Job 8 - Ạḍinya Iigbia

Bịldad

^1-2 Nạ maghirighian ạmadan eepu ọghaaph phọ ạna ḍụghum?

³ Ẹnaan rékiton ghan iiḅi ịiruen; ọdi rạ́bile ghan oḍighi ịpe eḍighi bọ elhiom.

⁴ Iini ạnmuny phọ ạna moḍighi ni ịkaraph esi Ẹnaan kụ iḍighi kụ ọdi mạlhiom bịdi ịdi ẹkpianaan.

⁵ Kụ ọlo, ghiighiraan ạaḅereghian Ẹnaan Oomo Ịikpo phọ;

⁶ Eḍighi ịyaar dị nạ ạser-sẹr ạḅile aseleman, pọ Ẹnaan ketu ni ẹloghonaan nyịna ḍịghaagh, ạḅile aḅulemi eghunotu phọ ạna ạngo nyịna.

⁷ Oomo ẹelha phọ ạna ephe bọ kẹ́man ịyaar ọtomaam ịpe ọdi kạngo bọ nyịna.

⁸ Pogh ẹphurukpu amem olegheri-ịyaar ageedi phọ; mạar aphogh igey phọ ịpe ạburude phọ ayira ọtuugha bọ.

⁹ Aghuḍum mọ ayira akper ri, yira mạar úlegheri; yira roten ghan ịdipho oogho sịen ade phọ.

¹⁰ Kụ ọlo, awe olegheri ịyaar ageedi phọ ọtughemi nyịna! Nạghanan ịpe bịdi ọghaaph bọ:

¹¹ “Iiphoghoḍian kétue esi esi lọ ạmuum úlho; rọ́miin ghan bịdi esi lọ íḍighi ighool.

¹² Eḍighi ịyaar lọ ạmuum mọ amooph, bịdi kụ kẹpu emuughu, mem dị bịdi eghom ni ẹphughan oḍighinom ịyaar.

¹³ Awe dị Ẹnaan úlegheri ọkigh iipoghoḍian phọ ịpe phọ; oḍuom ologhi phọ ạbidi maphe, ịduon bịdi mowula bọ Ẹnaan phọ.

¹⁴ Bịdi oḍuom ologhi iri — iri ọseki-ọotaku.

¹⁵ Eḍighi ịyaar lọ bịdi ọbedenom ọseki-ọotaku, katue ni ạpam bịdi ḍụghum? Eḍighi ịyaar lọ bịdi ọphamanam iri, ketue ni ẹmeremi bịdi ḍụghum?”

¹⁶ Ạbukaraph awe roḍum ghan ịdipho ạroogho esi ogogo, ịdipho ạroogho dị amuza ozo.

¹⁷ Ạsini phọ ạbidi rẹpiiny ghan rạna phọ, ḅịle kẹn reḅol ghan kegheelom tọrotoro aḍighiigh.

¹⁸ Kụ ọlo, ọpham bịdi oruphuron — pọ oye kálegheri mun mọ bịdi ụrol ghan ni sịphe.

¹⁹ Ii, emuton ịpe phọ, iboh dị ịkaraph awe ọmoogh ílho. Ạbunon awe kụ kotu ọsighiogh riisi phọ ạbidi.

²⁰ Kụ ọlo Ẹnaan kẹ́ḅitonaan weye omeeraam, ḅịle kẹn kẹ́loghonaan ḍịghaagh ịkaraph awe.

²¹ Ọdi kạbile ni nạ ạmilogh ạḅile ạlho,

²² kụ ọlo ọdi kaafolomi ni bụphe ọlogh bọ nyịna ḍien phọ, ḅịle aruutu ịkaraph awe phọ kepe ni.