Jerimaya 5 - Ạḍinya Iigbia

Ịkaraph phọ aJeruselem

¹ Weye aJeruselem, ikiil oomo phọ areten phọ anyina! Ipogh ekitonom! Ẹmiin rꞌaloor anyina! Ịwa oomo phọ asiḍighi phọ! Nyina ketue ni ẹmiin oniin oye lọ raḍighi ghan ịlo ẹnighe kụ ạḅile ạphamanam omeeraam Ẹnaan phọ ḍụghum? Eḍighi ịyaar dị nyina ẹmiin, pọ Ọmoogh-we phọ kạbilenaan ni Jeruselem.

² Ghạlamo ịduon nyina ẹḅem bọ ni mọ nyina rẹeḅereghi ghan ni Ọmoogh-we phọ, nyina rẹḅem aani ghan ni bịn.

³ Ọkaraghi agey Ọmoogh-we phọ rạwa ghan weye dị ọphamanam omeeraam mọ ọdi. Ọdi ịgur inyina, kụ ọlo nyina ị́naghanan; ọdi iigbighiḍi inyina, kụ nyina ímeera kẹn ni ị́naghan. Nyina ịḅaar ẹmhu kụ ímeera íkiton esi ịkaraph phọ anyina.

⁴ Kụ mị ạatughian mọ, “Bụen phọ arukulom mọ ḅịle rꞌạbuphe ịyaar úlegheri bọ. Bịdi roḅo ghan ịlo arolologhi; bịdi úlegheri ịpe Ẹnaan phọ ạbidi rạwa bọ, ịpe Ọmoogh-we phọ rạwa bọ mọ bịdi oḍighi ghan phọ.

⁵ Mị kạki ạteeny bụo ọtooghi phọ kụ ạḅaanaan bịdi. Ọkaraghi agey bịdi olegheri ni ịpe Ẹnaan phọ ạbidi rạwa bọ, ịpe Ọmoogh-we phọ rạwa bọ mọ bịdi oḍighi ghan phọ.” Kụ ọlo oomo phọ ạbidi moghel ịto Ọmoogh-we phọ ḅịle kẹn úmeera ụ́naghanan nyọdi.

⁶ Ẹphen kụ ịyaar phọ ạnam-dịka kẹḍua bọ ni ẹpe ẹekpua phọ etu ẹze bịdi; ilhom ịnam kẹḍua ni ẹpe ẹdala phọ etu ẹpanyi bịdi kụ ariitiir eḅinighu ghan ekitonom rạmha phọ ạbidi. Eḍighi ịyaar dị awe phọ ạbuphe omite erugh, ịnam mọ kẹpanyi ni bịdi loor esi dị ịkaraph phọ ạbidi eḍiza ni mọ ẹphughan ḅịle amem etum mem bịdi mọḍua esi Ẹnaan.

⁷ Ọmoogh-we phọ apuru mọ, “Eeghe kụ iḍighi kụ mị kạbilenaan bọ ịkaraph awe phọ ạmi? Bịdi mụwile ịmi ọki ọoḅereghi rụmugh dị ị́moogh ịyaar oḍighinom. Mị ụngo ni weye phọ ạmi eḍien dị ẹpher bịdi, kụ bịdi ọḅile ghụn olhe ghan ẹmha ọsighe mem mọ ạbidi ọtolan ghan rꞌạbuo oliom ẹmha.

⁸ Bịdi ụmoogh ẹephua ịdipho ilephiri ạrusu dị rọngo ghan egey eḍien, tọrotoro ọnyo ạbidi ạmoogh ẹephua ọrolan esi rꞌạnir amatuman ọdi.

⁹ Ị́kpianaan dị mị kạliom bịdi loor ạraraar phọ ịphen phọ, ạḅile aḍighi aḅulemian eelhe dị ẹrol ịduon ḍụghum?

¹⁰ Mị katom ẹpomoghian mọ aru alereghi ireeny amiim avain awe phọ ạmi kụ kúugulemi ụ́madan. Mị kạḅeni bịdi mọ oḅonyon ịla phọ, loor esi dị ịla phọ ịpe phọ kị́lo ạmi.

¹¹ Awe phọ Ịzirel rꞌaJuda mubi ịmi. Mị Ọmoogh-we phọ kụ ụḅem.”

Ọmoogh-we phọ maghel Ịzirel

¹² Awe Ọmoogh-we phọ mọpharanaan nyọdi kụ ọḅem mọ, “Ọdi kạ́karaghi áḍighi ịyaar. Yira kọ́moogh ḍịkparamineen amem; yira kọ́moogh ẹgham mụghumo ịgbakuro.”

^13-14 Bịdi mọḅem mọ ariil phọ Ẹnaan ụkigh ịdipho arukuru dị ọloghoḍi ookuugh bịninin, ḅịle kẹn ụ́moogh dom dị ẹḍua ḍịghaagh Ọmoogh-we phọ kụ eru. Egbogh Ẹnaan Oomo Ịikpo Ọmoogh-we phọ ụḅeni ni ịmi mọ, “Jerimaya, loor esi dị awe phọ ạbuen mọghaaph bọ rạraar phọ ịphen, mị kaḍighi ịdi ikpo ọnhu phọ ạmi kẹkigh ịdipho ạnian sịphe ọnhu phọ ạna. Awe phọ kọkigh ịdipho ịpe, kụ ạnian phọ kele ni bịdi ẹman.”

¹⁵ Nyina awe phọ Ịzirel, Ọmoogh-we phọ mạsighe eelhe dị edi egher ratu ozuom anyina ẹgham. Eḍighi ni egbaany eelhe dị ẹmoogh ịikpo, eelhe dị nyina ị́naghan ọnhu ẹmha ạbidi.

¹⁶ Awe ẹmha ạbidi dị rọpam ghan sịkumugh oḍighi ni rephelegbe awe ẹgham dị rọ́nma ghan ighirigiir mem lọ rokiigh oye.

¹⁷ Bịdi koogulemi ni ịizupha phọ rꞌariiḍien phọ anyina; bịdi kọze ni nmụny rꞌạnmanyaan phọ anyina. Bịdi kọze ni oomo ịnam mọ anyina ọḅile olereghi ireeny amiim avain rꞌaruman phọ anyina. Igbogh ạramha phọ anyina ọmaar bọ oghoony yogh, awe ẹgham mọ ạbidi koogulemi ni.

¹⁸ Ọmoogh-we phọ ạḅem mọ, “Ghạlamo ariiḍio phọ ịpe phọ ni mị káagulemi ạmadan weye phọ ạmi.

¹⁹ Mem lọ bịdi opuru ịpe eḍighi bọ kụ mị aḍighi bọ oomo ạraraar phọ ịphen phọ, Jerimaya, ḅẹni bịdi mọ ịdipho bịdi ụwile bọ ịmi kụ okumu iiruen ạrumugh sịen ẹmha phọ ạbidi, ịdipho kẹn kụ ịdi bịdi kokumu ruuruen ẹpe eelhe dị ítu nyẹen ạbidi.”

Ẹnaan ẹpur rụru awe phọ ọdi

²⁰ Ọmoogh-we phọ ạḅem mọ, “Ḅẹni ẹemara ẹemara phọ ạJekob, ḅẹni weye phọ aJuda:

²¹ Nyina awe dị iloghi ílho, ịnaghanan. Nyina ẹmoogh riḍien kụ rẹ́miin ghan eten; ẹḅile ẹmoogh reḅeri kụ rẹ́naghan ghan ịyaar.

²² Mị kụ Ọmoogh-we phọ; eeghe kụ iḍighi kụ nyina ịmi íghiilaan bọ? Eeghe kụ nyina íkpereghaan bọ risigh ạmi? Mị ạsighe ịisaar kụ ạloghom ọku ạngo otu-ḅualhe phọ, ọku dị odi ghan bịn dị ọdi kátue ạḅeeny. Ọphiiny ạbazi phọ katue ni apiigha, kụ ọlo kátue ạḅeeny sịphe ọku phọ; oologh phọ katue ni amite, kụ ọlo kátue ạ́ḅeeny.

²³ Kụ ọlo nyina awe phọ ạbuen! Nyina ịgbagara awe oḅom ẹmhu; nyina mẹḅitonaan ẹḅile ịwile ịmi.

²⁴ Nyina ị́itughian oghueni ạmi ghạlamo ịduon mị kụ rạngo ghan bọ ni ọlophia phọ ạḅile ạnighemi ibugha phọ anyina lhạ etum lhạ, mem aghozogh rꞌarunu.

²⁵ Kpạripe ghụn, ịkaraph phọ anyina ímeera mọ igey ạraraar phọ ịphen ịteeny inyina.

²⁶ “Ạbukaraph awe otugh ni igbo awe phọ ạmi; bịdi rogon ghan ịdipho awe lọ olerenaan ịnun ịseki, kụ bịdi mọkpami siphil osiphom awe.

²⁷ Ịdipho ọtayaam ịtaya ramuzeḍi ghan bọ ịnun okporoma ọdi, ịduon kụ ịdi bịdi mowum rạraar awe omuzeḍi ruutu ạbidi. Ẹpe kụ ịyaar phọ bịdi mọmoogh bọ ịikpo phọ rꞌikpoki phọ,

²⁸ kụ ọḅile ole ẹpher, ọbughogh. Eekuna ílho ịkaraph iiḍighi phọ ạbidi. Bịdi rọ́ngo ghan bụnyigo ạnmuny riliom mọ ạbidi mọ kẹn iiḅi ịiruen weye lọ rọkpilighi.

²⁹ “Kụ ọlo mị Ọmoogh-we phọ kạtuan ni rạraar phọ ịphen phọ ạliom bịdi; mị kaḅulemian ni eelhe phọ ẹphen phọ.

³⁰ Ẹekia ịyaar aruugu memite ni sịen ade phọ:

³¹ ariil Ẹnaan phọ rọgba ghan ọkpe bịn; ariil ạrikia phọ rọdaph ghan ịlo ariil phọ ọto, kụ awe phọ ạmi ụ́ḅem ịyaar. Kụ bịdi koḍighi bọ ika mem dị oomo phọ ịdi kesi bọ eekuna phọ?”