Job 34 - Ạḍinya Iigbia

^1-2 Nyina awe ẹsu ni oboom ologhi; iler rụru ịphen mị rạkaaph bọ.

³ Nyina kelegheri ni egey eḍien mem lọ nyina ẹenema, kụ ọlo kíkpo-ọnhu olegheri-ịyaar mem lọ nyina ẹnaghan.

⁴ Edi esi ayira ọoḅeghion kụ ophogh aḍighiton phọ.

⁵ AJob rạḅem ghan mọ ọno ọ́piom, mọ Ẹnaan ímeera isophonaan nyịno igey ịiruen.

⁶ Ọdi rapuru ghan mọ, “Mịna kạgba ika ọkpe kụ ạḅem mọ mị ạpioman ni? Uḍighi ni ịmi eboom ịyaar elegh, kụ ạri mị úḍighi ịkaraph.”

⁷ Nạ mạmiin ghan ni oye dị ạghigh ọdi aJob? Ọdi rạ́logh ghan eegu Ẹnaan.

⁸ Ọdi raaḍikuan ghan bụkaraph awe kạḅile arelhian buḍighinom ịkaraph.

⁹ Ọdi rạḅem ghan mọ ạsuo ólho ọdaph ogbi phọ Ẹnaan.

¹⁰ Ịnaghanan ịmi, nyina awe ọnaghan ạḍughum! Ẹnaan Oomo Ịikpo phọ kaḍighi ni ịkaraph ḍụghum?

¹¹ Ọdi raanmo ghan weye ruunmo esi ịpe bịdi moḍighi bọ, kạḅile aḍighi bịdi ịpe ẹkpianaan bọ bịdi.

¹² Ẹnaan Oomo Ịikpo phọ réḍighi ghan ịkaraph; ọdi rạ́pel ghan oye kaḍighan oye.

¹³ Oye kụ ạngo Ẹnaan ịikpo phọ ọdi ḍụghum? Oye kụ ạḅeni nyọdi mọ aphogh ghan aḅirini phọ ḍụghum?

¹⁴ Eḍighi ịyaar dị Ẹnaan ẹsighe ḍiphooghu aghuḍum,

¹⁵ pọ oomo awe lọ odi komuughu ni ọḅile oten ọposo.

¹⁶ Nyịidipho ịnaghanan ịmi, eḍighi ịyaar lọ nyina ẹsu ni ologhi.

¹⁷ Nyina rẹḍagha ghan Ẹnaan aruukuan phọ ḍụghum? Nyina regbiom ghan mọ ọdi ọ́phomoghian iiḅi ịiruen?

¹⁸ Ẹnaan resoph ghan ni ịiruen kephume bụdaam ẹmha rꞌawe ịtooghi, mem lọ bịdi ụ́moogh ịyaar oḍighinom ọḅile oḍighi ịkaraph awe.

¹⁹ Ọdi ráḍighan ghan rạalha phọ kạgbiphoghom rukulom, loor esi dị ọdi kụ ạlhem ni tọrotoro oye.

²⁰ Oye katue ni amugh ekperenom ḍughul. Ẹnaan kụ ẹgur weye eler ude, pọ bịdi mophe; ọdi rạ́kparagha ghan kụ kaghiigh ophelegbe.

²¹ Ọdi ragon ghan ni ịgbaranuom aruwol phọ ịpe oye ratelhe bọ.

²² Ufiri ólho dị katue aakpereghi oḍighinom ịkaraph dị Ẹnaan kẹ́miin.

²³ Ẹnaan réseere ghan mem dị awe kọki kụ ọdi asophonaan ọoruen.

²⁴ Ọdi rạ́wa ghan oye dị kạki ạwaaghi apogh kụ ọdi agbi onme abuḍiemiom oseere ạbunon.

²⁵ Ịdi eḍighi bọ ọdi alegheri ni ịpe bịdi roḍighi bọ; ọdi kagboton sịdol phọ ạbidi aagulemi mem aḍughul.

²⁶ Ọdi rạliom ghan buḍighinom ịkaraph esi lọ oomo awe kọmiin,

²⁷ loor esi dị bịdi mọwile ọdaph ọdi ọḅile ọḅitonaan ịto phọ ọdi.

²⁸ Bịdi ọkpaariom rukulom mọ omoghi ọmagh Ẹnaan, kụ ọdi ạnaghan ni ḍịmagh ọloghonaan ạḍighaagh phọ ạbidi.

²⁹ Eḍighi ịyaar dị Ẹnaan egbiighi mọ ọno káḍighi ịyaar, oye ólho dị kạnughe nyọdi ẹka. Eḍighi ịyaar dị ọdi ạaghi risigh ọdi, awe kólegheri mun ịlo oḍighi.

³⁰ Ịyaar kẹ́tol dị areelhe phọ keḍighi kụ osophoghom ịkaraph awe ọda ạbidi.

³¹ Job, nạ maruphughian ni ịkaraph phọ ạna ạḅeni Ẹnaan ḍụghum, ạḅile aguanaan mọ nạ káḍighi mun ịkaraph?

³² Nạ mapuru ni Ẹnaan mọ ọdi aḍeenaan nyịna ịkaraph ạna, ḅịle kẹn nạ mameeraam ni ọwile oḍighi ịkaraph?

³³ Ịduon nạ aghel bọ ịpe Ẹnaan reḍighi bọ, nạ ragbiom ghan mọ ọdi katue ni aḍighi ịpe nạ rạwa bọ? Igbiighi phọ ịlo ạna, kị́lo ạmi; ụḅeni iyoor ịlo nạ ạatughian.

³⁴ Tọrotoro oye lọ ạsu ologhi kameeraam ni; tọrotoro oye olegheri-ịyaar lọ ụnaghanan ịmi kạḅem

³⁵ mọ aJob rạkaaph ọghaaph arolologhi ḅịle mọ oomo ọghaaph phọ ọdi aḍeenaan élegheri-ịyaar.

³⁶ Ịmaar ẹetughian oomo ạraraar phọ aJob ạḅem bọ; nyina kẹmiin ni mọ ọdi rạkaaph ghan ịlo ịkaraph awe.

³⁷ Ọdi mạsighe ọḅaar ẹmhu ạḅaram ịkaraph phọ ọdi; risigh oomo phọ ayira ọdi rạnmoghoghoom ghan Ẹnaan.