Jerimaya 9 - Ạḍinya Iigbia

¹ Mụghumo aghuḍia ạmuum kụ odi ẹmhu ạmi, ḅịle kẹn ariḍien phọ ạmi eḍighi ḍikol izin, pịdi mị atue amoghi ḍughul rꞌootaany loor esi awe phọ ạmi mọze bọ.

² Mụghumo mị ụmoogh ni esi ọrol ẹpe ẹdala phọ, ekpisi dị mị kạkelan weye phọ ạmi. Oomo phọ ạbidi úmeeraam mun Ẹnaan, oḍighi egu areepheeny.

³ Bịdi ookolobian ọgba ọkpe oomo amem; iipheeny kụ iḍia ẹmha phọ kpạripe rꞌigey. Ọmoogh-we phọ ạḅem mọ, “Awe phọ ạmi roḍighi ghan ịkaraph bịn kotum ịkaraph, ḅịle kẹn ịmi elegh ụ́logh ịdipho Ẹnaan phọ ạbidi.”

⁴ Ẹkpe ni dị tọrotoro oye kagona loor esi ọyaghiri ọdi, ḅịle kẹn oye umor ọdi óḍuom mun ologhi, loor esi dị tọrotoro umor aḍighi oye areekeleghian ịdipho ạJekob, ḅịle kẹn tọrobo oye rạgbaanaan ni ịkaraph rịghiri ọdi.

^5-6 Oomo phọ ạbidi rookeleghi ghan ni rịghiri ạbidi, ḅịle kẹn oye rạ́gba ghan mun igey phọ; Bịdi mọtughemi sinem mọ ạbidi ọgba ghan ọkpe ḅịle kẹn bịdi kótue ọbile ịkaraph. Bịdi roḍighi ghan iniin ịkaraph bịn kotum ịnon, ḅịle kẹn iniin areekeleghian retum ghan ịnon bịn. Ọmoogh-we phọ ạḅem mọ awe phọ ọno moghel nyịno.

⁷ Loor esi ịduon phọ Ẹnaan Oomo Ịikpo Ọmoogh-we phọ ạḅem mọ, “Mị kạasa weye phọ ạmi ịdipho okuron kụ mị ạdegh bịdi apogh. Awe phọ ạmi moḍighi ịkaraph — eeghe kụ ẹdi mị kạḅile bọ aḍighinom bịdi?

⁸ Asinem mọ ạbidi ẹkigh ịkpina aḍuugh-aḍuugh; bịdi rọgba ghan ọkpe oomo amem. Tọrotoro oye rạkaaph ghan ịma ikpo ọnhu kụ kạḅeni matuman phọ ọdi, kụ ạri ịduon phọ ạkaraghi kụ rạkpaminaan ghan nyọdi ḍiphil.

⁹ Mịna kạ́liom bịdi loor esi ạraraar phọ ịphen phọ ḍụghum? Mịna káḅulemian ịkaraph eelhe dị ẹrol ịduon phọ? Mị Ọmoogh-we phọ kụ mạḅem.”

¹⁰ Mị ụḅem mọ, “Mị kamoghinaan ruugum mọ, ḅịle kẹn rꞌạroogho phọ, loor esi dị bịdi mẹnuughi ḅịle kẹn oye ráten ghan mun ẹpe phọ. Rọ́naghan ghan mun ẹḍogh ịnam; ịnun rꞌilhom ịnam mesumughu.”

¹¹ Ọmoogh-we phọ ạḅem mọ, “Mị katene Jeruselem egu ạrana; keḍighi marugh ịkaraph asuogh; igbogh ạramha phọ aJuda keḍighi ẹdala, esi dị oye kátugh mun.”

¹² Kụ mị apuru mọ, “Ọmoogh-we, eeghe kụ iḍighi kụ ade phọ mẹgharaghar bọ eten ẹdala phọ, dị tụtu oye ráten ghan mun bọ? Ạnhian kụ ạsu ologhi dị katue alegheri ịphen phọ? Ạnhian kụ ẹdi nạ mạḅeni ghan ịphen phọ, pịdi ọdi ạḅeni bụnon awe?”

¹³ Kụ Ọmoogh-we phọ ạphagharanaan mọ, “Ịphen phọ imite loor esi dị awe phọ ạmi mọwile ịpe mị ạtughemi bọ bịdi. Bịdi ịmi ụ́naghanan ḅịle úḍighi ịpe mị ạḅeni bọ bịdi.

¹⁴ Kpạripe ghụn, bịdi ọḅaar ẹmhu kụ rọoḅereghi ghan eru phọ aBaal, ịdipho ạburude ạburude phọ ạbidi ọtughemi bọ bịdi.

¹⁵ Kụ iḍighi kụ nạghanan ịpe mị Ọmoogh-we Ọkar egbogh Ẹnaan phọ Ịzirel kaḍighi bọ: mị kạngo weye phọ ạmi ireeny eghiḍim mọ olhe ḅịle kẹn rꞌạmuum dị kakiigh oye mọ bịdi ọphughol.

¹⁶ Mị kạsighe bịdi ạwalalami igbo areelhe dị bịdi rꞌạburude ạburude ạbidi kőlhegheri ghan, ḅịle kẹn mị katom ni weye ẹgham mọ oru oogulemi bịdi ọmadan.”

Awe phọ aJeruselem omoghi ọlom ọloghonaan ạḍighaagh

¹⁷ Ọmoogh-we Ẹnaan Oomo Ịikpo phọ ạḅem mọ, “Ịitughian ịphen remite bọ! Ịmagh weye ọto phọ mọ oru, ḅịle rꞌạnmariir phọ ạbuphe rọmoor ghan bọ sụor amaḍi phọ.”

¹⁸ Awe phọ ọḅem mọ, “Ịḅeni bịdi mọ oogborion ụmooronaan iyoor ḍụor amaḍi, tụtu izin emuza riḍien ayoor, ḅịle kẹn iidum ariḍien phọ ayoor ẹḅor loor esi emoghi phọ.”

¹⁹ Ịnaghan ẹḍogh emoghi ẹpe Zạyon, “Yira mophe! Yira moofola ọmadan! Ẹkpe ni dị yira kọbile de phọ ayira; molhereghi ruutu phọ ayira.”

²⁰ Mị ạḅem mọ, “Ịnaghanan Ọmoogh-we phọ, nyina ạnmariir phọ, ẹḅile ẹphamanam ikpo ọnhu phọ ọdi. Ịtughemi nmạnyaan phọ anyina ịlo rọto ghan ọto, ḅịle kẹn rꞌạrighiri phọ anyina ịlo ọmoor ghan ạḍuor amaḍi.

²¹ Aḍuugh mẹḍua rughuugh ookuugh ayoor etu eḍigh rigiga ọdaam mọ ayoor; aḍuugh mẹze ịbam ạnmuny phọ ẹpe aroḅodo phọ ḅịle kẹn rꞌugheel ạnmuny phọ ẹpe asiḍighi phọ.

²² Aruzu awe dị momuughu ẹsaraan ni oomo phọ ariisi phọ ịdipho arugu ẹenir lọ koḅephom eḍien, ịdipho ịbiakpa lọ ogbo bịn kụ ọwile dị oye ookpomoghi úlho. Ịphen kụ ịdi Ọmoogh-we phọ ụḅeni ịmi mọ kạaph.”

²³ Ọmoogh-we phọ ạḅem mọ, “Awe olegheri-ịyaar kúubagaam olegheri-ịyaar phọ ạbidi, awe ịikpo kẹn kúḅoom ịikpo phọ ạbidi, ạraalha kẹn kúḅoom ẹelha phọ ạbidi.

²⁴ Eḍighi ịyaar dị oye rạwa obaga, pọ abaga mọ ọdi ulegheri ni ịmi ạḅile ụnaghanan ịmi, loor esi dị ẹphomoghian phọ ạmi rénmia ghan, ḅịle kẹn mị raḍighi ghan ịpe eḍighi bọ elhiom ẹḅile esel. Ịphen kụ ạraraar dị ịḅeeraan ịmi. Mị Ọmoogh-we phọ kụ mạḅem.”

^25-26 Ọmoogh-we phọ ạḅem mọ, “Amem retu ni dị mị kạliom weye phọ Ijipt, Juda, Idom, Amon, Mọab bịle kẹn rꞌaweye ẹpe ẹdala phọ, bụphe oghula yogh bọ rụmhu phọ ạbidi. Oomo phọ ạbuen phọ oḍuna yogh ni, kụ ọlo ụ́pamanam ịyo phọ ịpe oḍuna phọ aḍeenaan bọ. Rꞌoniin ọnyo ạbuen phọ ḅịle kẹn rꞌoniin oye ọlo Ịzirel ólho dị ạphamanam ịyo phọ ạmi.”