Job 15 - Ạḍinya Iigbia

Ọghaaph dị amuneniom ịyal Ẹlifaz

^1-2 Eepu ọghaaph, Job! Eepu ọghaaph!

³ Oye dị ạsu ologhi ólho dị kạkaaph ịphen nạ rạkaaph bọ ọbo ọbo ạpela loor phọ ọdi rꞌọdo ikpo ọnhu phọ ịphen phọ ị́moogh bọ ịyaar oḍighinom.

⁴ Eḍighi ịyaar dị nạ ạmoogh ịphen nạ ragbiighi bọ, pọ oye kákiilaan mun Ẹnaan; oye kạ́aḅereghi mun nyọdi.

⁵ Ẹkaraph eḍighinom ạraraar phọ ạna eḍeenaan ni esi ịphen nạ rạkaaph bọ; nạ rạwa ghan ạaghian ọman ikpo ọnhu olegheri ịyaar.

⁶ Mị kạ́pu asoph aphume nyịna; nạ mạmoogh ni apum mọ esi oomo ọghaaph phọ ạna.

⁷ Nạ ragbiom ghan mọ nạ kụ ọḅel oye dị ọmar ḍụghum? Nạ ụrol li mem mọ Ẹnaan ẹlhem bọ rạaḅaraph phọ?

⁸ Nạ ụnaghanan ni ịpe Ẹnaan egbiighi bọ? Ogina ạna bịn kụ ụmoogh oomo olegheri-ịyaar awe ḍụghum?

⁹ Ịyaar ílho dị nạ alegheri dị yoor úlegheri aani.

¹⁰ Yoor ụtuugha olegheri-ịyaar ḍịghaagh awe ạsuol — weye dị mọmar ri kụ ogbi ọmar ọde ạna.

¹¹ Ịidereghi phọ Ẹnaan rẹngo bọ nyịna, eeghe kụ iḍighi kụ nạ akel bọ? Yoor momiigha ni loor ọkaaphanaan nyọdi.

¹² Kụ ọlo nạ ạnmagharan kụ ruphoghom ghan iyoor ọghagh ologhi.

¹³ Nạ rạkagham ologhi Ẹnaan, ạḅile rạḅaam ghan nyọdi.

¹⁴ Oye katue ni ạkar aseleman ḍụghum? Oye katue ni aseleman risigh Ẹnaan ḍụghum?

¹⁵ Igey ni, Ẹnaan ị́sighe emooph ọdi ị́kpasi esi ạruukpaany phọ ọdi; ghạlamo bịdi phọ kẹn ni bịn íseleman risigh ọdi.

¹⁶ Kụ oye rạpughol ghan ịkaraph ịdipho ạmuum; ii, oye ạapuan ni loor, ọ́moogh ịyaar oḍighinom.

¹⁷ Nyịidipho, Job, ler rụru ịphen mị alegheri bọ.

¹⁸ Awe olegheri-ịyaar mụtughemi ni ịmi iphigh ạraraar dị bịdi ọtuugha ḍịghaagh ạburude ạbidi, kụ bịdi ịyaar ụ́booghi.

¹⁹ Aruuruen ụ́tol ghan ẹmha phọ ạbidi; oye ọ́rol dị kaḍiemiom bịdi ạgbole esi Ẹnaan.

²⁰ Ọkaraph oye dị rạkpilighi ghan bụnon kạtolom ịminimiin oomo aghuḍum mọ ọdi.

²¹ Ạroḍogh aruugu kẹḅaaghi ghan sịphe areḅeri phọ ọdi, ḅịle ạruḅa ozuom ghan nyọdi mem dị ọdi ologhi useere.

²² Ọdi ọ́moogh oḍuom ologhi okpetenaan esi ufiri loor esi dị elhool ẹgham kẹḍua ni ekpisi bịn etu ekori ghan nyọdi oghiigh.

²³ Kụ ạredelhe rekori ghan ạany aḍizu phọ ọdi. Ọdi alegheri ni mọ ẹpe arisigh phọ ọno ebil li;

²⁴ ịkaraph ạraraar rekori ni ozuom ọdi ịdipho ọolha-ẹmha dị ạmoogh ịikpo.

²⁵ Ọpo kụ ọda oye dị ạbugh ḍịghaagh ọdi kụ aphoghomiom Ẹnaan kụ aafolomi Ẹnaan Oomo Ịikpo phọ.

^26-27 Oye phọ ọpo phọ apoophe loor ạḅile ạḅaar ẹmhu; ọdi amighirom kụ akoph ọsuaram ọdi kụ akiil rạki eenan rꞌẸnaan.

²⁸ Ọpo kụ oye phọ ạkpar bọ apu igbogh ạramha kụ ạsighiogh ruutu dị ạbuo otu phọ mosumughu, kụ ọlo ẹgham kepiemi ni rạmha phọ rꞌaruutu phọ ịpe phọ.

²⁹ Ọdi kạ́tolom ẹelha phọ ébia; ịyaar ílho dị ọdi ạmoogh dị kebia. Ghạlamo oogho phọ ọdi bịn kape ni,

³⁰ ḅịle kẹn ọdi kákpetenaan ufiri. Ọdi kạkigh oreeny dị ạnian mekoph ịla phọ ọdi, dị ookuugh mạsighiogh rịnya phọ ạḍuanam.

³¹ Eḍighi ịyaar dị ọdi ayeela kụ ạsighe emooph ọdi ạkpasi esi ịkaraph, pọ ịkaraph kụ keḍighi ruunmo ọdi.

³² Tụtu amem mọ ọdi remuneen ọdi mạgharaghar ịdipho ọla oreeny dị kátue mun ạḅile apoph.

³³ Ọdi kạkigh oreeny avain dị arughuuny phọ ẹghar eloogh; kạkigh oreeny-ọliv dị ạrinya phọ mẹghar.

³⁴ Ẹemara ẹemara kẹ́tolonaan weye dị Ẹnaan úlegheri, ḅịle kẹn ạnian kụ keegulemi ruutu dị ọloghom ikpoki oti-ọman.

³⁵ Bụen phọ kụ awe phọ rogbiighi ghan bọ ịiḅaghami kụ oḍighi ịkaraph; sịphe iloghi phọ ạbidi iigbegheḍiom bịn kụ imuza.