi apum.

^21-22 Mị ịyaar ụ́piom kụ ọlo mị rạ́aḅaghamian mun loor. Ạdol phọ mịpher ịmi. Ẹlo ẹmoogh mạar oḍighinom ílho mun. Mị ạpiom mị ụ́piom, Ẹnaan kiigulemi ni iyira.

²³ Mem dị oye dị ụ́piom kụ amugh ekperenom, Ẹnaan rẹmilogh ghan ni.

²⁴ Ẹnaan ịngo aḅirini phọ bụkaraph awe. Ọdi aḍighi ịdi abuugboom ịiruen phọ eten rọ́miin mun. Kụ eḍighi ịyaar dị Ẹnaan kụ ịduon phọ úḍighi, ạnhian kụ aḍighi bọ?

²⁵ Asiḍughul-otu phọ ạmi reegborion ni keten, rꞌaḍiniin ị́nighe.

²⁶ Aghuḍum ạmi aagborion raten ịdipho oghuugh dị raagborion, raagborion ịdipho uga dị rạsighe ḍiwoor.

^27-28 Eḍighi ịyaar lọ mị ạyigh aani kụ eenaan owula eephina phọ, oomo ịminimiin phọ ạmi reḅula ghan kịwa ịmi ẹmiin. Mị alegheri ni mọ Ẹnaan mesoph ni ọoruen iphume ịmi.

²⁹ Loor esi dị ọdi muphume bọ ni ịmi, mịna kạḅile ạkaaph eeghe?

³⁰ Ạsaḅa ólho dị katue aatol ịkaraph phọ ạmi.

³¹ Ẹnaan miroph ịmi esumeeny ooni ẹenir, kụ umugholoor ạmi rasiph ni ghạlamo rꞌạrusuoma phọ ạmi.

³² Mụghumo Ẹnaan iḍighi oye, mị mutue ni ạphagharanaan nyọdi; yoor mụki ni otu iilogh kụ ọgbaaghian.

³³ Kụ ọlo oye dị kụugbarion iyoor ólho — oye ólho dị kasoph ọoruen ạngo Ẹnaan rꞌạmi.

³⁴ Ịmi kụ́lhiom mun, Ẹnaan. Kẹle yogh rạraar aruugu phọ ạna.

³⁵ Mị rákiilaan. Mị kạkaaph ni loor esi dị mị alegheri ni ologhi phọ ạmi.