Jerimaya 48 - Ạḍinya Iigbia

Oguulemi Mọab

¹ Ịphen kụ ịpe Ẹnaan Oomo Ịikpo Ọmoogh-we phọ ạḅem bọ ịlo ạMoab: “Ighirigiir ẹrolonaan weye aNebo — ẹmha ạbidi mophiemi! Mọkpar opu Kiriataim, esi ịikpo phọ ọdi mowunughi, kụ we phọ ọdi mọngo roofola.

² Ẹnighe phọ ạMoab mephe. Ẹpomoghian phọ mọsighe Hesbon kụ roopuruan ophiemi eelhe phọ ạMoab. Ẹmha phọ aMadmen kokpomori ọnhu; Awe ẹgham kotu ni ozuom.

³ Awe phọ aHoronaim mọlo agey, ‘Igbagbaar-o! Oogulemi-o!’

⁴ “Moogulemi Mọab; Ịnaghan emoghi ạnmuny phọ.

⁵ Ịnaghan ịdi bịdi roḅeleghu rꞌọto ọgbal eten phọ eten bọ rẹki Luhit, ịdi bịdi romoghi loor ịiḅaghami ẹpe eten phọ esoor bọ rẹki Horonaim.

⁶ Elhom elhom, ikiil ọphelom aghuḍum anyina! Ikiil ẹḍua ịdipho elhom ẹnam adool rekiil ghan bọ ẹpe ade ịisaar phọ!

⁷ “Mọab, nyina iḍuom ologhi ịnyaam rꞌẹelha anyina kụ nyịidipho kọkpar ri ipu inyina; Eru phọ anyina Kemos kesuma ni ẹtol dọl iiruen, ẹḅaram ịkpana ạnmuny ạraalha rꞌariil ạrikia phọ ọdi.

⁸ Rꞌeniin ẹmha kékpetenaan dị kópiemi; de eḍiiny rꞌade dị eeleeny kọpue ni. Mị Ọmoogh-we phọ kụ mạḅem.

⁹ Iseere ḍighiigh oḍi ẹpe Mọab; kébia kụ ọpueghi. Ạramha phọ ọdi keegulaan ni, kụ rꞌoye sịphe kạ́tol mun.”

¹⁰ (Itonyonaan edianaan oye lọ úḍighi oḍighi Ọmoogh-we phọ rꞌoomo ologhi ọdi! Itonyonaan edianaan oye lọ kạ́gurogh kụ akiigh.)

Rạmha phọ ạMoab mophiemi

¹¹ Ọmoogh-we phọ ạḅem mọ, “ẠMoab mạrol ghan ni ịma ạdol kụ kọ̋sighe ghan ọghimom iiruen arikpisi. ẠMoab ạghigh miim dị ụ́meleghi kụ ụ́sighe eeku ótene eeku. Ḍidugh phọ kọ̋phueri kụ edi ghan bịn kꞌagee-pọ.

¹² “Kụ nyịidipho, amem retu ni dị mị kazu Mọab atoph ịdipho amiim. Bịdi kooku ruuku amiim mọ ọdi kụ oḅomoghi ootughuḍi.

¹³ Kụ awe ạMoab kọmoogh mabi esi eru phọ ạbidi Kemos, ịdipho Ịzirel ọmoogh bọ mabi esi ạBetel, eru oḍuom ologhi phọ ạbidi.

¹⁴ “Weye ạMoab, eeghe kụ nyina ẹḅem bọ mọ nyina arephelegbe phọ, awe dị oḍeenaan ạkpo ekpeḍien mem ẹgham?

¹⁵ Mọab rꞌạramha phọ ọdi mophiemi; ọkar ịma ugheel ạnmuny phọ mobenogh ọze. Mị kụ ọdaam mọ, Ẹnaan Oomo Ịikpo Ọmoogh-we phọ, kụ mị mạḅem.

¹⁶ Aḍio ịiruen ạMoab retu; oogulaan ọdi mạteeny.

¹⁷ “Imoghinaan eelhe phọ ẹpe, nyina phọ erugh bọ etuman, oomo anyina ạbuphe elegheri bọ ḍien igbogh phọ ọdi. Ịḅem mọ, ‘Ịikpara ịtooghi phọ ọdi molher ude; eegu rꞌịnyaam mọ ọdi ílho mun.’

¹⁸ Nyina phọ edi bọ Dibon, isoor sịphe esi eghuan phọ anyina kụ ẹrol ude loor ophugh; ọpo rapiemi ghan bọ Mọab odi sịen kụ mạphue ịikpara ariisi phọ ọdi.

¹⁹ Nyina phọ ạbuphe erugh bọ Aroer, ịmeera ọgbal eten kụ ekori; Ipuru bụphe rokiil bọ kọḍua ipuru bịdi ịyaar phọ emite bọ.

²⁰ ‘ẠMoab mameel,’ bịdi kọpagharanaan, ‘moghinaan! Eḍighi roofola. Ịgba eleenye ọgbal Ọphiiny Anon mọ mophiemi Mọab!’

²¹ “Ịiruen meruanaan rạmha ịpe edi bọ eyekele eegum mọ: Holon, Jaza, Mefaat,

²² Dibon, Nebo, Bẹt Diblataim,

²³ Kiriataim, Bẹt Gamul, Bẹt Mion,

²⁴ Keriot rꞌaBozra. Ịiruen meruanaan oomo ạramha phọ ạMoab, kꞌẹekela kꞌeesulom.

²⁵ Ịnyaam mọ ạMoab mephe; ịikpo phọ ọdi mophiemi. Mị Ọmoogh-we phọ kụ mạḅem.”

Kosooromi Mọab

²⁶ Ọmoogh-we phọ ạḅem mọ, “Ịngo miim ạMoab ọdi ạyegheyeghe, loor esi dị ọdi mạḅaar ẹmhu esi ạmi. ẠMoab kaakila ạnyu izuughi ọdi, kụ awe ọmilogh.

²⁷ Mọab, tụutughian ịdipho nạ arulughi bọ weye phọ Ịzirel? Nyina iḍighi bịdi mụdi usiphom bịdi rꞌaḍita ạruḅa.

²⁸ “Nyina awe phọ edi bọ ẹpe Mọab, ịbile rạmha phọ anyina! Ịki erughogh ẹpe iigboom eegum! Ịtol ịdipho ọkurughozo dị ạlogh otu ọogaany eḍiiny.

²⁹ ẠMoab aphoophe loor iboom! Mị mạnaghan ịdi awe phọ opoophe loor ạbidi, oobaga kụ ogbiighiom ologhi mọ bụno ọman ni mạar,

³⁰ Mị, Ọmoogh-we phọ, alegheri ni ịlo ophoophe aloor phọ ạbidi. Oobaga phọ ạbidi ọ́moogh ịyaar oḍighinom, kụ ạraraar lọ bịdi oḍighi kẹ́tol ébia.

³¹ Loor ịduon phọ mị kamoghinaan tọrobo oye lọ odi Mọab ḅịle rꞌawe aKir Heres.

³² Mị kamoghinaan weye aSibma, kụ apuemi weye aJazer. Ẹmha aSibma, nạ ạkigh oozin oreeny dị ịla ẹḅeeny Ọphiiny-Ạla kụ ẹghi esi kꞌẹpe Jazer. Kụ nyịidipho iimuma osoor rꞌiimuma avain phọ ạna mophiemi.

³³ Ọḅaal ologhi rꞌibo mọsighe sịphe ade ẹnuum mọ ạMoab ọḍuanam. Mị kőmeera mun mọ amiim akil sịphe arughuugh amiim mọ; oye ólho mun dị kaḍighi miim kụ ạlho ḍịolho iboh.

³⁴ “Awe phọ aHesbon rꞌEliale omoghi agey, kụ emoghi phọ ạbidi ọnaghan kꞌẹpe Jahaz; awe aZoar ọnaghan kẹn ni, kụ bụphe ọdi bọ ẹpe Horonaim rꞌEglat Selisiya ọnaghan kẹn ni aani. Ghạlamo okol ạmuum aNimrim bịn mạgharaghar.

³⁵ Mị kámeera mun mọ aweye ạMoab ọḅile ghan ọphinyon rịkia oguom nịan riisi ooseeny phọ ạbidi, ḅịle rꞌọphinyon rịkia ọngo ruru phọ ạbidi. Mị Ọmoogh-we phọ kụ mạḅem.

³⁶ “Kụ iḍighi, kụ ologhi ạmi ramoghinaan ghan Mọab ḅịle rꞌawe phọ aKir Heres, ịdipho oye lọ rạmoor ḍụor amaḍi loor ẹbam eeḍue, loor esi dị oomo phọ ạraraar phọ bịdi ọmoogh bọ mephe.

³⁷ Oomo ạbidi moghula rụmhu ạbidi okula ịleem ạbidi. Bịdi modoghoḍian rẹlem rạghaagh ạbidi, kụ tọrobo oye mạkpologhian ạsuoma ọto.

³⁸ Ạnyu oomo aruutu ạMoab rꞌịsiphe oomo arurugh ogbo ẹmha phọ, ẹnon ịyaar ílho emuton emoghi, loor esi dị mị maḅom Mọab ịdipho izoki dị rꞌoye ụ́wa mun.

³⁹ Mọab moḅomoghi ootughuḍi! Imoghi agey! Moofolomi Mọab. Meeph ọmiin, kụ oomo areelhe phọ etuman bọ rotulughi ghan. Mị Ọmoogh-we phọ kụ mạḅem.”

Okpetenaan ólhoonaan Mọab

⁴⁰ Ọmoogh-we phọ maguanaan mọ eniin eelhe kesoorom Mọab ịdipho uga dị ạrar raphaaph rasoor,

⁴¹ kụ rạmha phọ rꞌịikpara arikpisi phọ kọsighe ni. Ḍio phọ ạḍiphe awe ẹgham kọmoogh eepuph mụdi ạnir dị odi rꞌoghunughun.

⁴² Kopiemi Mọab kụ kéḍighi mun eelhe, loor esi ọḅaar ẹmhu phọ ọdi esi ạmi.

⁴³ Aḍiigu, ariini rꞌasiphil kụ rekori ghan weye ạMoab. Ọmoogh-we phọ mạḅem.

⁴⁴ Tọrobo oye lọ ạwa okpetenaan aḍiigu phọ kasuma sịphe ariini phọ, kụ tọrobo oye lọ akpogha riini phọ aphun kameel siphil phọ, loor esi dị Ọmoogh-we phọ maseere mem ophiemi ạMoab.

⁴⁵ Awe dị oghiil ẹgham dị ọwa ekpisi ọrol aani ẹpe Hesbon, ẹmha phọ aSihon ọdaam mọ mạda ghan bọ mem, kụ ọlo osi ẹpe ạnian reemor. Ạnian melhe rụuku phọ rꞌaruugum mọ awe ạMoab ọphomoghian bọ ẹgham orughogh bọ.

⁴⁶ Ịnma ighirigiir weye ạMoab. Awe dị ooseeny Kemos mophiemi, kụ ạnmuny rꞌạnmanyaan ạbidi mọsighiogh ọḍuanam ọrolomi ạdol ikoli.

⁴⁷ Kụ riiḍio dị retu Ọmoogh-we phọ kạḅile ni aḍume Mọab. Oomo ịphen kụ ẹdi Ọmoogh-we phọ mạḅem mọ kemitenaan Mọab.