Job 10 - Ạḍinya Iigbia

¹ Ạdol phọ mịpher ịmi. Nạghan emoghi eghiḍim mọ ạmi.

² Kásoph ịiruen úphume ịmi. Ụḅeni ịmi. Eeghe kụ ologh phọ mị asoor bọ?

³ Eḍighi ni elhiom ḍụghum ịduon nạ rụkpilighi bọ ịmi? Ọḅitonaan ịyaar dị nạ rꞌaloor kụ ạlem? Kụ ọyigh ophogh ghan igbiighi ạbukaraph awe phọ?

⁴ Nạ rạmiin ghan ni rạraar ịduon yoor rọmiin ghan bọ ḍụghum?

⁵ Aghuḍum mọ ạna akper ri ịduon ọphon ayoor ḍụghum?

⁶ Eeghe kụ iḍighi bọ kụ nạ agbiighi bọ oomo ịkaraph phọ ạmi, ạḅile ạwa amitiom tọrotoro ọpioman lọ mị ạmoogh.

⁷ Nạ alegheri mọ mị ụ́piom, ḅịle mọ oye kátue ụphel ịmi ḍịghaagh ạna.

⁸ Ạraghaagh phọ ạna kụ ịlhem ịmi, kụ nyịidipho iniin phọ ạraghaagh phọ ạna miigulemi ịmi.

⁹ Kábula mọ nạ ụsighe ọposo kụ ụlhemom bọ ịmi. Nạ rạwa ọgbe ạmi oḅulemi ịsiphe ophugh phọ ḍụghum?

¹⁰ Nạ ụngo ọde phọ ạmi ịnyaam mọ ụmar ịmi; nạ aḍighi ịdi mị aphoph sịphe ọkuruḅaka onhiin phọ ạmi.

¹¹ Nạ ạḅol loor phọ ạmi adoghoḍi ịḅarara rꞌazin ighiph kụ ạsighe iphulupul rꞌaruzu aakpereghiom ịḅarara phọ.

¹² Nạ ụngo ịmi ghuḍum rꞌẹphomoghian dị rémuneen, kụ ịma ephoghom mọ ạna kụ ịpham bọ ịmi kụ mị odi ghan bọ.

¹³ Kụ ọlo nyịidipho mị malhegheri mọ oomo amem mọ nạ ạaghian ghan ni agbiighi oḍighi ạmi ịkaraph.

¹⁴ Nạ ugon ghan ọmiin mụghumo mị kaḍighi ni ịkaraph pịdi nạ usiph ịmi ịdi ọwilenaan kạ́tol.

¹⁵ Ịduon mị aḍighi bọ ịkaraph bịn mị aḍigh ịiḅaghami rꞌạna, kụ ọlo mem lọ mị aḍighi ịlo ẹnighe, mị rạ́moogh ghan ḍịseph. Mị rạmiinom ni iboom ḅịle umugholoor rusiph ni ịmi.

¹⁶ Eḍighi ịyaar lọ ạraraar ịnighenaan ịmi, nạ uusophoghian ịmi ịdipho ạnam-dịka. Loor ọteenyom ạmi oḍighi ịkaraph nạ ạkar kụ raḍighi ghan ịiḍaany.

¹⁷ Oomo amem nạ rạmoogh ghan ni weye ọgba ịkaraph ịlo ạmi. Ọghagh ologhi phọ ạna esi ạmi rapoph ghan bịn; oomo amem nạ ragbiighi ghan imoom ịlo nạ kuzuom ịmi.

¹⁸ Eeghe kụ iḍighi, Ẹnaan, kụ nạ ameera bọ mọ ụmar ịmi? Ọbo mị mumugh kụ oye agbi ọmiin ạmi.

¹⁹ Ọḍua otu-ọony bịn osuma mịnighe kẹn ni ịdipho dị úmite romite.

²⁰ Ịduon phọ aghuḍum mọ ạmina rámuneen ḍụghum? Ụwile ịmi. Meera mị ụkelom aani mem mọ ạmuen esugha bọ.

²¹ Kébia ni kụ mị akeel kụ mị kạ́ḅile mun aḅula — mị rakeel ẹmha ufiri rꞌọto,

²² ade ufiri, aroogho ḅịle rꞌịgbaragbara, ẹmha dị ạḍiḅaal phọ rꞌaloor kụ eḍighi ufiri.