Job 4 - Ạḍinya Iigbia

Ọḅel ọghaaph phọ Ẹlifaz

^1-2 Job, kepin ni ologhi ạna ḍụghum eḍighi ịyaar dị mị ạḅem ịyaar? Mị kátue mun aḅoorian.

³ Nạ mạtughemi ni ịbadi awe ạngo ịnyaam rạghaagh dị edugh.

⁴ Mem dị oye akpetaan adugh ḅịle arukumuan ẹpher, ikpo ọnhu ạna rẹngo ghan ni nyọdi ọninom kạmeera.

⁵ Nyịidipho mesi nyịna ọmoogh ịiḅaghami, kụ ekperenom bịn nạ órue ọmerenyan.

⁶ Nạ ụuḅereghi ghan Ẹnaan, ḅịle kẹn aghuḍum ạna ạser-sẹr; ọbo ẹkpe dị nạ kạmoogh ạkpo ologhi rꞌoḍuom ologhi.

⁷ Tụutughian ẹpe ọman. Kol eniin esi dị oye aruukuan azuan ịiḅaghami dị eegulemi nyọdi.

⁸ Mị mạmiin ni weye dị oḅeph ịkaraph, ḅịle kẹn ọzuph ẹkaraph eḍighinom ịyaar ịdipho ịizupha; nyịidipho bịdi robugha ghan ịkaraph.

⁹ Ịdipho oghim kụ ẹdi Ẹnaan reegulemi ghan bịdi esi ọghagh ologhi phọ ọdi.

¹⁰ Ạbukaraph awe phọ rogbophoghu ghan ịdipho ạnam-dịka, kụ ọlo, Ẹnaan rekpomori ghan rụnhu ạbidi keḅonyon rạlaay ạbidi.

¹¹ Ịdipho ạnam-dịka dị ịyaar oghiigh ạa ílho, bịdi romugh ghan, kụ oomo ạnmuny ạbidi ọwalala.

¹² Eniin amem uphola ni dom ụḅeni ịmi, dị mị ụkpar ri kụ ạnaghan.

¹³ Ịdipho ạmukaraph ạmalha kụ ẹeḅaghami rạlha phọ ạmi.

¹⁴ Mị akperenom kụ aloor ạmi ephiigha; oomo aloor ạmi repiigha ni ruugu.

¹⁵ Ọony ẹnum ookuugh ạteeny risigh ạmi; asuphuugh aloor ạmi ẹmeregha.

¹⁶ Mị rạmiin ghan ịyaar ẹmeera; mị akiririom aphogh, kụ ọlo mị ụ́logh elegh. Kụ mị agbi ọnaghan ẹḍogh dị emite.

¹⁷ “Oye katue ni aseleman risigh Ẹnaan ḍụghum, ạnhian kụ kaseleman risigh Ẹnaan Oomo Ịikpo phọ ạlhem bọ nyọdi?

¹⁸ Ẹnaan réḍuom ghan ologhi ịikpo phọ ịpe edi bọ kꞌạke; ghạlamo rụukpaany kꞌạke phọ ọdi bịn ọdi rạmiin ghan ni ọpioman ạbidi.

¹⁹ Nạ ragbi mọ ọdi kaḍuom ni ologhi oye dị ọlemom ọposo, ịyaar dị oḍighinom ophugh dị kotue ni oogbighi ịdipho iphiliḅa.

²⁰ Oye katue ni ạtol eye ḍịroor bịn kụ lẹeph amugh ịdi kólegheri kụ adulhe egbi oru.

²¹ Oomo phọ ịpe ọdi ạmoogh bọ mọsighe; ọdi amugh, olegheri ịyaar ọ́moogh ni.”