Job 29 - Ạḍinya Iigbia

Ọghaaph dị akureriom ḍighiton phọ aJob

¹ AJob amiigh ọḅile ọghaaph.

Job

² Ḅẹlee mọ aghuḍum mọ ạmi katue ni ạḅile ạtol ịdipho ạrol ghan bọ mem mọ ọpo Ẹnaan kụ iphogh ghan bọ ịmi.

³ Ẹnaan ịrolan ghan rꞌạmi oomo amem mọ ọpo phọ, ẹḅile ịngo ghan ịmi ḍịḅaal mem lọ mị ratelhe esi ufiri.

⁴ Ịpe phọ iḍighi riiḍio dị mị ạmoogh ghan edughom, kụ oḍighi ạrighiri rꞌẸnaan phọ iiko ghan ni ọto kꞌạmi.

⁵ Ẹnaan Oomo Ịikpo phọ ịrolan ghan ni ịmi mem mọ ọpo phọ, ḅịle ạnmuny ạmi ukoom ghan ni ịmi.

⁶ Ạsinam rꞌạrutu-ịga ạmi ịngo ghan ni ịmi muboom ạmamaam, ḅịle ireeny ọliv ạmi iḍum ghan agey ghạlamo esi ade asighiigh.

⁷ Tọrotoro amem lọ ikumoor awe ẹmha phọ ookpomoghan kụ mị ạrolom aani ạgada ạmi sịphe igbo phọ ạbidi,

⁸ ugheel ạnmuny ụgbol ghan ni tọro amem lọ ụmiin ịmi, ḅịle ikumoor awe uḅerenu ghan ni ọmeera ọngo ạmi rughuenian.

⁹ Abuḍiemiom awe phọ ụwile ghan ni rạghaaph lọ ọpham;

¹⁰ ghạlamo ọkar ikpolom awe phọ bịn uḅoroghian ghan ni.

¹¹ Tọrotoro oye lọ ụmiin ịmi mụghumo ạnaghan ịlo ạmi ạmoogh ghan ni igey ạraraar ọghaaph ịdi mị maḍighi ghan.

¹² Mem lọ arukulom omoghi omitiom, mị ụlhoghonaan ghan ni bịdi ḍịghaagh; mị ụngo ghan ni ọloghonaan ạḍighaagh bụnyigo ạnmuny lọ ụ́moogh esi ọkpaph.

¹³ Awe lọ ọrol esi igbogh ịminimiin uboom ghan ni ịmi, ḅịle mị ụlhoghonaan ghan ḍịghaagh rukpukele ạnmariir ọmoogh dọl.

¹⁴ Oomo amem mị uḍighi ghan rạraar ạmi aalemi.

¹⁵ Mị uḍighi ghan riḍien awe phọ ạbuphe eten rọ́miin ghan bọ, rꞌaruwol ạbuphe oḍiku bọ rạagha.

¹⁶ Mị uḍighi ghan ịdipho ọde arukulom ạḅile ghan aḍighan ruuruen lọ ọrol esi ịiḅaghami.

¹⁷ Mị uugulemi ghan ni ịikpo ịkaraph awe, ạḅile ạtagharan weye lọ bịdi mokpobiom.

¹⁸ Mị ugon ghan ọghelom ạkuudoony aghuḍum rꞌomugh ologhi otu ạmi rꞌẹepho.

¹⁹ Mị ụghigh ịdipho oreeny dị ạsini phọ ẹmoogh mụum oomo amem ḅịle ooto asoorom ghan ịla phọ ọdi.

²⁰ Tọrotoro oye uboom ghan ịmi oomo amem, ḅịle kẹn ịnyaam mọ ạmi ịmi íbi.

²¹ Mem lọ mị ạngo oroma, awe uḅoroghian ghan ni kụ ọnaghanan ịpe mị rạkaaph bọ;

²² bịdi ụ́moogh ghan ịyaar opumom mem lọ mị ạghaaph ạmadan. Ikpo ọnhu phọ ạmi iḍiku ghan loor awe phọ ịdipho ikpo ọlophia,

²³ tọrotoro oye ạsighe ghan ni ịdipho abuḅephom iizo rọsighe ghan bọ ọlophia mem aghozogh.

²⁴ Mị ụyigh ghan ni aphogh bịdi mem lọ iloghi ạbidi meḅonyonu; ẹyighom mọ ạmi ịkparamiom ghan ni iloghi phọ ạbidi.

²⁵ Mị uḍiemiom ghan ni rạghaaph; mị uḍiemiom ghan bịdi ịdipho ọdaam raḍiemiom ghan bọ weye ẹgham ọdi, ạḅile ạadereghi bịdi mem lọ bịdi oḍuom ologhi ụ́moogh mun.