Job 18 - Ạḍinya Iigbia

Bịldad

^1-2 Job, awe dị ọrol ịduon ạna kótue oḅoorian ḍụghum? Eḍighi ịyaar dị nạ aḅoorian kụ aler rụru, yoor mutue ni ọḅaanaan nyịna.

³ Eeghe kụ inyuughiom bọ nyịna ọotughian mọ yoor mạar úlegheri ịdipho ạsinam?

⁴ Nạ kaḍighima ịyaar loor ạna bịn loor ọghagh ologhi phọ ạna. Awe kọḍuaghu sịen ade phọ loor esi ọghagh ologhi phọ ạna ḍụghum? Ẹnaan kẹḅeni rạaḅaraph mọ ẹḍuaghu kụ ẹgbaanyan nyịna ḍụghum?

⁵ Ọtozi ọkaraph oye phọ koḍime ni; anem ọtozi phọ kéemor mun.

⁶ Ọtozi phọ ọsu bọ sịphe otu phọ ọdi koḍime ni.

⁷ Aruwol phọ ọdi ọbo ịmeera ni, kụ ọlo nyịidipho ọdi raakpeteghaan; ọdi mameel — igbiighi phọ ọdi memeel epum nyọdi.

⁸ Ọdi marelhe ạki ameel ọseki, ḅịle maghinighi ruwol phọ ọdi;

⁹ aḍiphil mesiph riighim ọdi kụ ẹpam nyọdi.

¹⁰ Sịen ade phọ ọbooghi ni ḍiphil; mọkpami ḍiphil sịphe eten phọ ọdi.

¹¹ Aḍiigu ekoom nyọdi; rạdaph ghan nyọdi tọrotoro ekpisi lọ ọdi rạki.

¹² Ọdi aḍighi ghan ni ọdaam, kụ ọlo nyịidipho ọdi odi ghan ọkoony; amabi ạmeera kụ rakori ghan nyọdi.

¹³ Ẹzegh aḍuugh-aḍuugh melheeny loor phọ ọdi kụ meḍighi ịdi ạraghaagh rꞌaruwol phọ ọdi mẹḅor.

¹⁴ Mọghogh nyọdi omitiom sịphe ogbogo phọ ọdi ạmaar ghan bọ ạrol, mọghogh nyọdi ọki ọmeremi risigh Ọdaam Ḍuugh.

¹⁵ Nyịidipho tọro oye katue ni atugh sịphe ogbogo phọ ọdi — mem lọ oodu ọogho.

¹⁶ Ạsini phọ rꞌịla phọ ọdi mẹgharaghar.

¹⁷ Aḍien phọ ọdi emite ghan bọ meḍim sịen otu phọ ḅịle rꞌẹpe erugh. Oye nyọdi kạ́atughian mun.

¹⁸ Koporogh ni bịdi sịen ade awe phọ, koporogh bịdi esi ạḍiḅaal osumeeny esi ufiri.

¹⁹ Ọdi ọ́moogh ẹemara ẹemara, kꞌọdi oye ósugha.

²⁰ Emiigh ẹpe emitenom erumuḍio phọ kụ esi ẹpe emeelom mọ, oomo awe lọ ọnaghan ịpe emitenaan bọ bịdi ukpereghaan ni kụ ọmoogh oghiilaan.

²¹ Ọpo kụ ọda ịkaraph awe, ọda awe dị ụ́maghami Ẹnaan ịyaar.