Job 26 - Ạḍinya Iigbia

Job

^1-2 Ọpo eeghia ịma ọloghonaan ạḍighaagh dị nạ ụngo ịmi — uwekulom dị ịyaar ụ́moogh ịduon ạmi!

³ Nạ rạngo ghan ịma oroma kạḅile ạngo aani olegheri ịyaar phọ ạna uwelologhi dị ạrol ịduon ạmi!

⁴ Nạ ragbiom ghan mọ ạnhian kụ kạpamanam bọ oomo ikpo ọnhu phọ ạna? Ạnhian kụ anyuughiom nyịna ọghaaph ịduon phọ?

[Bịldad]

⁵ Aruwaloor ạbuphe momuughu bọ rokpereghaan ghan ni ẹpe ologhi ạrumuum eeḍian ade phọ.

⁶ Ọmar iḍim akughuronu ni esi Ẹnaan; ịyaar íikpereghi ọmar iḍim riḍien ọdi.

⁷ Ẹnaan ẹetarion okuaḍio ephunom mọ, ẹḅile ekereri de phọ esi dị ịyaar ílho.

⁸ Ẹnaan phọ kụ imuzeḍi mụum sịphe ọotu phọ kụ ẹḅile ẹpam ịlo kátuphaan loor esi ẹemor phọ.

⁹ Ọdi ạbooghi oomo ụnwanyu phọ ọman ọotu.

¹⁰ Ọdi ạgbarion ḍịḅaal rꞌufiri esi eegida dị ọgoor ạnyu otu-ḅualhe phọ.

¹¹ Mem lọ ọdi ạdegh rọko phọ ẹpham bọ okuaḍio phọ, bịdi ropiigha ghan kokpereghaan loor oghiilaan.

¹² Ịnyaam mọ ọdi kụ ịkpar epu ạbazi phọ; esi ẹmaar phọ ọdi kụ ọdi aagulemi bọ Rehab phọ úzuan ghan bọ.

¹³ Aḍiphooghu ọdi kụ regbuurogh ghan bọ okuaḍio phọ, ḅịle kẹn ạḍighaagh ọdi kụ rekiigh ghan elhom ẹnam dị resuma.

¹⁴ Kụ ọlo ịphen phọ eḍeenaan ịikpo phọ ọdi ẹnum bịn, iiphola phọ bịn kụ ẹdi yira mọnaghan bọ. Ạnhian kụ katue alegheri ọkar ịpe Ẹnaan phọ ẹbugh bọ ẹman?