Job 20 - Ạḍinya Iigbia

Zofar

^1-2 Job, nạ maḍighi ịdi rịiḅaghami ịmi. Nyịidipho rịtiirogh ịmi ọphagharanaan ạna.

³ Ịphen nạ mạghaaph bọ itonyonaan; kụ ọlo mị alegheri ni ịdi mị kạphagharanaan nyịna.

⁴ Ọkar agey nạ alegheri ni mọ kꞌageedi phọ, mem mọ ọpo ọphur bọ oseere oye sịen ade phọ,

⁵ ọkaraph oye ólho dị mạrolom ghan rꞌiboh ebia.

⁶ Ọdi katue ni aḍighi ogbogh, ạḅogh kẹ phọ; aḍighi ogbogh dị ẹmhu phọ ọdi kekara okuaḍio phọ,

⁷ kụ ọlo kopula nyọdi ọsighe ịdipho ọoru. Awe dị olegheri ghan nyọdi kookia ghan ni ekpisi phọ ẹpe ọdi mạghi bọ.

⁸ Ọdi kape ịdipho ạmalha-aḍughul bịn kọ́ḅile mun ọmiin.

⁹ Ọdi kape ni bịn sịphe ọdi ạrol ghan bọ;

¹⁰ kụ ạnmuny ọdi koḅulemi ịpe ọdi amiighi bọ ḍịghaagh arukulom mọ.

¹¹ Aloor phọ ọdi iḍighi ghan ni loor ọbumoony ẹḅile ẹmoogh ịnyaam, kụ ọlo keten ọoru.

^12-13 Ịkaraph rẹdugh ghan iboom esi ọdi dị tụtu ọdi ạpughughuom iniin sịphe ọnhu phọ ọdi kụ rạkelom ghan ḍịdugh phọ.

¹⁴ Kụ ọlo ẹpe ọkuruḅaka phọ ọdi eḍien phọ kekitonu ni ekiḍim, ekiḍim ịdipho ọogho dị kakiigh oye.

¹⁵ Ọkaraph oye phọ rakuḅa ghan ni ẹelha phọ ọdi amiighi bọ; Ẹnaan rẹḅile ghan ni kẹsighiogh emiteghom, ghạlamo mesi ni ologhi ọkuruḅaka.

¹⁶ Ịyaar dị ọkaraph oye ạmin ẹkigh ịdipho ọkaraph ọogho dị kakiigh ni oye; kakiigh ni oye ịdipho ẹrol dị ẹkaraph-ịyaar kụ ilom.

¹⁷ Ọdi kạ́tol ạmiin rịphiiny ạmunum-ọliv ọbo ọbo asikol dị ạmamaam rꞌẹnuum aḍiowo kụ rekil.

¹⁸ Ọdi kạbile oomo ịpe ọdi makumuan bọ ạmoogh; ọdi kạ́moogh ọgel ọghelom ẹelha phọ ọdi,

¹⁹ loor esi dị ọdi ạgbiphoghom ni ạḅile ạḅitonaan rukulom mọ, ạḅile azirion ạsighiogh ruutu dị ạbunon awe kụ ọlogh.

²⁰ Ịyaar nyọdi rẹ́gbaanyan ghan.

²¹ Mem lọ ọdi ale eḍien, rásugheeny ghan ịyaar, kụ ọlo nyịidipho ẹelha phọ ọdi mesi eekuna.

²² Mem dị igbogh phọ ọdi mẹkaraghi ẹbugh, oomo ẹemor ịminimiin kẹezighiḍi ni nyọdi.

²³ Ọdi ale ni oomo ịlo ọdi rạwa! Ẹnaan kẹliom ni nyọdi esi ọghagh ologhi.

²⁴ Mem dị ọdi ạkparagha okpetenaan elhool ẹgham arukuron, ạkumugh dị oḍighinom enaba kẹtaph ni nyọdi eler.

²⁵ Ekpo-ẹkpina egim ni loor phọ ọdi; ịḅaal phọ ọdi rẹteph ni sịphe ọnhu ẹkpina phọ kụ aruugu masiph ekpom ọdi.

²⁶ Oomo phọ ạraraar phọ ọdi aseere bọ moogulemi; ạnian dị oye ụ́kpooni kekoph nyọdi rꞌọto kꞌọdi.

²⁷ Ạke phọ magananami ịkaraph oye phọ ọphon phọ, ḅịle ade phọ mẹgba epume nyọdi.

²⁸ Oomo ẹelha phọ ọdi koogulemi ni esi ạmuum-aḍigho ạghelhe phọ Ẹnaan.

²⁹ Ọphon kụ ọda ịkaraph awe, ọda dị Ẹnaan meseenaan bịdi.