Job 19 - Ạḍinya Iigbia

Job

^1-2 Eeghe kụ iḍighi kụ nyina ẹsighe bọ ikpo ọnhu kụ rịgbiphoghom ịmi?

³ Amem etum mem nyina riituuny ghan ịmi kụ umugholoor inyina rísiph ghan ịduon nyina rịgilaam bọ ịmi.

⁴ Ghạlamo mị mạpioman ni, iḍighi ika kụ rịiḅaghami bọ inyina?

⁵ Nyina regbiom ghan mọ nyina ipu ni ịmi, ẹḅile kẹn ẹsighenom mọ ịiḅaghami phọ ạmi eḍeenaan ịdi mị mạpioghom.

⁶ Nyina ítue ị́miin mọ Ẹnaan kụ aḍighi ịphen phọ? Ọdi mạkpami ḍiphil osiphom ạmi.

⁷ Mị rạḅa ni ịphen ọdi rụkpilighi bọ ịmi, kụ ọlo oye rạ́naghan; oye ọ́naghan ẹḍogh emoghi phọ ạmi ọmoogh iiḅi ịiruen.

⁸ Ẹnaan mekikima eten phọ, bịn mị kátue mun aten; ọdi mạsighe eten phọ ạmi ạbooghi esi ufiri.

⁹ Ọdi mạsighe oomo ẹelha phọ ạmi, ạḅile aagulemi ḍigey aḍien phọ ạmi.

¹⁰ Ọdi ruukporogh ghan ịmi kakitonom. Ọdi maruphuron oḍuom ologhi phọ ạmi bịn kụ ụwile ịmi mọ mị ụkaraghar umugh.

¹¹ Ẹnaan rịghagham ịmi ologhi iboom; ọdi ruḍighi ịmi ịdipho egbogh ẹpomoghian ọdi.

¹² Ọdi atom weye ẹgham ọdi mọ oru uzuom ịmi ẹgham; bịdi oguphogh riini kụ ọḅukian yogh rokori ghan ogbogo phọ ạmi.

¹³ Ẹnaan meḍighi ịdi abumor ạmi mụḅitonaan ịmi; mị aḍighi ooruen esi awe dị ulegheri ghan ni ịmi;

¹⁴ asiya phọ rꞌạrighiri phọ ạmi mosumughu.

¹⁵ Awe dị oru ghan kụ mị ạko igoni ẹpe kꞌạmi muwula ịmi; ạnmanyaan-otu ạmi ruḍighi ghan ịmi ịdipho ooruen.

¹⁶ Mem lọ mị ạmagh, otelhedom rámeera — ghạlamo mị ụuḅereghian ni nyọdi mọ ụlhoghonaan ịmi ḍịghaagh.

¹⁷ Ạnir ạmi órue ọkparam eḍu ạmi, kụ abumor phọ ạmi ịmi rútuman ghan mun.

¹⁸ Ịbam ạnmuny ụḅitonaan ịmi ọḅile rọmilogh ghan mem lọ ụmiin ịmi.

¹⁹ Ọkaraghi ẹmhu-ạrighiri ạmi ụmiin ịmi ẹnighe ozuughi; bụphe mị ạkaraghi bọ ạphomoghian rọ́wa ghan mun ọmiin ạmi.

²⁰ Aḍizu phọ ạmi okpologhi ạnyu ịḅarara phọ ạmi. Aghuḍum mọ ạmi bịn kụ ạmala usughanaan ịmi.

²¹ Nyina ạrighiri ạmi! Ịnma ịmi ighirigiir! Ạḍighaagh Ẹnaan mịgur ịmi eler ude.

²² Eeghe kụ iḍighi kụ nyina rịgbiphoghom bọ ịmi ịdipho Ẹnaan rịgbiphoghom bọ ịmi? Nyina ịmi kị̋miine ịdi mẹkasian ḍụghum?

²³ Ḅẹlee mọ oye kạatughian ni ikpo ọnhu phọ ạmi ạḅile ạge ạlogh ḍịnya!

²⁴ Ọbo kẹn ạsighe ḍịkuom ạkaam ikpo ọnhu phọ ạmi ạnyu aḍighiigh kụ ạge ịdi kẹtol kꞌagee-pọ.

²⁵ Kụ ạri mị alegheri ni mọ oye odi ni ẹpe kꞌạke dị katu ni ẹpe eekuna phọ ọphel ạmi.

²⁶ Ghạlamo ẹzegh phọ ile ni ḍizu phọ ạmi ẹmadan, sịen phọ mị odimom bọ ni loor phọ aḍien phọ, mị kạmiin ni Ẹnaan.

²⁷ Mị kạmiin ni nyọdi rꞌọkaraghi ariḍien ạmi, kụ ọdi káḍighi ooruen. Aloor ạmi idugh ni loor esi dị nyina ịḅem mọ,

²⁸ “Yira koḍighi ika kụ ọkpilighi nyọdi?” Nyina rẹwa ghan ịyaar ọtuan ozuom ạmi ẹgham.

²⁹ Kụ ọlo nyịidipho ikiilaan elhool ẹgham mọ — elhool ẹgham mọ ẹpe rẹsighe ghan bọ ghẹlhe phọ Ẹnaan keru esi ịkaraph, bịn nyina kelegheri ni mọ oye odi ni dị raagbo ghan ịiruen.