Job 39 - Ạḍinya Iigbia

¹ Nạ alegheri ni mem dị rọmar ghan bọ rụtu-ịga rạaḅaraph phọ? Nạ mạmiin ghan ni mem dị ooroogh rạmar?

² Nạ alegheri ni ọnhu ạrunwanyu dị eghun ạbidi rẹman ghan? Nạ alegheri ni mem mọ rọmar ghan bọ nmụny?

³ Nạ alegheri ni mem mọ bịdi kokpoloman bọ kụ ọmar nmụny ọlogh sịen aḅirini phọ?

⁴ Ạnmuny ạbidi ropoph ghan ẹpe ologhi eḍum mọ; bịdi romite bịn róḅula ghan mun.

⁵ Ạnhian kụ ạngo bọ ẹereegh ilhom ịnam adool phọ? Ạnhian kụ ạkarion bọ bịdi kụ retelhe yogh bọ ẹwalalaan?

⁶ Mị ụngo bịdi ẹdala phọ mọ eḍighi marugh ạbidi, ạḅile ạwile mọ bịdi ọrol ghan ẹpe ẹdala aboph phọ.

⁷ Bịdi ọkelan ni rọyugh igbogh ạramha phọ, ḅịle kẹn oye ólho dị katue atughom bịdi aakonom ịdi bịdi koḍighinaan nyọdi oḍighi.

⁸ Ẹpe ạraaḅaraph phọ kụ ẹdi bịdi rẹḅal ghan ịḅal, ẹpe kụ ẹdi bịdi rẹwa ghan rọogho kẹraal.

⁹ Ạnam eḍum katue ni aḍighinaan nyịna oḍighi ḍụghum? Ọdi kameera ni ạmina ḍughul sịphe otu ịnam mọ ḍụghum?

¹⁰ Nạ katue ni ạkpo oḍigh nyoniin bịn ameera omuul asuphul ạna? Ọbo kẹn oḍur ẹsua dị kẹkpo ghan suphul phọ ạna.

¹¹ Nạ katue ni aḍuom ologhi iboom ịikpo phọ ọdi bịn agon ghan mọ ọdi kaḍighinaan nyịna igbogh iiḍighi ḍụghum?

¹² Nạ kagon ghan ni mọ ọdi abugha eḍien phọ ạna ạsighe aru, ạḅile aakpomoghi ịbiakpa phọ ạna ḍụghum?

¹³ Araphaaph efagara-ẹnun reegborion ghan iboom, kụ ọlo efagara-ẹnun ílho dị ketue ẹpeeph ịdipho ọoke.

¹⁴ Efagara-ẹnun phọ rẹbile ghan reghelhe ọdi ude, mọ ẹghologhol ade phọ eḍighi ịlo areghelhe phọ kẹenyuum.

¹⁵ Ọdi ólhegheri mọ ẹda oye ketue ni eezighiḍi bịdi, ọbo kẹn elhom ẹnam ketue ni eḅomoghi bịdi.

¹⁶ Ọdi raḍighi ghan mụdi areghelhe phọ kị́lo ọdi, ḅịle rẹ́kigh ghan ịyaar esi ọdi mọ elhoman ọno kụ repe ni.

¹⁷ Mị phọ ni kụ ụlhemom bọ nyọdi elologhi phọ, ḅịle kẹn mị ụ́ngo nyọdi olegheri-ịyaar.

¹⁸ Kụ ọlo mem lọ ọdi amiigh oghiil eghiil, ọdi kạmilogh ni ạsu lọ oye rakiilom.

¹⁹ Nạ aJob kụ ụlhem bọ rụsu ạkparami ịdipho, ạḅile ạngo ẹza ḍụghum?

²⁰ Nạ kụ uḍighi bọ ịpe bịdi ropeleghu ghan bọ ịdipho igurubia kọḅile ọghughian ịdi awe kokiilaan ḍụghum?

²¹ Bịdi rọsighe ghan ruwol ạbidi kụ kọzaraam ude ẹpe eḍiiny phọ; bịdi rokiil ghan ọghi ẹgham rꞌoomo ịnyaam ạbidi.

²² Bịdi úlegheri ịyaar dị oghol mọ oghiilaan, ḅịle elhool ẹgham ílho dị keḅulemi bịdi ọman.

²³ Ạreenema ẹgham mọ awe phọ ọpham bọ rokiilom reekaraghan kẹḅile ẹmepheghian mem ogogo.

²⁴ Ạrusu phọ ologhi ạḅaal bịn kụ akiil rạki; mem dị ọkuodu phọ ạḅa, bịdi kótue mun ọmeera.

²⁵ Tọro amem lọ ọkuodu phọ ạḅa bịdi ọkughian; bịdi kọnaghan ni eḍu ẹgham kụ ẹgham mọ egbi ọteeny kụ bịdi ọnaghan dị abuḍiemiom mọ rọlooghi kọtooghi,

²⁶ Ọogho rạtuugha ghan ịlo ọpheeph ḍịghaagh ạna ḍụghum mem mọ ọpo ọdi ạatarion bọ raphaaph phọ ọdi aphoghomi ẹpe esoorom mọ?

²⁷ Uga rakori ghan ịto ạna kụ kagbi ọlogh otu phọ ọdi ẹpe ạnyu ạraaḅaraph phọ ḍụghum?

²⁸ Ọdi rạlogh ghan otu ọdi ọkaraghi ẹpe ạnyu aḍighiigh phọ kụ ạsighe ọkar ẹpe eekuna ạnyu phọ aḍighi esi ọdagh ghan kụ ọmiin ịiḅaghami lọ retu.

²⁹ Ịsiphe phọ kụ ẹdi ọdi rạtol ghan kagon ịyaar oghiigh ạany.

³⁰ Esi lọ ịḅoria aruzu edi kụ ẹdi aruga resoor ghan keekpomoghan, kụ ạnmuny aruga phọ kụ rẹpughol ghan ịḅaal phọ.